( IDA KETUT JLANTIK )
III.
PUPUH DURMA
1. Sang Subudi sampun mastika rihinan,
nuli nyawis mangrenain,
adi Sang Sucita,
ndikapan beli manggayang,
né mula kaati-ati,
bahan sawitra,
kendel yan kidihin kanti.
2. Sujatinnya né jati madan sawitra,
tan nyangka ngetohang hurip,
ngawé mitrārta,
sakéweh bayaning mitra,
lagas bareng manandangin,
suka dukha,
pada bedak manulungin.
3. Tondén panak boya nyama dong sawitra,
anaké ngelén tan nolih,
kalanning iraga,
katibanan dukha baya,
mingkin Sang dadyan hati,
tan tulungan,
mangulah suka padidi.
4. Kéto masih yaning engsap kén tresnan mitra,
mitra nistura kadanin,
kalingké yan kakasihan,
merih patining mitrannya,
mitra drohaka kadanin,
langkung sasar,
uli hidup kayang mati.
5. Yaning saking manah nulung jati lagas,
ban daging tingkah lan hurip,
tan cara madagang,
mangajinin pitresnannya,
tan amrih purup pamuji,
nto makejang,
swamitra kaadanin.
6. Ané kéto maawak jñana utama,
anggan Hyang Datiswari,
déwaning adéwa,
kepitan Hyang Wérocana,
Budapaksané mamingit,
ibu bapa,
nyama sawitra nto jati.
7. Ento tuwah nyandang sungsung, sahi sembah,
peteng lemah nto baktinin,
solah anggén nyembah,
tan genep bakti ban mantra,
yadin sok nyangkupang jriji,
ngulah gampang,
jalan sahi pahurukin.
8. Kéto tuwah tingkahing dharma sawitra,
jalanné jani kawitin,
unduké nyaratang,
Ni Karuni sang lwir bulan,
ento rembug apang pasti,
da maimpas,
tekén ané madan yukti.
9. Sampun puput madungan raris mamarga,
rahina becik nujonin,
dauh katepetang,
menengin bagamuhurta,
pamarginé sada gati,
glising carita,
ring Sukawan sampun prapti.
10. Wus madabdab kampuh sampun katedunang,
sang kalih raris ngranjing,
maring pasanggrahan,
ngalap kasor ring sang tapa,
sang tapa gelis nyagjagin,
tur manyapa,
ring greh kacatur mirib.
11. Bagus sayang makakalih bawu prapta,
rarisang déwa malinggih,
nanging aksamayang,
genah kasar sok émbonan,
réh pondok wong tuwa miskin,
mayus ludan,
romon tan cara nagari.
12. Wus manyapa ngenjwang canang nanjénang,
Ni Karuni medal nyapatin,
cingak mintang kembar,
mapamit huwus manyapa,
ring batan angsana malinggih,
I Sucita,
sakit ngeres mengawitin.
13. Tan asuwé I Sugata sagét prapta,
nibakang cacingak manis,
smitané kencah,
manggutan sambil mangandap,
meneng rasa wus nyapatin,
bahan pragat,
tangkepé tasak manengin.
14. Sang atapa malih mangandika banban,
duh sayang bagus sang kalih,
nyén pareb idéwa,
miwah wité sakéng dija,
nyén parab sang ibu aji,
pacang nguda,
pisarat ibagus mai.
15. Yaning wantah dados idéwa nyinahang,
meled bapa mangdén uning,
yaning papingitan,
tan malih bapa nyujutang,
ane lyan anggén nyambungin,
gelis nimbal,
Sang Subudi manyawurin.
16. Duh sang tapa sang saksat surya sakala,
nyundar jagat tan mamilih,
pangkung munduk alas,
mawéh sukaning buwana,
dyastun tityang nista jati,
ndatan béda,
antuk sang tapa nywécanin.
17. Sinah katur kadi pakarsan sang tapa,
réh tan wénten ja kapingit,
munggwing désan tityang,
ring Wékreta tan lyan,
bapan tityang wus sulinggih,
né maparab,
Resi Sidanta pinuji.
18. Sang Darmika parab ida ibun tityang,
tityang mwasta sang Subudi,
puniki Sucita,
wastan ipun sargan tityang,
putran Rsi Métri kastuti,
munggwing byang,
Resi Danti kaparabin.
19. Mated matur Sang Subudi mangujiwat,
Sang Sucita séngeh nampénin,
nuli matur sembah,
duh ratu sang pangempwan,
dwaning tityang pedek tangkil,
wénten sarat,
mamitang sampura rihin.
20. Wus rumasa ring déwék kalintang nista,
tan péndah luwir sasawi,
bes pangkah mamanah,
manuncap pucaking arga,
doh ipun ibun tan pawit,
pacang sida,
pangkah nagih nyujuh langit.
21. Tityang bingung kena panah Hyang Smara,
tegeh andap tan kétangin,
nanging sang atapa,
mula meraga amreta,
juru jampi mangetisin,
sinah lugra,
ngicénin saluwir kapti.
22. Réh iratu saksat Batari Surabya,
nyuswin salwir mahurip,
apan sidajnyana,
ring balyan aswinodéwa,
gumanti juru tambanin,
manyukayang,
sang luwir sang nandang gering.
23. Wiréh mula sipating sang maha tapa,
patpat solahé kagisi,
angen ring sang lara,
manulung twara jangkayan,
purun manesang natingin,
sang alara,
tan surud ring baya pati.
24. Wahu suka yaning sang tulung wus waras,
kotaman punika sami,
tekek tan gingsiran,
malingga ring sang atapa,
séngeh tan nahanin paling,
mangalihang,
ngadungin tamban sang sakit.
25. Sinah toya kapaica ring sang bedak,
paturon yan ring wong harip,
nanging yan sang muda,
kaprajnyanan kalugraha,
tamba yan ring wong agering,
nanging tityang,
lara smara nibénin.
26. Sampun sinah ring sang tapa genahing tamba,
tan émeng adoh mengalih,
daging atur tityang,
ngalungsur putrin sang tapa,
maka sadana ngastiti,
katurunan,
budi satwa kang pinerih.
27. Mugi lédang manados putra utama,
maka mustikaning hati,
kajananuragan,
maka payubaning jagat,
lwir wandira nyamping margi,
manyukayang,
sang mémbon kuru mamargi.
28. Bilih sida mangardi kawitan lukat,
lepas saking genah wéci,
saking kértin putra,
né sida manut sasana,
nganutin sila sayukti,
ngawé suka,
kadang braya kula wargi.
29. Sapunika pidagingan atur tityang,
ratu sinah ngawikanin,
sapangacep tityang,
sawétning duradarsana,
durasrawana tan gingsir,
durajnyana,
ring sang tapa mungguh sami.
30. Sané mangkin sok tityang ngantos nugraha,
tan wénten malih manjangin,
sawétning sang tapa,
sinah wus karaséng tuwas,
sakit sang tan sidéng kapti,
lwihké yan
taruna smara nibénin.
31. Sang atapa mangandika halus banban,
Sucita nanak sang wagmi,
bapa twara panjang
yan nyak teka jag juwang,
adin cening Ni Karuni,
nah kéwala,
paradarané impasin.
32. Swadarmané nyandang agem tekekang,
tingkahing mangamét rabi,
yaning sang ksatrya,
wenang saking kaprawiran,
pamarginé ngalap rabi,
sang brahmana,
saking adung pinih luwih.
33. Masih ada pakéling bapa amatra,
mula yan smara ngeninin,
plapané hilang,
disuban yatnané ninggal
patuté kereng magedi,
dadi iwang,
mimpas né alih tan keni.
34. Gampang kroda déwéké mrasa kuwasa,
déwa Widi tan takutin,
las murug larangan,
sastra gama rompak onya,
tan takut mamangguh wéci,
Sang Hyang Yama,
makita nglawan matigtig.
35. Wiréh langah bajangé tongosin yatna,
tuwuhé sanget ngabanin,
lud makanti indrya,
sangkan bapa makélingang,
mugi cening kuwat nyaganin,
ndihan indrya,
apang da nilap muwunin.
36. Sangkan apang tangar mangamong indrya,
réh ya patis lalipi,
mupas mranén pisan,
yan kirang yatna manyaga,
nyimbuh méh baya awinin,
kéto déwa,
nah kema iadi lemesin.
37. Kadi sukan ikayu padang panesan,
molih sabeh kapat ngawit,
waye sapunika,
lédang sang kalih manunas,
wacanan ida sang Resi,
raris nyumbah,
Ni Karuni katampekin.
38. Caritayang papaduné sami terehan,
I Sucita lan Karuni,
pakembar wus ngalébang,
ayamé sami saungan,
mataji bawosé lindih,
tur mabulang,
bahan cacingaké natit.
39. Ngawit ngebug Sang Sucita ngarihinang,
tajiné matitis hati,
duh ratu mas mirah,
tamyu ja tityang ban cingak,
né ngasorang manggis agumi,
tur kenyemang,
lambéné takutin gendis.
40. Mingkin mirah elas antengé kelésang,
keni kanten susuné nyangkih,
sinah sang Hyang Indra,
sang maka déwané tingal,
Ida langkung suka trepti,
mamuktiang,
bilih ngewales ban bangkit.
41. Kalingké yan ganggu rambuté buyarang,
yadyastu tityang kalilit,
pasti satengah lintang,
malan titiyangé kalukat,
ngasorang lis kamaligi,
né ngritisang,
banyu awang toya suci.
