( IDA KETUT JLANTIK )
II.
PUPUH PANGKUR
1. Sada lami Sang Sucita,
bawu éling, matuptup mangéka sedih,
srupatané deres metu,
twara kena inampetan,
dadi medal, bawosé mangajap suwung,
duh nguda iratu lagas,
mangutang tityang iriki.
2. Ring mendung awasang tityang,
ireng rambuté, masih tong enyak sabanding,
selem aksiné tur balut,
I tunjung biru ya kalah,
gili kembar, bes sipok nandingin susu,
empol penyalin lan pudak,
ngayuh ring cokor imanik.
3. Dija sé tudtudang tityang,
mangda panggih, kahayon iratu mangkin,
sundari tan ngawé lipur,
apan adoh yan sawangang,
ring wacanan, iratuné rempuh halus,
lemet laywaning angsoka,
tong mampuh nandingin pipi.
4. Aas I sekar rijasa,
bané usil, ganggu mamanah marungin,
lambéné barak tur halus,
pantes ngembahang saksara,
ya I bintang, rahina kalah matarung,
ring cacingak I mas mirah,
pakedép natonin hati.
5. I kembang traté lan padma,
tuwin makanti, ring I sasih prawani,
yan congah purun mamarung,
ring prarain I mas mirah,
sinah tulah, sekaré kucup katempur,
I bulan compéng dadinnya,
I ratu ngunggul padidi.
6. Sangkan tong ada ngawinang,
lipur manah, mangdén purna ring I manik,
sagara halas lan gunung,
kayang bungahing nagara,
nyorong kalah, marungin hayun iratu,
rep luwir kadasa guna,
aduh arah kudyang jani.
7. Sang kawi kasub prajnyan,
sinah ajerih, nyanggupang ngawi I manik,
pasti kejokan kaweruh,
kalud pangupama kirang,
yadin peseng, tri buwanané gebur,
kasor nu betén di tanah.
Iratu hayu ngalangit
8. Bilih Sang Hyang Nirajnyana,
mangutpeti, nyadya tedun manglugrahin,
tityang né anteng manyumbung,
kautaman Sang Hyang Suksma,
sangkan pragat, jegégé ngerubuh kayun,
kudyang degag nyiténdrya,
becik ngayuh ring imanik.
9. Kéwanten ratu mas mirah,
nggih da lali, ring tityang né teher bakti,
yadyan saking adoh matur,
élingé anggén mirengang,
dahat nista, sang tan males tresna mulus,
amonto panyawang tityang,
inggih icénin mapamit.
10. Tumuli mamargi budal,
belus lecig, kasabehan toyan aksi,
ragané rumasa puyung,
apan jiwané makantah,
ring sang dyah, Karuni jegég mangirut,
sangkan tindakanné ngawag,
mati capatan dimargi.
11. Sarawuhé maring umah,
jeg malinggih, mamona ngaregep tangis,
degeng kadi togog nguntul,
luwir mangranasika,
masang mudra, lwir mrayogayang sang hayu,
liyeping ajnyana suksma,
paroking Smara Ratih.
12. Ménget lawan budi rasa,
bané ngilis, nunggal maring Ni Karuni,
sangkan ipyané ngelantur,
saking jagra kaswapena,
twara belas, makaronan ring sang hayu,
rasa ring nandanawana,
masangu rasmining hati.
13. Tigang dina bratané maksa,
tan pasangu, sok smara rasa kabukti,
manginum tresna salulut,
maulam ban lengleng unang,
kanti layu, méh Hyang Siwa Smara nurun,
lugra ring sang ngineng brata,
tan pegat ngastiti bakti.
14. Sang Subudi mangkin crita,
kraséng hati, sargané baya nibénin,
awinan gelis karuruh,
kumahnya misadya nglawad,
ngatujuwang, Sang Sucita bengong kapangguh,
Sang Subudi matanggara,
Sang Sucita nolih nyapatin.
15. Sasampuné wus kasapa,
Sang Subudi, gelis katuran malinggih,
ring mambengé bresih halus,
sapuputing sopacara,
mangandika, Sang Subudi ngambil ngusud,
beli iseng krana teka,
nelokin iadi mai.
16. Kéwala kadi makesyab,
ban ngetonin, warnan adi kecud kuning,
mirib adi maan langu,
pisan polih mabrata,
tur magadang, maca kadalon ngalantur,
nah jwa adi tuturang,
mangdén beli gelis uning.
17. Inggih beli jiwan tityang,
Sang aluwih, maka ratun olas asih,
antuke tan pisan ajum,
nyimpen kapradnyanan katah,
suka ngandap, twara punyah ban kaweruh,
teka pangus ban nyolahang,
mapi beli nénten uning.
18. Nadyan bli sampun wikan,
nanging malih, tityang mahatur pihuning,
ganjihé mangawé labuh,
nyawuh tityang kaampehang,
bahan banget, angin tayunganné lemuh,
cewat kasander ban lihat,
bah katujah alis lancip.
19. Jantos ngahngah maring dada,
mangajero, sakité medah kahati,
sambyar maliyah kasumsum,
gring ngrusak jiténdrya,
sakit rahat, tan dadi tempur jejamu,
baya yan tan sang milara,
swéca nulung manambanin.
20. Cutet tityang nguningayang,
duk masiram, sangkala kambit wong istri,
jegégnya natonin jantung,
bahan banget ngurek manah,
kocap madan, Dyah karuni kasuhur,
putri Sang Dukuh prajnya,
milara tityang puniki.
21. Maring abasan kanginan,
palemahan, alas Sukawan malinggih,
tumusang lédang bli bagus,
maicain tityang marga,
sané ngantar, né ngawinang manggih hayu,
sida sadya mangeniyang,
Ni Karuni sang kaasti.
