( IDA KETUT JLANTIK )
VII.
PUPUH SINOM
1. Wusan mapaica canang,
meneng ajahan jeg sepi,
tumuli Ida sang tapa,
mangandika banban haris,
duh déwa sang bagus kalih,
ada ké sadyan ibagus,
suba ké itunjung enyak,
pamula di tlagan cening,
mangdén anut,
ngawé sukan manah bapa.
2. Kéwala manahang bapa,
joh ya itaru rigis,
manulak patiban hujan,
né nulung mangawé etis,
miwah ipaksi belibis,
ndikapan nyebetang danu,
yan suba inyawan nulak,
maduné kalintang manis,
kala ditu,
mirip déwa kakadoang.
3. Sang Sucita matur sembah,
duh ratu sang tapa luwih,
jati paswécan sang tapa,
kedas mulus nirmala ning,
luwir Sang Hyang Indra patis,
duk nulung sarwa tumuwuh,
tan santul nyambehang hujan,
dana tan madaging perih,
tityang nyuwun,
saha banget nyuksemayang.
4. Kadi pangacep sang tapa,
dumadak kasidan gelis,
makadi putrin sang tapa,
sang saksat purnama sasih,
minab sampun manadarin,
bilih gelis nyundar metu,
lédang mapaica galang,
ring tityang itadah asih,
né manunggu,
imput petengin kasmaran.
5. Durung masan mangawinang,
sanggupé sangkan tan mijil,
nanging palilayang tityang,
dwaning tan wénten ja becik,
mamupuwang sekar wangi,
durung kebah lawut ketus,
tityang nulad tambulilingan,
san duweg mangingenin,
ngisep santun,
sasampun sekaré kembang.
6. Dyastu juwa icantaka,
sedih ngatgat sabeh ngritis,
kalaning lahru masa,
pamuput wantah manganti,
panekan kartika sasih,
ring masan sabehé turun,
sapunika pidagingnya,
sat anggén tityang ngawitin,
mapawuruk,
mekek panuncap indrya.
7. Sang Subudi sébet nimbal,
wiréh sampun kewangsitin,
inggih ratu sang atapa,
sang wibuh ajnyana luwih,
saksat Sukra Wreshaspati,
ajnyanané tan patanggu,
jimbar luwir sagara wéra,
tumusang swécané mangkin,
ring ipunggung,
né cupek luwir suwukan.
8. Surya ajnyanan sang tapa,
lungsur tityang sané mangkin,
mangdén mamanggihin galang,
tityang kaselek ring margi,
sangsaya bingung metengin,
loba kopané mangapus,
kitukan manah ngodagang,
kakosa ban irihati,
sangkan libut,
tan makanten pajagatan.
9. Sapunapi antuk tityang,
matingkah jeroning hurip,
tityang pacang luwas kija,
napi anggén tityang margi,
sapunapiang ngentasin,
napi né nyangkala lawut,
sira tityang né mamarga,
durusang tityang ndikain,
tityang nunggu,
sabuh wacanan sang tapa.
10. Sang tapa masawur banban,
uduh bagus sang Subudi,
wyakti dahat mautama,
pitakén déwa puniki,
ulih pitakén maciri,
ibagus katah kaweruh,
suba sakit mangitungang,
nyelehin sarining aji,
bilih sampun,
makelap cingak inanak.
11. Bapa saking papolosan,
suka matimbang ring cening,
nuturang pamangguh bapa,
anggén ngadabin né alih,
wiréh jati lintang singid,
suksma mengkeb satuwuk,
ngengkebin sang momo manah,
bari medal makaput ilid,
ngawé takut,
mawak kroda mangawasa.
12. Sangkan sang katunan manah,
brangti sanget salah tampi,
nyebetang sang menyayangang,
kadén musuhé pituwi,
bahané matingkah nuding,
semu marengus mamisuh,
mamatbat tur parikosa,
twara tawang anak luwih,
nyandang sungsung,
patut sembah ajak onya.
13. Sujatinnya ada nyamar,
nyilib tong tangehang gumi,
ento ané manguripang,
sarwa né ade di gumi,
nanging kéweh mamedasin,
wiréh sepi suwung samun,
tan parawat tan pamatra,
sulit saksat mamedasin,
les kangkung,
kadi agni jroning sela.
14. Bané sukil memawosang,
dyastu sang bujangga luwih,
kéweh pacang manyinahang,
apan mula mraga ilid,
tan sida ojah ban munyi,
tan bakat rikrik ban kayu,
sangkan dadi cacimpedan,
nagih séngeh sang manampi,
apan suwung,
nanging misi teka tawah.
15. Duk manahé tan mamanah,
ring budiné tan mabudi,
ring tawangé tan manawang,
ditu ida jenek linggih,
ditu ida rumaga jati,
sangkan arang anak tahu,
wiréh ida tan parupa,
kudyang medasin ban aksi,
twara tepuk,
yan tan purun ngutang rasa.
16. Ento né patut saratang,
nyandang tuju sareng sami,
ento déwéké pasaja,
ento rurung paling luwih,
ento anggon mangentasin,
nanging yan banya nu bingung,
nto masih né nyangkala,
nto mrasa tan nyandang alih,
bakat tandruh,
ban gangsar manyungglap rasa.
17. Ajahan kadi nyayangang,
laksana mirib ngemesin,
ituni kadi ngasihang,
nyanan cara ngamusuhin,
twara nyak eneh makanti,
twara seken manadi musuh,
kéto panalih sang muda,
bahan kejokan pangaksi,
né kadulu,
wantah kulit lapis samah.
18. Kadi gadebong lan bawang,
munggwing untengnya tan kaksi,
tur nyelap twara pedasang,
ban puyung kadén tan misi,
wiréh tawang twara pipis,
twara yéh twara sangu,
miwah tan wénten busana,
sangkan lyunan twara isrik,
bané puyung,
kadén pragat mawak telah.
19. Nanging yan bani ngliwatang,
palyaté buwin abedik,
medasin puyung punika,
gunannya tuara kidik,
cunguhé empet agigis,
rasanya twara luwung,
song kupingé yan sampetan,
bongol twara ningeh munyi,
ngenah ditu,
puyungé gedé gunannya.
20. Kakolongan yan sampetan,
ajahan angkyané lisik,
kéto bahan mamastika,
isin suwungé utami,
buwin talektek pedasin,
ambarané yan tan suwung
jagaté makejang rusak,
ring basa jani selehin,
tulek malu,
saking pakadangan basa.
21. Suwung
/ kedas / telah / hilang /,
puyung / bolong / mendep / bresih,
mati / suwud / miwah galang,
mated / degeng / pragat / hening,
bunter / tusing / moksa / sepi,
ento kadang basa bagus,
makejang pawakan nora,
norané buwin ingetin,
duk umungguh,
ring unduk malih pedasang.
22. Waregé yan tan telah,
déwéké manadi paling,
seduké yan twara hilang,
masih tan wurungan sedih,
gedegé yan twara lisik,
tan wangdé iraga ngamuk,
makitané yan tan hilang,
iraga kabarat birit,
kanti kipud,
batisé ngayahin kita.
23. Yaning suwud mawak kasar,
pancéndrya tan nyakitin,
wisayannya tan nyangsara,
yan mawak kita tusing,
né kitayang tan nagihin,
yan bisa manganggon suwud,
bantas bisa ngunadika,
suba sanget élah panggih,
ya sang suwud,
sujatining kautaman.
24. Imbané
diharep melahang,
ingerang mangdénnya galir,
sahi ya rasa-rasayang,
bitbit dikayuné gulis,
apang saja kanti ngarti,
tur sampé merasa lawut,
kagunanné madan telah,
misi apa ento pedasin,
réh ipuyung,
misi saluwiring ada.
25. Ilang sukha dadi duhka,
ilangé suka maisi,
ilang duhka dadi suka,
suka duhka ilangang malih,
tan wurung manadi laduh,
ilangé landuh isinnya,
nto bapa ngimbain cening,
apang tuhu,
cening ngerti isin ilang.
26. Yan kabawos ban inanak,
kotamanné madan lisik,
ditu cening mamuwatang,
suba ngelah panuju pasti,
nanging kénkén ban medasin,
kija ambah apang tepuk,
melah jani adéng-adéngang,
krana Ida Sang Hyang Licin,
sanget takut,
ring tambet katunan manah.
27. Sang Subudi matur sembah,
duh ratu sang tapa luwih,
saksat Siwa nganugraha,
wacanané mautami,
luwir angin mangangobin,
tambeté sat mendung takut,
mawinan makesyar galang,
manah tityang para mangkin,
inggih ratu
malihin lugrahin tityang.
