GAGURITAN I MLADPRANA
I Gusti Made Rai
IV.
PUPUH
DEMUNG
- Ento makarana Adi tan tolihan, tekén pasawakan inguh, bahan beliné buduh, mula beli uli cerik, manjus baan kagedegan, masugi ban liyat rengu, mambuh ban ujar para, mapun bahan sakit hati, sai matoya ban temah, mabunga ban munyi pisuh.
- Pisuhé pisah né jani sebeté sabatang, renguté rengatang empug, gedegé jani gudug, temah pastu amah pisi, ujar alané jua ulah, ulah beliné mamerud, nyéwaka ring i déwa, ratu nguda ngajang pedih, lemperang kayun i dewa, nguda gusti tong nyak teduh.
- Surya petengné ngebusin panes bara, masih ida dadi teduh, angin baret ngalinus, bisa alus mangusisir, pasihé ia dadi puras, besi bisa masih elung, macané kereng manyarap, masih ia bisa kasih, atu bengkung nyén katulad. krana tong dadi ban teduh.
- Sakatah atur i miskin nunas ica, tan ngawales yag mamatu, jani pisan barutu, panglemesé tan katampi, kadi ngamunyinin tunggak, tunggaké atiné uwug, sedeng janiné mangawag, nyén jua bin elekin, i bapa ia suba Iega." Keta kenehé ngalalu.
- Raris ia mangancing kori tur nangsekang, Jangga Ketaki kaejuk, baongnya kagelut, wastra sinjang kalukarin, pupu dada katitihan, kakarsa turin karumrum, Ni Jangga Ketakia, laut nyakar tani gigis, lintang paksa maplawanan, Rudita ia telas renyuh.
- Rudita ia nyumingkin manyajaang, sengit ngocok ngantos peluh, I Ketut Oka lesu, tambis keni kahaworin, raris ngawetuang daya, mangda kasidayan luput, ento né pingitang, alus anggén pangalalis, ngalemperang keneh ia, pesu munyi ngalelunyuh.
- "Nguda beli sapunika tan ngubdayang, kayuné pacang salulut, inab wénten pacang ngrebut, sapunapi sengguh beli, krana titiang tan ngiringang, wiréh titiang alit kantun, andéyang kadi i bunga, durung kembang pusuh kari, kranané sedeng antosang, yén jati saking pakayun.
- Mapakayun nganggén becik nah dabdabang, boya titiang ngapus atu, manah titiang bakti mulus, mamanjakin linggih beli, dulurin palegan bapa, nyumingkin kenehé pulus, mamanjak mangayah, idup manggih Iegan ati, sareng beli ring pamreman, makilit sai majangkut.
- Kewala mangkin jantosin tigang bulan, kala ditu titiang nurut, mangiringang sapakayun, peteng lemah jua mabuncing, kénkén yan asapunika, ngapus kayunin i ratu, duh inggih yaning titiang, nora satia manglinyokin. mangda titiang temah pitra, sakit enyag tumpur agung.
- Niskala salahang Widi ring sakala, atu nyisipang satuuk, gela-gela titiang ratu, pinunas titiang ring gusti, sajeroning tigang bulan, mabelasan yan aturu, beli irika diwangan, di kamaré merem sai, mangda sampunang sangsaya, sekalané mangda pangguh.
- Pinunas titiang ring beli pineh pisan, yan tan dadi andeg ratu, kayuné nyadia salulut, titiang pamit pisan mati, krana nglalu dipejah, ban munyi tuara kagugu, nah kadung bébasang, pekayun beliné mangkin, mangda sinah antuk titiang," I Rudita ia sumawur.
- "Sapunika kayun adi titiang nyadia, pinunas titiang ring ayu, nah kéwala pang mulus, ayah tingkah anggon ciri, titiang pamit jani pesuan." "Nggih matangi beli bagus", ngraris ia diwangan, ka kamaré juwa mangungsi, Ketut Oka ngancing duara, ngararis dané aturu.
- Tan kocap rahina wengi sampun lemah, suén ipun kalih uku, I Wayan Rudita, tetap dané kahayahin, mirib ngayuh ban nyak ngayah, lega ngenot payu enyud, kakolongan babak, tan critanan ditu sai, gentosin jani carita, ring Purbawyanjana kawuwus.
V. PUPUH GINANTI
- I Mladprana kawuwus, miragi orta sujati, dané Ni Jangga Ketakia, sampun reké kapakidih, maring dané I Rudita, saking bapannya ngardinin.
- Osek dané maring kayun, pakayuné nyadia manggih, apané anggon jalaran, ngrawos ring Jangga Ketaki, pisan surat jani baang, raris ia makarya tulis.
- "Niki tulis mapitulus, nanginin sampun matangi, saksat nasikin segara, mitegehin gunung nginggil, ratu sampun lintang suéca, titiang malih jua makéling.
- Antuk ubayané sampun, sampunang i ratu lali, sanggup i ratuné suba, jelé melah sareng kalih, mati matungalan bangbang, papa suarga titiang ngiring.
- Ditu idupé mangda lulut, murup tresna makarasmin, tur masaksi pitra déwa, dulurin supata sai, nyén ja ngawit megat tresna, mangda kasisipang widi.
- Yan ratu elong ring sanggup, mangda mangguh tan abecik, idupé nemu sengsara, yan mati nraka kapanggih, lebok ring kawah Gomuka, ring jambangan kapunpunin.
- Yan titiang mitia ring atur, mangda dadi dasar gumi, mati dadi entip kawah, siu taun mangemasin , metis ring kayu curiga, katuwek ban lalang taji.
- Krana titiang ratu agung, purun cepung mupasaksi, réh manahé culup terang, wantah sungleng ring i manik.
- Nora lian ratu ayu, anggén titiang bungan ati, pinakayang pajimatan, pangilangan sakit hati, anggén titiang arca mas, diman sai lingling."
- Kudiang lali dadi saru, ban ayuné tan patanding, déwan pasihé idéwa, Sang Hyang Giri Putri nyiwi, Supraba Ian Tilotania, kasor Ratih Saraswati.
- Jegeging buana iratu, bisa nglalunyuh ngaremih, muluk rempuh yan ngandika, kasor rebabé ban jangih, kemikan bibihé mlenyad, madu juruh kasor manis.
- Untu selem ngatibambung, putih kadi danta asri, isité ngembang rijasa, cacingaké galak manis, gidaté mulan tumanggal, alis tajep kadosangih.
- Roma samah panjang gempuk, pipi meros ngawé rasmin, pamuluné lempung nyalang, susu alus rupit nyangkih, adeg lanjar wangkong rengkiang, palané ngurangka bangkit.
- Tangané lemet malengkung, naka panjang pakurining, jariji rurus mangancang, pupu nyalang putih gading, betekan batis mamudak, tandangé ngenyudang ati.
- Duh nyén bangkit nyén ja muluk, misi kadengan di pipi, kudiang titiang tani pusang, sing solahang mamuduhin, yan salulut lintang pradnyan, sebet tan wénten nyaménin.
- "Manah titiang kadi ketus, ngatut sasiki ring gusti, nyadia sapatitah ida, tan tulak titiang tan gingsir, nyadia nyusup gunung alas, diastu pacang mlebok pasih.
- Ban manahé lintang culup, misadia pacang ngulanting, ping asta ratu tan suka, ping sanga titiang ngubakti, nyadia ngayah mamarekan, ban tong bisa ngret budi.
- Napi krana sapuniku, ring idup tekaning mati, budin titiang ring idéwa, tuara dadi jua silurin, nyén ja mampuh ngret cita, keneh kesemaran paling.
- Lila-lilayang tong lipur, purnayang nyumingkin éling, pulesang titiang nguramang, yan pules tan mari ngipi, ngipi sareng ring idéwa, ring pamreman silih anyih.
- Makesiab ngrupata bangun, ban ida rasa nyisinin, usudin sampingé ungang, bangun titiang negak ngeling, ngenah bulan wawu endag, nyumingkin manahé, sakit.
- Uluh ati kadi seluh, maketug ngenek ring ati, buka tebek asah buyan, runtag asa pacang mati, mati antuk kasamaran, pratéka titiang né mangkin.
- Gulung titiang ban salulut, badusanin madia ramping, anté jua bahan teresna, ubayané anggén tali, matatindih antuk sinjang, mampok-ampok bané pingit.
- Plengkungin tangan malengkung, angenin ban susu nyangkih, rambut demdem anggén prangat, pupunida putih gading, lan betek cokor mamudak, punika anggén dedamping.
- Jriji rurus anggén ukur, gelengin ban pipi bangkit, ulonin antuk wedana, laluwurin ban karasmin, sléndang anggen rurub kajang, rékanin antuk wewangi".
BERSAMBUNG ..................
