Kidung Sanghyang.

PANGUKUP

Purwakaning angripta rum, ningwana ukir,

Kahadang labuh, Kartika panedengin sari,

Angayon tanguli ketur, angringring, Jangga mure

Sukania arja winangun, Winarna sari,

Rumrumning puspa, Priyaka ngoling tangi,

Sampuning riris sumaura, sungguing, srengganing rejeng,

Om Hyang ayu ngiasin gelung, ngrangsuk raja busana,

Gelang kana pinggel agung, masimsim masekar taji,

Mengaji Hyang jenar sari, makekepet cina rata,

Kekasange alus, sarwa mirah manik,

Widyadarine tumurun, ngegana di ambarane,

Anonton sekare arum, ambune miyik sumirit,

Kawula pada menangkil, prasama manunas ica,

Mangda gelis turun, ring pura melinggih.

Sanghyang sampat, mariki turun malingse,

Malingse mangda becik, mangigel sereg-seregan,

Seregseg-seregseg  sira yayi, turun sira  manelimat .

Sri ayu putus kaja lungah lumaris ledah,

Uludana-uludana, Sri putus, magonjar-gonjar.

Unya-unya urut-urut, urutang ayu dedari,

Arum dupdupang apange sirep.

Dumarau ngeganae dumarau sidi, anenembah diarepe,

Tumurun Betara Indra, Widyadara-widyadari anggon sanghyang .( 2x )

Dumarau ngeganae dumarau sidi, Dupdupang pangelali,

Puniki ganjaran sirep pulpulang pangdeldelan,

Pang enggal-enggal nadi, ingsuna katon karma,

Mengajap kebyar-kebyur, gending gumuruh ajaripang rawuh,

Sapa nuntun gending gumuruh, maken ijo maken nudut manah.

Nudut manah dodotin madyane ramping,

Ikang conteng ya ikang moning, katungkul majejogedan.

Kukus gunung cenana panguntap dewa, manguda dereng nurunin,

Tidong turun manyoged, manyoged eleg-elegin,

Mangepil-epilan oncer, oncer idane, aduh dewa ya sutra dadu,

Ya oncer idane, ya sutra dadu.

Merak mekincir kuning, payas ijo mewangsul lilit,

Mangigel tengahing natar, igel dane ya lenta-lente,

Matanjek magulu wangsul.(3x)

DARI PUTIH

Kukus arum sane katur ring sang arum, preragane lempung lemuh,

Busanane sutra petak, gegelunge mas maukir.

Preragane abra murub, Ida wantah mapuspata,

Widyadari petak suci, jaga ngaksi kaulane sane subakti.

Madak Ida prameledang, mapaica amerta sari,

Ring panjake sane subakti, mangda sida jagate sami raharja.

SENDON DARI PUTIH

Singgih ratu, titiang nunas, mangda ratu, ledang nonton,

Doning sampun, para panjake, nangkil atya, nunas ica,

Mangda rahayu.

Ratu ayu, maken petak, sutra alus, mampok-ampok,

Magruda mungkur, selendange,

Pake depdep, asri pisan, nudut kayun.

Masekar jepun, miwah sandat, magelung agung, tur meron-ron

Mas linuwung, tur metatah, masoca mirah, mangurayab,

Ngawe ulangun.

DARI KUNING

Sekar gadung ya sekar gadung, anggrek lan medori putih,

Celeng petak tunjung biru, Iratu mekarya tirta.

Tirta ening ya tirta ening, sibuh mas toya ring sangku,

Siratin ragan idewa, ketisin juru kidunge.

Wus maketis ya wus maketis, turun widiadari kuning,

Ida turun saking suarga, nyingakin panjake sami.

Malih benjang ya malih benjang, I ratu turun kaundang,

Malih benjang, I dewa turun kaundang.

SENDON DARI KUNING

Durus ratu, mangkin tedun, ring natare,

Mangda kayun mailen-ilen,

Sesolahan kadi kendran becik pisan.

Pahiase, pangus pisan, sutra jenar,

Manguranyab asri pisan,

Gegelunge mas  masoca mirah ratna.

Pinggel emas, majejawan, sasimpinge,

Mas metatah manguranyab,

Swabawane abra murub ngulangunin.

Pasledete, kadi tatit, semitane,

Nyunyur alus ngetus manah ,

Madya rengkyang lemuh pisan magoleran.

DARI KEMBANG JENAR

Kembang jenar mangundang-ngundang dedari agung,

Sane becik becik ratu undang, Hyang supraba nunjung biru.

Tunjung biru ngrangsuk busana meanggo-anggo,

Tidong saluk baju mase, becat miber magegana.

Magegana mangilo-ilo ngaja kanginang,

Kepanggih taman di jero, tamane bek misi sekar.

Taman emas sandingin pudak anggrek guringsing,

Tiga kancu manah soli sempol, Kedapane ngalelepe.

Ngalelepe alapang pudak medori putih,

Eyeh empul suda mala, I ratu mekarya tirta.

Tirta ening makebyar-kebyur di taman sari,

Tidong turun widyadari, manurunang dari kemang jenar.

DARI  KUPU-KUPU

Kupu-kupu metaruman, balang dawa di batan jurang,

Daun kelenco dangin kabirbir, kampid Idewane ngedir.

Dari kupu ngrangsuk raja busana, praya lunga nglanglang ulangun,

Solah Ida luwir sesapi mengindang, mekadi kupu metarum.

Metaruman makepet dadua, mekadi merak mekepu,

Buka kena pangerger I jaran guyang,

Pangerger melah tong dadi bancut .

Kudiang jani mangelesang, gunane kadung manyusup.

DARI CAPUNG

Nyelang gunting kesaren kangin, cakete matebu-tebu,

Pacang napi manyelang gunting, pacang anggen ngunting ikut capung,

Capung napi pacang kagunting, capung emas plalianan widyadari,

Widyadari turun nemangkin, ngeberber mekadi capung,

Ngasirsir mekadi angin, makebyur ambune miyik,

Wangine kadi cenana, awor ring sekare miyik,

Ida turun sakeng suwarga, mengaksi panjake sami,

Panjake sami pedampiak, pacang nunas amerta sari,

Sarin tawon sarin pari, gemuh landuh lan waras sami.

DARI TUNJUNG BIRU

Sekar jepun, alapang medori putih,

Ratnane putih ngerembyok,

Ya celeng petak lan tunjung biru.

Sibuh emas, medaging tirta amerta,

Siratin ragan idewa, siratin juru kidunge,

Siratin juru gambele, durus siratin panjake sami.

Dedarine turun ke mercapada,

Arsan Ida mengaksi panjake sami,

Sane lara ratu sanghyang menambanin.

Tamba becik ratu mamicayang,

Kasiratin mewastu seger waluya,

Waras sami sida mengaturang ayah.

Ngayah sami deha teruna pepatehan,

Sami siaga pada mengaturang sembah,

Sembah bakti mangda sida kerahayon.

Dedarine turun ngalap sekar,

Sekar gadung melilit di ampel gading,

Ya ngenem bulan ratu sanghyang ngelelayak.

Tampalan-tampalan badung, juru rangda ya sampun tedun,

Malinggih di tumpang solas, Igelnyane meratangilo,

Pemargine ngalang bulan.

Ratu raden pandung ( mengijik ratu mesolah (2x) )

Masolah mangusud gelung,

Gelung agung ( babintangan mapirada (2x) )

Sinanggih pusuhan jepun.

Ratu raden pandung ( iratu  ngrawosang pandung (2x) )

Memandung rangdane sakti,

Rangda sakti ( panikane gragah gruguh (2x) )

Nganikain juru pandung.

SENDON DARI TUNJUNG BIRU

Titiang nunas, mangda ledang, ngampurayang,

Para panjake, sinamian, apan wimuda, tambet pisan.

Durus picayang, pemargine neutama,

Mangda titiang, ngemangguhang, kerahayuan, sinamian.

Madak sueca, ngalugrahang, pangleburan, dasa mala,

Wastu titiang, sinamian, suci nirmala.

Para panjake, Mangdane sami waras sinamian,

Mangda sida mengaturang ayah ring Betara.

MEMENDET

Memendet dewa memendet, pendetan wancine cenik,

Wanci cenik ukir-ukiran, ukiran gedong melati.

DARI SUCI

Dari suci, lali-lali, ke bencingah,

Selukin, ayame, sangkur,

Mabongbong, selat kalangan,

Metoh satak, ya menang siyu,

Ya metoh satak, ya menang siyu.

Tajen rame, dedari, medagang gantal,

Gantale, metali bungkung,

Parekan kayun menumbas,

Dadua keteng, tetelu nyaruk,

Ya dadua keteng, meimbuh roko.

DARI BETARA SRI

Kadi punyan nagasari, tumbuhe di tamansari,

Meancak saji, maserung mablumbang,

Masungga puling, sinah tan sida ngaras pipi,

I ayu mungguh ring tengah.

DARI BETARA GANA

Betara Gana medal Ida ke mercapada,

Kayun ida pacang lunga mailen-ilen,

Slasah-slisih kadi tupeng wawu medal,

Kedap-kedep manyingak panjake sami,

Panjake sami mejajar, mejajar di natar pura,

Pura alit penyungsungan, penyungsungan sareng sami.

DARI MANCAWARNA

Sanghyang Siwa, prebawane, mancawarna,

Ungguan Ida, maring madya,

Astran Ida, padma nglayang,

Kadi surya, pingit pisan yukti teka.

Yukti arang, wong weruha, ring punika,

Apang singid, reh utama,

Larapane, mangulati, yoga smadi,

Ne patut tincapang malih.

Ngrana sika, mekek bayu, manunggalang,

Ongkarane, ane ngadeg, lawan nyungsang,

Kadi ngadu, tungtunging rwi,

Nelintang bet rimbit pisan.

DARI ANGON

Dewa ngangon di tegal linggah, kalimoto kalijunggul

Don cemara, don sembunge, sembunge punggulang angin.

Dewa ngangon manegulang banteng, bantenge sedek mekepu,

Iratu mepica tedan banteng, bantenge sedek ngelungsur,

DARI BOTOH

Sampun janten pangiringe, babotoh saking gianyar, tangkis ngibing cara denbukit, jangjang jamprah selat damar, metanjek makejit ngincang.

Maseleog mauderan, pemargine menolih-nolih, menolih I juru kidung, meriki dewa meriki, merarian ke saren agung.

Sampun wenten bale lanjang, kasur sari galeng tumpuk, pepayasan makelambu, pamereman yun dedara, menyanding dari supraba.

Di dindinge damar alit, kepet rua mekembaran, kepeteng ratu mesolah, mesolah di natar pura, ngabrebeh Ida memargi.

Dempo-dempo ya ya dempo-dempo, meonced-oncedan, kadi linus meulehan, buka busunge ampudin.

Tangan lelo ya ya tangan lelo, Lemet-lemet melengkung, Jerijine lurus mengancan, buka busunge ampudin.

Sesengkange ya ya sesengkange, mas emas metrawang, Sesocane mirah delima, sesocane mirah-mirah adi.

Kecas-kecos ya ya kecas-kecos, kadi garuda masolah, alah sesapi mengindang, masuluh di semer ening.

Susu rupit ya ya susu rupit kadi gedang, kadi gedang nyalang gading, buka salak kelumadin.

Krenyang-krenying ya ya krenyang-krenying, masigsig pat-pat, untu nyalang kadi danta, isite ngembang rijasa .

Krijip-krijip ya ya krijip-krijip, penyingakne, menyeledet manyeleog, kenyung manis nolih-nolih.

Cai ketut matetajen kangin, mepek ngundang botoh, tetajene kelangkung ramene, cai ketut magelar abangsit, menang duang tali, tetajene sampun suud.

Raris ngojog ya I dagang nasi, tumuli menyongkok, cai ketut alus pamunyine, baang kuda tiang meli nasi, megenep isine apang ada aji satus.

Laut ditu ya I dagang nasi, bincuh nyemak tekor, pengisine sewarna ebene, kacang-kacang lawar teken guling, sate pada misi, tetimbungan babi kebo.

Sampun tetep ane pada misi, mangenjuang tekor, cai ketut alus penampene, emoh-emoh ya medaar nasi, tanpa nolih kori, ulun ati sedek ibuk.

Kacerita ya mekire mulih, mapan tiang goroh, megenepan gagapne lakar mulih, biu salak manggis teken croring, duren buluan wani, be guling serapah penyu.

DARI BALANG MINYAK

Singgih ratu sanghyang widi, Titiang nunas sane mangkin,

Sweca ratu menawengin, Meranane punika sami.

Damuh minyak walang sangit, Miwah wereng maka sami,

Balang minyak balang somi, Balang kajoh tan ngaduk sami.

DARI KRENYET

Cunge-cunge pinga-pinga Ngambil uga di keliki,

Dewa krenyet mekejang ambila, Baktan ida rawuh deriki.

DARI WOT

Kembang pepe ya kembang pepe, Jepite gantung don paspase,

Buka kenken mantun-mantun memene, Buka lutung megasgasan.

GENDING WIDYADARI WOT

Para widyadarine, Ida pacang mapaica maha merta.

Amerta sane kapica, Ring pantune wantah yukti kegenahan.

Amerta wantah utama, Maka pengantungan uriping manusa.

Sampunang mangkin lempas, Astatine maring ida sanghyang widi.

Ane anggon sarane, Nunas ica maring ida sanghyang widi.

Daun kelawan sekar, Woh-wohan kelawan toya jangkep sami.

Sejabaning punika, Kayun suci malilang galang apadang.

DARI KAKUL

Dari kakul, mengigel nyirig pundukan, Taluhe, jomprot-jomprotan,

Kadenang, jaja begina, Kalud renyah ya buin nyanggluh

Ya kalud renyah, ya buin nyanggluh.

DARI LUNG-LUNGAN LAMPIT

Lung-lungan lampit, Lung-lungan uga,

Plaibang sampine ane berag tugreng (3x)

DARI DEWI

Dewi ayu metangi meilen-ilen, (2x)

Dong pirengang munyin solinge di jaba ya ya,

Dong pirengang munyin solinge di jaba.

Enyen ento menyuling di jaba tengah,(2x)

Gusti ngurah alit jambe pemecutan ya ya,

Gusti ngurah alit jambe pemecutan.

Buka kenken munyin solinge di jaba (2x)

Sruwang-sruwing gagupekan mecadang kempur ya ya,

Sruwang-sruwing gegupekan mecadang kempur.

DARI PANGSEG

Kaki tangtung, napi abyane kal udud,

Apa abyan kakine, tuung kokak tabya ranti,

Tebu ratu, di sisine ratna mengambyar.

Putri ayu, mesingal sambil mejujuk,

Rambutnyane panjang,mewastra tebel mepipil,

Yan melalung putri ayu cotot siap.

DARI ANTENG

Nyampat macuniga, mebanten sumping keladi,

Ane nyampat dadi dewa, ne mebanten dadi gusti,

Para dewa turun memuja, para gusti turun mebaris,

Enyen teka uli kaja, macengkeg pucuk akatih,

Apake runtutnya, jebug genggong nagasari.

DARI NGELAMPIT

Kerat-kerut, bintang ulun manelebuh,

Beberokan dadua, umbul-umbulne akatih,

Ulu telu, sasukune dadi adasa.

Capluk-capluk, rangdane ya sampun tedun,

Naga banda mekembaran, ne nututin mecemeti,

Srayang-sruyung, kiwa tengen ya meninjak.

DARI MAS MEKEPUR

Dedari turun ke mercapada, Arsan ida mekadi emas mekepur, Kayun ida pacang lunga melegong-legongan maring natar pura, Pura alit penyungsungan sareng sami.

SENDON DARI MAS MEKEPUR

Ledang ratu mangkin tedun, Mapaica mas mekepur,

Ring panjake maka sami, Mangda sida gemuh landuh.

Tan kirangan pangan kinum, Seger oger lunas-lanus,

Tri bogane mebuat, Mangda ledang kapicayang.

Reh punika larapane, Pacang mangguh negarane,

Pacang kerta nekebuatang, Olih para jana sami.

Nb ; wastra putih

         Kepet 5

DARI MAS MELILIT

Kayu emas ratna di taman sari,

Dong mewastra sutra jingga mapurada,

Buka emas sami di taman sari,

Penepeke sutra kanta mekembaran,

Melah saja penginten sanghyang,

Baju batik babintangan sarikonta.

GENDING DARI MAS MELILIT

Mangkin tedun, sang rumaga Hyang Sinuhun

Abra pisan, wantah anut busanane,

Mas melilit, masesocan mangendih murub.

Durus ratu, ngelanturang pican iratu,

Arta brana, ring panjak iratu, sinamian,

Mangda sida, memangguhang, gemuh landuh.

Sweca ratu, ngalugrahang, sane rahayu,

Maka mon mon, panjak iratu,

Mangda sida, ngaturang ayah,

 Maring ida hyang sinuhun.

Nb; kepet 3

DARI MAS MEKETEL

Sekar disekar emas ngareronce,

Sekar gadung di sanggar langit,

Soyor kangin soyor kauh layak-layak,

Lamun dilamun oneng galap sekar,

Sekar emas di pucuk kuning,

Nagasari sekarang ratu mesolah,

Igel ya igel ida nolih-nolih

Manolih I juru kidung,

Juru kidung pengaroge sampun ngambyar.

GENDING WIDYADARI MAS MEKETEL

Om awignam astu, moga mami, Natan keneng tulah carik,

Apan mami tuhu muda, Natan weruh ring susila,

Titiang jugul, nuntun ratu mas meketel.

Yan iwang antuk titiang, melaksana, Twi mepajar,lan memanah,

Sweca ratu ngampurayang, Doning tambet titiang lintang,

Nenten pisan uning maring iwang patut.

Diyastu titiang tambet, taler titiang, Mapinunas mangda ratu,

Ledang ngangge titiang panjak, Mangda titiang polih pisan,

Nganampekin palinggih I ratu sanghyang.

DARI PUTUS

Dewa putus kautus saking suwarga

Kayun ida pacang lunga meilen-ilen,

Solah ida kadi legong wawu medal,

Sledat-sledet menyingak panjake sami,

Panjake sami mejajar, Mejajar di natar pura,

Pura alit penyungsungan, Penyungsungan sareng sami.

DARI SUPRABA

Sekar sandat menuh gambir, Pucuk menyan medori putih,

Manah soli sempol, Kembang cina ratna petak pancer galuh,

Dedari supraba raris ida memargi,

Mangulati sekare becik, arsan ida ngalap pudak,

Mangulati pacang ngemban pange ayu.

Ukir kawi ukir kawi, Unagi sakeng gegelang,

Druwen ida bethara bagus made, Ida arsa nyeneng sekar,

Sekar sandat pucuk kuning,

Sekarang dewa mesolah, Baris kepet mekembaran,

Menyabit oncer-oncer mewarna, Mengumbang cara peresi,

Menolih ngenjekin kempur.

Kempur emas druwen dari supraba, Materompong gender calung,

Gagupekan gadung-gadung melati, Sesulingan cara kendran ,

Uruk-urukan wong inggris.

Pragina bajang bagus anom, Maudeng batik bang kuning,

Maonggar-onggar cempaka petak, Nyungklit keris nyemirin danta,

Medanganan mas meukir,

Minggir-minggir, rebab dadua, Suling papat, tetabuhan,celempung gading, Cemarane sriat-sriut.

Nb ; kepet 5

DARI MANIK TOYA

Ketut tidong bangun, suba lemah,

Dong meriki, I ketut nandang payas,

Dong mewastra, di kembang bukit,

Masinjang, pitula sutra,

Pepetete sutra jenar,

Oncer dane sutra dadu,

Anteng dane guringsing wayang,

Sesocane mirah delima,

Sesengkange mas metrawang,

Masesocan mirah ratna,

Druwen ratu manik toya.

DARI LUH TAMA

Putri ya alit ayu,

Makulambi ya lungsir kuning,

Dasarnya ya sutra dadu,

Maseselet keris ngelelo

Kekandele silih asih.

Nb;(lagu; kekincir, solahah; mantri)

DARI JUBEL

Klijat-klijut metapa maring gua, Mesalin rupa lungsir kuning,

Kecucutan darmawangsa, Kelipese ngundus keris.

DARI GELUNG AGUNG

Gelung ya gelung agung,

Mabulengker ya sekar gadung,

Matibtib garuda mungkur,

Meselendang dane guringsing,

Anteng tangi mebaju emas.

Nb; (lagu; kekincir)

DARI REJANG KENDRAN

Rejang kendran, Widyadari turun mepayas,

Sempol sekar menuh, Mewadah wanci meprada.

Warna luwung, Kadi bulane nadarin,

Tandang kadi sutensu, Mabulengker masekar tunjung

Ketes maembah, Tayungane ngantu-antu,

Tandang kadewatan, Maketes mabungkung emas.

Soca mirah, Manguranyab,mangedanin

Sandingin bintang kartika Liar-lier malokange lumlum.

Melok-melok, Langsing lanjar magoleran,

Carmane putih alus, Kadi salak kelumadin.

Ratu-ratu agung aras kuda titiang (2x)

Titiang amamuat (2x)

Pabuate semarandana miik sumirit.

Ratu-ratu agung aras kuda titing,

Titiang amamuat (2X)

Pabuate semarandana miik sumirit.

DARI BETARA WISNU

Betara wisnu turun ida ring mercapada,

Busanane sarwa ireng manguranyab,

Gelung agung cecandian mas metatah,

Masesocan mirah ratna mutiara.

Pradnyan wira ngagem cakra lintang luwih,

Ida turun miara jagate samian,

Wastu sida gemuh landuh lan sukerta,

Pan wihikang ring jagate nyakra werti .

DARI IDA GEDE

Ratu ida gede medal ida ring purian,

Kayun ida mesolah di natar pura,

Solah ida luwir baronge gaboran,

Masumpang pucuk akatih,

Luwir kampuh ida sutra poleng manguranyab,

Wastran ida sutra petak gegampelan,

Sekar ida luwir di terange meoncedan,

Pepetete sutra jingga mapurada,

Luwir kayun ida pacang lunga meilen-ilen,

Kayun ida menyingak panjake sami.

Jero wayan tedun meriki mangkin,

Sinjange ngerempyong,

Ragan dane, nyalang dinyandat gading,

Betene gadang, di duurne putih,

Untu dinyalang gading,

Wawu kepirengan baru.

Odak raga, odak di cokor ulit,

Cerakene wenten, reracikan sampun pada medaging,

Jebug garum, sintok masuine,

Jlawe di pula sari, cekuh lanang sampun ditu.

Odak raga, odak di cokor ulit,

Cerakene wenten, reracikan sampun medaging toya,

Pesaure iluh di kunang sasih,

Dong urutin nira, nira poyok sai mandus.

DARI GEGAR PETAK

Gegar petak kautus nyunarin jagat,

Makeber di pura agung,

Arsan ida mangilehin jagat,

Nyeregseg magulu wangsul,

Kampid sutra menguranyab,

Matinggah di pura agung,

Cucuk emas masoca mirah manguranyab mangedanin.

DARI BELECING

Ratu durus medal mengaksi sarwa prani 2x

Punika wantah amon-mon tedune mekadi mangkin,

Nika maka sami sehananing ne metuwuh 2x

Ratu wantah naruwenang patut polah-palih galah urip.

DARI MANCAGINA

Dampar emas, dedari, turun memaca,

Nekapaca, rontal wiwaha,swaraning,

Ki juru paca, lwiring,sunari anginan,

Wirama merdukomala, Turing meguru lagu.

Sang memaca, murwa kanti, Dahating siksa, enjekan basa,

Tan timpang, juru basa, Melinggih nyempel, metanganan,

Tudang- tuding, pengucape manis, Banban swarane merdu rempuh.

Nb; lagu; dari suci

DARI BEGAL

Sasi wimba haneng gata mesi banyu,

Ndan asing suci nirmala mesi wulan,

Iwa mangkana rakwa kiteng kadadin,

Ring ambek yoga kiteng sekala.

Prihan temen darma dumaranang sarat,

Saraga sang sadu sireka tutana,

Tan arta tan kama pidonia tan yasa,

Ya sakti sang sadnyana darma raksata.

MUNGGAH

Suba emar ya suba tuyuh, sumbune meprapit emas,

Ngaja kanginan dewa ngaja kanginan mangojog kori agung,

Kori agung ukir-ukiran, ukiran gedong melati.

Menek-menek reke sanghyang kejempaka,

Tuwun-tuwun reke sanghyang ke beingin,

Nira keme reke sanghyang nora kesapa,

Titiang mulih reke sanghyang pangelingin.

Atep puput, atep puput, atepin ayu dedari,

Ratu mantuk ke suwarga, titiang budal ke peturon.

Makreg langse, langsene anyar, mapindaan niwang sengsari,

Aruh mapindaan niwang sengsari.

Item-item tapuk manggis, temune bubur bungane,

Selem sedek kenyung manis, putih gading tara gunana,

Aruh putih gading tara gunana.

Bintang siang reke sanghyang tumbuh kangin,

Kasunane reke sanghyang tarik mebunga.

Apang tangar nyai deha kayeh kangin,

Tarunane reke sanghyang mesawang guna.

Guna apa reke sanghyang kepasangin,

Guna pules reke sanghyang pang kelilit.

Mulih insun mulih, mapa insun di suwarga,

Apa rarapan insun mulih, bantal tebu mapahias.

Mulih insun mulih, mapa insun di suwarga,

Apa rarapan insun mulih, wastra alus selendang petak.

Mulih insun mulih, mapa insun di suwarga,

Apa rarapan insun mulih, simsim sengkang pinggel emas.

Share: