GEGURITAN SUCITA I ( I. PUPUH SINOM )

( IDA KETUT JLANTIK )

I.      PUPUH SINOM

1.    Jenek ring méru sarira,

kastiti Hyang Maha Suci,

mapuspa padmahredaya,

maganta swaraning sepi,

maganda ya tisning budi,

malépana sila hayu,

mawija ménget prakasa,

kukusing sadripu dagdi,

dupan ipun,

madipa hidepé galang.

2.    Sabda Parisuda puja,

gemeting ajnyana wisik,

tegeping saupacara,

dwaning Ida kaastiti,

asung lugraha pinerih,

mugya manggih marga lantur,

sida sadya panjang yusa,

ring papa budi akalis,

mangdén luput,

ring saktining bawacakra.

3.    Antuk lengut kaput melah,

pakardin sang kawi nguni,

tuhu bangkit nudut manah,

ngawé linglung mangresepi,

mawinan metu tan éling,

ring tambet kaludan dusun,

girang pangkah muruk nyurat,

sinom kanggén manembangin,

mapi nyambung,

sukértin sang kawi raja.

4.    Mamitang gung pangampura,

antuk bas lagas mangawi,

satwa ngawur tanpa buktya,

sok dasar pamrihé becik,

nyaratang rahayun gumi,

mudita maka pakukuh,

kadi tingkahing kasatyan,

adwa tuhu tan kétangin,

sok né tuju,

wasana hayu punika.

5.    Maka panembéning satwa,

wénten wanwa ngulangunin,

ramya dahating subiksa,

tepeting sila sayukti,

manuting gama sastra wit,

sahi mangrembugang tutur,

teleb nangun tri yadnya,

brata tapa lan samadi,

teka guluk,

adung ngawé kretayuga.

6.    Undagi pandé lan tukang,

asta kosala kosali,

akéh tan wénten pakirang,

ngadeg memarga malinggih,

mapala hayu nyukanin,

tur uning mamagi dauh,

nginganin salwiring karya,

sasolahan lan gong gending,

tan kaitung,

luwir ring Indra buwana.

7.    Wawangunan dahat katah,

gedong mapenyengker asri,

marga bresih dahat jimbar,

alun-alun ngulangunin,

paryangan gopura rawit,

maukir mapatra luwung,

mapinda malalampahan,

taman halus mangédanin,

muka kasub,

wanwa Wékreta wastannya.

8.    Luwih kala abang wétan,

suwaran gentané jangih,

anut maring slokāstawa,

kalaning para sulinggih,

mangarga ngarcana Widhi,

amrih kajayan sang prabu,

makadi landuhing jagat,

luputing cora bayadi,

lara gempung,

balik tampekin kasadyan.

9.    Sakatahing wong irika,

wénten kajawat kapilih,

kaanggén babungah satwa,

Sang Sucita kawastanin,

mula turunan utami,

tosning masadya rahayu,

punika mangkin carita,

madruwé sawitra becik,

sami lulut,

Sang Subudi parab Ida.

10. Pada saling kasampura,

sami cengeh ngetus hati,

kadi Rama Wibisana,

tan kasah rahina wengi,

weruh ring tatwa satanding,

rupa sila sami adung,

bilih budi satwa tunggal

mapalih dados kakalih,

lédang tedun,

mangjadma ngawé tuladan.

11. Manuju bulan purnama,

mabawos Ida Sang Kalih,

tan lyan sané kabawosang,

sariran wédané luwih,

Wyakarana Jyotisadi

Mimamsa kalpana milu,

sada lami mabawosan,

tepén dauh suniya mirib,

meneng patuh

sekadi mamona brata.

12. Tan asuwé raris ngucap,

Sang Sucita sada haris,

Sang Subudi belin tityang,

niki sampun banget wengi,

bawosé ngiring punggelin,

né lyan anggén manyambung,

wénten né tunasang tityang,

yogya timbang ngiring beli,

yan kapatut,

kadurus pacang margiang.

13. Saking kawit kuningayang,

duk tityang marekan rihin,

ring Ida Empu Satwika,

murukin kandan dumadi,

tingkah utpeti stiti,

tekaning pralinan ipun

ngalantur ring moksa tatwa,

cepeng tigang warsa wyakti,

lamin ipun,

Dang Guru raris ngandika.

14. Bagus sayang Sang Sucita,

unduk inanakè dini,

mahurukin sarwa tatwa,

nyalanin maguru bakti,

tutut tan nahan nulakin,

kasidan salwiring tuduh,

wanengané tigang warsa,

suba tutug nto né jani,

yogya mantuk

jumah buwin rasa-rasayang.

15. Kéwala patinget bapa,

sadurung nanak mapamit,

kadi melid manyekenang,

réh mula pejalan indik,

guru yan tinggalin murid,

manggeh sangsaya ring kayun,

takut yan masalin tingkah,

kadi ménda yan elébin,

dadi rusuh,

bahan tong ada ngangonang.

16. Sangkan da mangutang yatna,

undagan hidepé lingling,

da dropon manyujuh sukla,

apan tuhu lintang sulit,

apang da dadi tungkalik,

nyudyamreta wisya tepuk,

bisa ngukur kemampuhan,

yan tan sida kraséng hati,

da mamurug,

apang da dadi pangenan.

17. Sajeroning I tri kaya,

tepetang da manyampahin,

ditu Sang Hyang Tri  Purusa,

linggayang sembah baktinin,

hidepang maraga jati,

tunasin hidep rahayu,

anggon sarin Atma raksa,

sakalayang dina ratri,

apang suluk,

hidepé twara bingbang

18. Kèto bahan maningkahang,

I tri kayané luwih,

né marti kaya wak manah,

kaya solah kategesin,

wak ento kartinin munyi,

manahe mateges kayun

nto tatelu jwa kandayang,

kapatutanya marginin,

eda cawuh,

réh ento déwa sakala

19. Jani palih midartayang,

apang panampiné ngatih,

né apalih buwin badihang,

kaya dadi telung bagi,

tan dadi mamati-mati,

miwah twara dadi rusuh,

ring luh tan kurenan gelah,

barang tong kwasa padidi,

da mamandung,

bisayang ngunadikayang.

20. Indik manyuwang kurenan,

liyu ngaba unduk rimbit,

réh sanget ngawé sengkala,

yén iwang bahan nindakin,

munah turunan padidi,

kadat utamané pangguh,

mingkin ané madan gamya,

né ngawé letuhing gumi,

ida sang prabu,

yogya ida manyisipang.

21. Nyuwang tumin nyaman bapa,

yadin nyaman mémé malih,

rabin nyaman mémé bapa,

somah tugelané malih,

mingkin nyama sanggamain,

makadi manyuwang mantu,

miwah rabin panabéyan,

mingkin nyamah sato malih,

iwang langkung,

ento ané madan gamya.

22. Yan lebih tekén sanunggal,

ngarangkatang istri sawengi,

masih agung pamédannya,

Ida Sang Prabu misisip,

ngamadwang nyama tan kéngin,

nyuwang misan twara luwung,

ngambil ming tiga ya iwang,

saling jwang misan tan tis,

panes agung,

kadi saling juwang nyama.

23. Anak ngaba sakit nglahlah,

sakit ila minakadi,

saluwir sakité rahat,

né pacang kéweh nambanin,

né kéto nyandang kelidin,

apang da ngembahang racun,

turunané dadi rusak,

kawitané pacang sedih,

ngadu sungsut,

pada nemu kasangsaran

24. Yadin ring kurnan gelah,

sumingkin nyandang apikin,

da ngamu kadroponan,

masanggama masih pilih,

purnama tilem kelidin,

tanggal pangelong ping kutus,

prawani masih tan wenang,

sedek camah minakadi,

da matemu,

ngawé santana gring ila.

25. Lontar Cumbana sasana,

pepesang nto ngawacénin,

apang seken apang tatas,

ring tingkahing ngambil rabi,

mangda tan pati purugin,

réh agung halané pangguh,

kéweh malih mangawitang,

ngumbah pelihé nyumunin,

nyelsel pangguh,

melah yatnain matingkah

26. Ento babagian kaya

palinggan Hyang Brahma luwih,

sabdané mapalih empat,

mamunyi banggras impasin,

misuna linyok kelidin

minakadi da mamisuh,

ditu Hyang Wisnu maraga,

manah dadi telung bagi,

sa mangugu,

salwir gawé pacang mabwah

27. Dua lobané tinggalang,

telu tan mrih halan prani,

ento babagian manah

ané ngranjing darma budi,

Sang Hyang Iswara linuwih,

sujati maraga ditu,

saksat katon kagamelan,

ditu manyaksiang diri,

mawak ukur,

anggon mamidénin raga.

28. Yaning durung parisuda,

kaya wak manahé malih,

da ndén banya manegenang,

pacang mamangguh né alih,

sangkan ditu jwa yatnain,

kanggowang ulian tuyuh,

liyunang ngawé pangancan,

mangdén tan labuh nguliling,

eda takut,

ngutang tuyuh ngawé melah.

29. Muwuh ingeté cedangang,

eda bengong ngekoh hati,

gibras-gibrasang pang cedang,

rajah tamahé pang lilih,

yaning ngundapé ulurin,

élah I sad ripu tumbuh,

galak makejang mihalang,

tong maang manyujuh suci,

galak ngamuk,

tulus benya kapicundang.

30. Nanging yan ingeté kuwat,

nyalang kadi damar ngendih,

uli ditu gampang medal

kalebeté jati luwih,

sangkan nto anggon matitis,

nuju tingkahé rahayu,

wuwuhin buwin entikang,

tri kayané mangdén bresih,

nanak bagus,

kéné bahan maingkahang.

31. Né sakala lan niskala,

atepang mangdén mamesik,

réh jati palinggan tunggal,

Hyang Wisésa ngaraganin,

eda malasang di hati,

tingkahé nibakang unduk

kayané patut jalanang,

kaniskala mangdén pasti,

mudra iku,

tikasing parek ring Hyang.

32. Yaning manut marga byasa,

kucuping tangané kalih,

munggwing selaning lalata,

masih manggo tanda bakti,

anteng manyurat galitik,

sarwa tuturé rahayu,

ngarisakin pamujaan,

sakalwir punika sami,

soroh mawug,

pabaktian ring niskala.

33. Kayogyané ring sakala,

bisané matata linggih,

mamepes matatanganan,

sebeng lan samita manis,

tan mari manudut hati,

da caluh matingkah ngagu,

apang mangdén twara bina,

tingkahé mangardi becik,

apang patuh,

sok rupan tingkahé bina.

34. Kéto solahé di kaya,

ring sabda jani itungin,

bakti anteng mangastawa,

ring Ida Hyang mawéh hurip,

lengkara pang twara pelih,

miwah anteng maca tutur,

saha ngrambang darma tatwa,

miwah né mangardi becik,

ento mawug,

silan sabda kaniskala.

35. Ané tiba kasakala,

papeson munyiné manis,

getar halus ngawé suka

tong tahén natonin hati,

basa sor singgih uningin

da ngawag mangulah pesu,

mingkin ring sang mautama,

ngalap kasoré nto gisi,

mangdén manut,

ring purwa basita krama.

36. Bisané ngandayang sabda,

ngunadikayang sor singgih,

duweg mangulat lengkara,

lemuh halus seken gampil,

pantes patut nudut hati,

saha mawasana ayu,

tabuh luwung pangus getar,

yan sida bahan nyalanin,

sinah ngunggul,

dyastu ragané andapang

37. Yan tabuh gangsul tur rentang,

sinted manyakitin kuping,

dulur mawasana hala,

tan ngétang sor lawan singgih,

yadin kénkén ban managih,

awaké apang baduwur,

miwah mangdén kaajumang,

sinah kakalah ungkurin,

tabuh ngagu,

nampat anaké ngajumang.

38. Munyiné sanget ngawinang,

dadi nista dadi luwih,

kapuji miwah kacéda,

kéman miwah kaencemin,

rawos masih mangawinin,

sangkan sang prajnyan puniku,

sang tatas ring gunan sabda,

mangrawos tan mari apik,

manis muluk,

nudut manah sang mirengang.

39. Yan kaduk biasa agal,

magéhék sahi nakutin,

gangsul tanpa harimbawa,

tan wurung mangelahlahin,

kadang nyama pyanak sami,

tan marasa niru jendul,

kuping barengan nebelang,

sayan twara ningeh munyi,

nagih ngelur,

yaning nguduhang pianak.

40. Kenehé sahi incepang,

sagumi mamanggih becik,

olas hatiné gedénang,

anak ring iraga tuwi,

tekaning isarwa prani,

mangdénnya rumasa patuh,

sukayang yan anak suka,

angenang yan anak sedih,

mangdén tuhu,

awaké rumasa tunggal.

41. Bibit sayangé pamula,

apang kanti sida mentik,

kenehé manulung anak,

bani manesang di hati,

ngalih né anggon nulungin,

mangda kasidan rahayu,

tan takut manadi béla,

matindih mangardi becik,

ika tuhu

darmaning sang budi satwa.

42. Ento tingkah kasakala,

purukin sahi astiti,

munggwing ané kaniskala,

baktiné ring Sang Hyang Widhi,

kenehé apang mangilis,

teher bakti tanpa tanggu,

jiwa ragané aturang,

anggon caru manandangin,

hala hayu,

paican Hyang Murbéng jagat.

43. Yadin buwating indrya,

indryané ring wong istri,

yan suba sangkaning satya,

hidepé jati neptepin,

masih rumasa kalilih,

melah ya suba piturut,

apang da énggalan nilap,

apin indriyané ngendih,

méh mamuwun,

sarirané dadi rusak.

44. Déning tuara sabarang,

ngalahang indriya sakti,

niru ida sang biksuka,

yan tan tasaking samadi,

sangkan melahang nulekin,

pastika sajroning kayun,

yan jati kuwat tumusang,

manyukla berahmacari,

yan tan mampuh,

tan iwang mangalap rabya.

45. Apan jati twara dadwa,

batarané kasungkemin,

yan sang wiku grehasta,

madadukuhan ring rabi,

ngiyasin rambuté gesit,

waluya mangkilin pantun,

pangastawané ring déwa,

pangrumrumé harum manis,

swamban ipun,

cacingaké nunjung birwa.

46. Susuné mamulan kembar,

nyangkih puleh liwat bangkit,

punika pinaka sekar,

lépana pupuré miyik,

maganda minyak malati,

bawun sinjangé mangrebuk,

kalané bahu kungkabang,

saksat dupa lintang miyik,

liyat balut,

manatit waluya damar.

47. Aduhané kaping mpatan,

luwir swaran genta jangih,

mawisik klecontan lidah,

kalané masepsep lati,

smarané duké mijil,

saksat ajnyanané putus,

manunggal maring niskala,

tan paawak tan pabumi,

mawak suwung,

tan kahanan suka duhka.

48. Akéto bahan mantesang,

apang da salah panampi,

apan liyu rurungannya,

manunggal ring Sang Hyang Licin,

sangkan bapa mamanjangin,

bahan nanak suba luhur,

ngawitang pantes kajawat,

antuk Hyang Wirudapati,

pacang kadu,

ring sang hayu jegég nyalang.

49. Kéwala masih pinehang,

eda twara manut indik,

turunanné apang melah,

patuté paling abedik,

dwang dasa tiban né becik,

tuwuhé mara matemu,

kewala da mangimayang,

satondén mangalap rabi,

sampun puput,

tahu tekén sarwa karya.

50. Da mangutang kawenangan,

nyalanin saluwir indik,

apan yan iwang pamarga,

tan wurung halane panggih,

mangawinang sakit hati,

makawanan da mamurug,

catur wargané élingang,

ento yogya anggon titi,

sinah lantur,

réh nuwut marga utama.

51. Né maadan Catur Warga,

tegesnya mangda uningin,

darma arta kama moksa,

pidartanya siki-siki,

darma silané luwih,

tahu ring patuting hidup,

tan mangimpasin pamongan,

ngamong gama sastra aji,

sapatuduh,

guru lan ratu da tulak.

52. Ento né manjing ring darma,

artané mateges pipis,

yaning kadarmané bakat,

sida bahan manyalanin,

ulih ditu ngalih pipis,

apang twara pati purug,

yan pipisé suba bakat,

lawutang kamané alih,

sinah luhung,

kama mateges kurenan.

53. Disubané nglah kurenan,

eda bes sanget ngulurin,

demené ngadu indriya,

da engsap kén awak mulih,

mulih kajagaté suci,

suci tan palatah lutuh,

hening bresih galang padang,

ento moksa keadanin,

tegep sampun,

né maadan catur warga.

54. Disidané patuh bahan,

suka duhkané manampi,

jati kalis tan sangsaya,

bahan seken kauningin,

manahé mawak ngapusin,

ento jati bresih mulus,

ento ané madan moksa,

uli hidup élah panggih,

bareng nutug,

kayang séda mangguh bébas.

55. Amonto tityang nguningang,

pawarah sang guru nguni,

bilih beli sampun wikan,

ring aptin tityang né mangkin,

Sang Subudi glis nyawurin,

patuté beli tan purun,

nyinahang né durung sinah,

jani saking magabahin,

bahan caluh,

bani ngugu munyin rasa.

56. Mirib adi kena upas,

panah Hyang Semara lancip,

alisé nanggal apisan,

nto maméda krana sakit,

lan susuné puleh nyangkih,

kadi gili kembar halus,

ento maneteh idéwa,

kudyang nyidayang matangi,

lud kelebu,

tangkeb ombak muka bungah.

57. Tangan meros madya lengkyang,

kalud cokor putih gading,

ibungan gadung lan pudak,

katempur tan purun molih

ento nepén mwah ngalilit,

né kadi taksaka agung,

kudang bahan mangelésang,

lan pipi putih ngulapin,

peteng libut,

twara ngenah pajagatan.

58. Daging beli manyinahang,

adi kayun marabi,

Sang Sucita gelis nimbal,

tan simpang panarkan beli,

apan saksat Wrehaspati,

rumaga sarin kaweruh,

ndikapan iwang swatah,

inggih sapunika beli,

né katuju,

sok durung wénten tagonan.

59. Kéwala bawu mamanah,

nganutin alaki rabi,

pangkah minda grehasta,

nanging tambeté tan gigis,

nika lungsur tityang mangkin,

yan sampun beli mamatut,

durus pacang kamargyang,

aturé manekéng hati,

nuli nyawur,

sang Subudi sada kencah.

60. Apan tuwara larangan,

kapatut ban sastra aji,

nu madan mélanin darma,

sok adi twara ngimpasin,

kadi tuduh sanghyang aji,

Sastratmaka aran ipun,

dumadak mangda kasidan,

ditu mawarangang budi,

pang satuwuk,

masarga tong tahén belas.

61. Liyu anak masawitra,

pada nuwut keneh padidi,

twara manut kecap sastra,

ngawinang matungkas sering,

dadi mawasana ganjih,

gampang sugat dadi musuh,

awanan beli tan tungkas,

réh ngadungin linging aji,

inggih durus,

mariyang kayun idéwa.

62. Nah amonto peragatang,

dumadak Ida Hyang Widhi,

gelis manywécanin karma,

né pantes nyandang matanding,

rupa hayu budi luwih,

prajnyan tur nganggé kasadun,

tatas maring kawenangan,

tepet nganggén satya laki,

mangdén adung,

kadi Saci lawan Indra.

63. Buwaté matirta yatra,

beli suba mangitungin,

matitis dinané melah,

buwin abulan né jani,

yan tan wénten mangalangin,

jalan payu luwas ditu,

kadung nuju sasih melah,

alasé sinah ngrenanin,

sampun adung,

Sang Sucita pamit budal.

64. Bénjang semeng Sang Sucita,

lunga katukad ngararis,

nyadya manyurya séwana,

tur sampun kalaksanain,

wusané raris matangi,

pacang mapakayun mantuk,

kagét cingak sekar katah,

anyud sareng kancerik becik,

gelis sawup,

kagét wénten truni nyagjag.

65. Adeg nyepek tan pacacad,

hayu anom liwat bangkit,

éncol pemarginé nyagjag,

bau tampek janggel mamargi,

antuk wong lanang kaaksi,

Sang Sucita gelis matur,

duh déwa sang kadi bulan,

boya madu teka manis,

twara duhung

teka mangeresin manah.

66. Sakadi ring panyumpenan,

bahan tembéné mamanggih,

rupa hayu kadi gambar,

alis lancip manatonin,

daun intarané lilih,  

aas tong bani mamarung,

miwah isekar cempaka,

jerih ring ajeng imanik,

kayang bakung,

takut ring jrijin imirah.

67. I tebu cemeng tanpātma,

ngeton lambéné bes manis,

I nyuh gading klapa bulan,

kanti tuh tulah nandingin,

susun imirahé nyangkih,

kalingké entikan gadung,

bes congah yan purun nangah,

madyan iratuné ramping,

rep manungkul,

kaulanguné samian.

68. Jeneng imirah kécalan,

sangkan sendu sada gipih,

yan wantah lédang mawosang,

ndaweg ja tityang ndikain,

manawi tityang mamanggih,

sinah katur ring sang hayu,

né istri raris manimbal,

masawur rempuh amanis,

duh sang bagus,

pamurtining Hyang Smara.

69. Wyakti bas kalintang melah,

papupulan harum manis,

pantes ratun kulangunan,

turun manodyanin gumi,

maraga Hyang Smara patis,

mijil saking sgara madu,

paling mider masusupan,

nyerepang I Déwi Ratih,

sangkan puput,

bagus nyalang tan pacéda.

70. Gelis tityang nguningayang,

awinan gipih mariki,

kawit tityang ngrereh sekar,

saking pituduh I aji,

manggé ring pamujan wyakti,

polihé durung ja cukup,

sangkan malih mangulahang,

kagét angsoka kaaksi,

mangerembun,

magenah ring pinggir tukad.

71. Antuk meledé kalintang

sangkan kayatnanné tipis,

batu ganjih enjek tityang,

ring baya tan wénten éling,

ngalibeg batune kancit,

tangkejut tityang tur labuh,

sekar kanceriké lepas,

kasép tityang manyagjagin,

antuk suluk,

sangkan mariki nudtudang.

72. Iwawu kantenang tityang,

idéwa né trang mangambil,

yadyastu manyéwagara,

pamanggihé tan pasaksi,

saking waluya mamerih,

nunas lédang sang abagus,

icénin ja tityang ngudal,

anggon jwa sawitra miskin,

mangda sampun,

iaji menggah ring tityang.

73. Wiréh uning mangawinang,

paselang kayun I aji,

antuk budal patalanjang,

lungané nganggén kancerik,

Sang Sucita manyawurin,

inggih ratu sang ahayu,

sampunang malih manjangang,

boya nugi tityang lalis,

sinah katur,

munggwing drewén I mas mirah.

74. Sang Sucita manyekenang,

mapitakén sambil kenying,

cingak manis ngimpek manah,

ratu ayu liwat bangkit,

munggwing pisarat I manik,

tityang sampun tatas weruh,

ring parab durung pawikan,

yan tan wénten bes kapingit,

ndaweg ratu,

ndikayang sampunang ngubda.

75. Nika saksat anggén upah,

tuyuh nuduk kamben cerik,

pacang sungsung jroning manah,

kapetinin antuk éling,

kabaktinin siang ratri,

sang hayu gelis masawur,

tan pisan tityang mingitang,

Ni Karuni tityang kadanin,

antuk I guru,

né maparab dukuh Prajnya.

76. Dyah Parmita ibun tityang,

nanging lacur boya kari,

wénten sampun petang warsa,

umantuk ring jagat sepi,

rawuh layon nora kari,

geseng matemahan kukus,

puwunang geni adnyana,

saking wulupuhun mijil,

sangkan lacur,

ida séda tanpa sawa.

77. Minab wénten pakayunan,

kapondok tityang nyimpangin,

tan nyandang beli sangsaya,

réh tityang madrebé aji,

tepet ring brata samadi,

asih ring sahanan hidup,

durung nahan pangguh duka,

wénten adin tityang siki,

truna bagus,

wastan ipun I Sugata.

78. Nanging ipun tambet pisan,

nénten wénten uning brangti,

watek ngawé sebet manah,

tan pisan ipun nahanin,

bantas uning manyukanin,

grétéh banyol maring tamyu,

demen mengawénang girang,

tiwas ring papineh usil,

kaduk halus,

rikuh maningkahang mrekak.

79. Inggih puput sapunika,

sadurung beli ngrawuhin,

sayaga tityang ngantosang,

aturé mangimpek hati,

mababoyan cingak lindih,

mapasupati ban kenyung,

gempor rasa sang mirengang,

masriyep kadi mangipi,

rasa maglut,

maring balé pawarangan.

80. Sangkan kadi kapupungan,

sawuré tan malapanin,

mati tityang ratu mirah,

anyudang cingaké manis,

lwir blabar madu gendis,

nyunyur bawosé bes suluk,

kudyang tityang malipatan,

né mangkin tityang jeg ngiring,

da iratu,

kimud manampi titiang.

81. Dukuh Pradnyan matwan tityang,

I sugata ipah jati,

sampunang I ratu nulak,

né mangkin tityang nyimpangin,

misadya nunas I manik,

réh rabin tityang iratu,

angkepan saking niskala,

tityang Smara adi Ratih,

sih salulut,

tan pisan dados pasahang.

82. Apan jati jatu karma,

déwa tan dados ngalangin,

kalingké buta manusa,

nggih ngiring mamargi mangkin,

tityang ngungkurin imanik,

mangdén pemarginé lantur,

yan tityang padé rihinan,

bréngkat ceceh tolah-tolih,

méh katanjung,

katungkul nolih imirah.

83. Dyah Karuni osek mirengang,

wawu rumasa ring hati,

éling ring bawosé iwang,

polosé tan manut indik,

sangkanya seneng katampi,

réh caluh nyimpangang lucu,

sangkan matur taterangan,

beli sang mustikan luwih,

pineh dumun,

ngudyang tan nganggo wiwéka.

84. Kecap ajiné élingang,

napi salwir né kaperih,

sampunang puput ngaraga,

locita margiang rihin,

mangdén pikolihé becik,

saking yatna ngalih luwung,

dropon kayuné tinggalang,

réh gampang halané panggih,

bilih lacur,

ané alih twara bakat.

85. Apan sajroning pamlapan,

kapatutanné malinggih,

munggwing patuté punika,

saksat arca lintang luwih,

palinggan Hyang Maha Widi,

manyukanin sang manyungsung,

mangawinang sida karya,

sangkan punika sungkemin,

yaning tuhu,

beli misadyayang melah.

86. Tan kidik satwa nyinahang,

droponé mamanggih wéci,

kayatnané ngawé suka,

nika uger-uger pasti,

tan dados uwah-uwuhin,

yan purug mamangguh kéwuh,

punika beli pinehang,

yan tutug tityang né mangkin,

lintang lucu,

solahé tan manut krama.

87. Dyastu I aji tan menggah,

panglémek halus kicénin,

sinah manados selselan

éling ring indiké sisip,

kadi tingkah istri jalir,

ngumbara ngalih wong kakung,

yan beli tuhu paswéca,

ring tityang ituna budi,

mantuk dumun,

wusanan mangkin wilangang.

88. Sang Sucita kayuné punah,

racun kedarman nibénin,

tumuli raris ngandika,

duh Ratu Hyang Saraswati,

tuhu maraga sastrawit,

sangkan kapradnyané mulus,

pantes turunan utama,

wacanané bes ngulapin,

surya siyu,

rasayang tityang ring manah.

89. Kudyang nyidayang mamapas,

sapisan tityang mangiring,

kéwanten ratu ampura,

atur tityang jadma paling,

genin indriya ngebusin,

sangkan paling pati jlamut,

adoh saking kapatutan,

durusang tityang pisisip,

pangda caluh,

ima nampénin imirah.

90. Samalih ratu élingang,

yadin tan puput né mangkin,

sok tityang ngawit mabaja,

sarat tityang ring I manik,

sampunang tan ngalinggihin,

pinunas tityangé pungkur,

wiréh boya wénten liyan,

kanten ring jagaté sami,

sok iratu,

tingglas gumantung ring manah

91. Bilih tityang maséh gama,

pacang magama imanik,

rahina wengi ngarcana,

ring tungtung hati kastiti,

kastawa ban puh ginanti,

mawisik sulingé lengut,

Ni Karuni raris nimbal,

sampunang ja bes mamuji,

mantuk dumun,

tityang ugi pamit budal.

92. Yadin ceceh kaandegang,

Karuni ngeser mamargi,

Sucita bengong ngatonang,

lwir togog masemu jengis,

marasa suwung di hati,

jiwané kadi manutug,

Ni Karuni raris ical,

umputan pandan ngilidin,

lami sampun,

kawas ugi tan kacingak

bersambung ...........

Share: