II. PUPUH DURMA
1. Medabdaban, I Siladeri ngantiang luwas
Somahnyané menyarengin
Tan sah menyangkil pianak
Somahné cerikan ngucap
Memargi embok pang becik
Madak lasia
Embok mangiring I beli
2. Nyai cening, Pianak méméné idéwa
Madak ida énggal kelih
Da pati mecara
Nyakitin idep rerama
Nah mai diman abedik
Pianakné binal
Dadi lega sareng sami
3. Lintang elas, Manahnya mejalan luwas
Pesu laut memargi
Liyu anaké ngantenang
Ada
bengong manyengongak
Lén ada né iri ati
Ngamokmok mangucap
Ia
ngambul tong maan daging
4. Ané patut, Manahnya nyautin nimbal
Da jua lagas mamunyi
Sikut sikutang di awak
Da patuhanga tekén anak
Lén goba lén budi
Pang ké adéngang
Da mangulah mamunyi
5. Tan kocapan, Munyin anaké ngantenang
I Siladeri tuara nolih
Manerus mejalan
Nuut réjéng alas linggah
Tan pesangkan ujan angin
Bales makécégan
Pianaknyané
ngengkak ngeling
6. Belus lépég, Ngilgilang tuwi metahar
Siladeri kangen ring ati
Laut mepasihin somah
Neraka san atma juwita
Teresnané manutug beli
Beli nerima pesan
Jani beli masesangi
7. Riwekasan, Yan sida buin numadia
Beli apang dadi istri
Nyai pang menadi lanang
Mangda sida makurenan
Ngastiti nyadia ngayahin
Beli mayah utang
Teresnan nyainé jani
8. Dadi ngucap, Né luh manyelsel pianak
Lacur san cening numadi
Mara tumbuh manggih lara
Luwih pangendaning Hyang
I Siladeri menyawurin
Eda juwa maselselan
Apan bekel manumadi
9. Mula kéto Anaké numadi jadma
Suka dukané tepukin
Kéné ko ketatwannya
Kocap Ida Hyang Iswara
Mangawé jadmané nguni
Bagus wirya sami déwa
Tong ada duhkiténg ati
10. Déning keto, Ditu Sang Kreta Bujangga
Isrik kayuné nyingakin
Raris matur ring Bethara
Punapi ratu patehang
Jadmané ring déwa sami
Becik ratu obah
Mangda wénten ala becik
11.
Kedagingan Aturnyané
antuk Sanghyang
Premangkin ida ngobahin
Rupa yadin tingkahnya
Ala ayu pada ada
Kerana tami buka jani
Suka dukané pangguhang
Kéto tatwannyané nguni
12.
Nah mejalan, Da
maren ngastitiang awak
Eda ngupet
Sang Hyang Widhi
Wiadin ké jani ujanan
Ento don kumbangé alap
Anggon nawengin I cening
Apang ja angetan
Ujané bales tan sipi
13. Sapatuduh, Né luh tuara ja manulak
Don
kumbangé kalap mangkin
Laut ia terus mejalan
Teked di tengahing alas
Madurgama tan sipi
Ditu kapetengan
Marérén di batan bingin
14. I Siladeri, Nyempél manyelélég negak
Ané luh kenyel memargi
Macepol ia di pabinan
Tuara mangerungu pianak
Pianaknyané
pules ngesil
Siladeri
tan obah
Mangastawa
Sang Hyang Widhi
15. Tuwara ada, Idepnyané kaletehan
Sakéng jati tedas hening
Né luh pules di pabinan
Buroné ya maseliweran
Pakerosok pada padingkrik
Warak singa macan
I Siladeri tuara jerih
16. Ngedas lemah, Kedisé umung masuara
Waluya manundunin
Pianaknya bangun
makesiab
Méménnyané
laut nyemak
Nyangkil laut manyonyoin
I Siladeri ngucap
Nah jalan nyai memargi
17. Matingkesan, Mejalan ya manganginang
Manincap gunung kawi
Sarwa
bunga nedeng kembang
Umung ya I tumelilingan
Rasa lega manyapatin
Tur ngalapang bunga
Pacang sekarang memargi
18. Dadi kanten, Pasramané luwih dumilah
Gelung koriné manginjil
Siladeri suka ring manah
Dadi sengkala di jalan
Somahnyané nadak sakit
Kebus buka panggang
Masih ngelawanin memargi
19. Satekannya, Jani di jaban pasraman
Né luh kaliwat tongadi
Makakeb ya di pabinan
Siladeri nimbalin pianak
Manyangkil mapepasihin
Lacur saja atma juwita
Meneng nah I mémé sakit
20. Kacerita, Mangkin Ida Empu Dibiaja
Darma kayuné suci
Manuju ida medal
Kacingak
I Siladeria
Raris mengandika aris
Ih nyén to manegak
Manguda somahé mati
21. Tengkejut ya, I Siladeri maningehang
Lawut somahé dundunin
Kakocok kebangunang
Suba lemet tanpa jiwa
Siladeri ngelut ngakebin
Nguda nyai elas pesan
Ninggal pianak kari cenik
22.
Apa ada, Pelih beliné masomah
Marepé
tekening nyai
Dadi
nyai kaliwat elas
Nyakitin
keneh somah
Somah
ané teresna jati
Yan
tuah nyai olas
Boya
ajak beli mati
23.
Yadin idup, Tan
urungan mepes yeh mata
Idupé waluya mati
Nanging beli ngerasa pisan
Tuwah mawak leteh jagat
Mabudi mengalih suci
Joh para nyidayang
Nyemak
tedas lima daki
24. Buka jani, Yan nyai enu teresna
Alih beli ajak mati
Nanging eda ko makelo
Pianak nyainé barengang
Kadung bareng ajak sakit
Pang da belas
Yadin memangguhang wéci
25. Lintang olas, Empu Dibiaja mirengang
Raris Ida mituturin
Duh Siladeri purnayang
Eda sanget maselselan
Ban somah cainé mati
Mula tuwah janjinnya
Tuara ja dadi kelidin
26. Tuwin ja kéné, Tingkahé numadi jadma
Idupé meperagat mati
Wiyadin
tingkah masomahan
Peragatné dadi belas
Teresnané ya menyakitin
Ento ngawé buyar
Patut idepé magedi
27. Dadi jadma, Indriané musuh di awak
Ento né patut perangin
Uli manah tuwi wetunnya
Di manah ditu lawan
Lawan ban tingkah yukti
Sinah ia kalah
Tong bani ia mebalik
28. Kalah indriané, ada buwin musuh teka
Tresnané mangerugang ati
Tresna ring pianak somah
Tresna ring raja berana
Ento nyandang ya perangin
Las manahé adokang
Nyapuhang tresnané sami
29. Di guminé, Tuara ada melah setata
Jelé melah tuwah panggih
Apan tong dadi belasang
Linging sarasamuscaya
Telu lokané sujati
Nista madya utama
Pada lén ditu kepanggih
30. Suwarga loka, Mertya loka neraka loka
Ento loka telu jati
Ring
suarga loka magenah
Abesik ditu pangguhang
Suka setata kepanggih
Ring neraka loka magenah
Masih abesik tepukin
31. Sakit ati, Engkak engkak setata
Kerana madan neraka gumi
Ring martya loka magenah
Saenuné ring jagat
Dadua setata kepanggih
Neraka suka tan simpang
Idupé matimpal mati
32. Suba mati, Lokané dadua ungsiang
Salah tunggal tuwara pelih
Swarga loka neraka loka
Nurut saparikerama
Ento tuwah bekelang mati
Ulah ala nemu neraka
Ulah ayu nemu swargi
33. Dadi resep, I Siladeri madingehang
Wecanan sang dibya jati
Raris ya matur sembah
Singgih sang panembahan
Sang kadi Ulan Purnami
Téjané dumilah
Ngampehang
peteng sagumi
34. Inggih terima, Puniki panembahan titiang
Tuwi manah titiang hening
Kedeh mapinunas
Pamuput somah titiang
Mangda sida ipun manggih
Pemarginé melah
Mangungsi téja bumi
35. Empu Dibyaja, Kenyem raris mangandika
Yén kéto pinunas cai
Bapa jani manuduhang
Kema cai betén kelod
Ngungsi sétra ganda wati
Ditu cai ngeseng sawa
Abuné lantasang kirim
36. Duwur kaja, Ada yéh lintang nirmala
Membah teked ke pasisi
Ditu abuné anyudang
Sang pitara terus munggah
Manuwut andus ka bukit
Ngungsi Siwa pada
Ento swargané luwih
37. I Siladeri, Cendek aturé ngiringang
Nabdabang
pacang memargi
Remba ban nyangkil pianak
Dadi kangen tekén awak
Empu Dibyaja nyagjagin
Suéca nyemakin pianak
Nah kema cai memargi
38. I Siladeri Mapamit manyembah
Manikul bangké ya memargi
Yéh
matané nerebes membah
Inget duké di pedeman
Magelut saling timpahin
Medem ngajak somah
Jani ia mengalahin mati
39. Tuwiné jani, Beli lega ngerarung awak
Apang énggal kepanggih
Buin mekaronan
Ené pangkung dalem pisan
Pejalan nyatyain nyai
Né marga liwat melah
Beli nyadia manyeburin
40. Kapiarsa, Antuk Ida Empu Dibiaja
Raris mangandika aris
Ih cai Siladeriya
Nguda kawahé buatang
Yan cai mangulah pati
Luwih kanerakan
Telung warsa tong maan margi
41. Tuwara patut, Cai nresnén somah pejah
Tuwi keneh cai paling
Palingé mawak buta
Butané tan ngenot marga
Marga né patut jalanin
Pejalané ngawag
Pangkungé tagih ceburin
42. Yén mejalan, Nuwunang mengalih kawah
Menékang mengalih swargi
Ento né dadua buwatang
Menék kelawan nuwunang
Yan tuwun énggal memargi
Yan mentas menékang
Rungka
sengka ban memargi
43. Nah purnayang Kema suba cai mejalan
Jani sawané enyutin
Pangentas pangesengan
Duwur pamuwuné jemak
Suba ada uli nguni
Siladeri ngiringang
Nyembah raris mepamit
44. Tuwun kelod, Ada pamuwunan rata
Bebataran bata maukir
Ditu sawané kaejang
Puput sampun maentas
Sawané raris kebasmi
Apiné dumilah
Saksana sampun basmi
45. Tur kakirim, Abuné menékang kaja
Yéh mumbul di duwur bukit
Suluk membah nuwunang
Abuné ditu kakutang
Anyud manerus kapasih
Lingsir Hyang Surya
Sayongé
mangelikub bukit
46. I Siladeri Raris tulak kapesraman
Satindak janggel manolih
Tuwi tindakané kambang
Serawuhé ring pasraman
Pianaknyané
ngengkak ngeling
Tur kacangkerimang
Antuk sang Dibyaja jati
47. I Siladeri Kangen kenehné ngatonang
Raris ya matur bakti
Inggih ratu panembahan
Titiang né mangkin manunas
Ngempu panyerowané alit
Empu Dibyaja ngucap
Tuwi bedak kerana ngeling
48. Nah ne jemak, Jalan alihang empehan
Apang ia suwud mangeling
Siladeri ngiringang
Tumuli raris memarga
Mangiring Sang Dibya jati
Ka tengahing alas
Tan
kocapan sampun prapti
49. Ada batu Rata di bataning kepah
Ditu Ida malinggih
Nguncarang japa mantera
Tuwi sidi sakecap
Dadi gewar parajani
Buroné padumplak
Pada teka ya menangkil
50. Singa macan, Pagerong warak lén gajah
Céléng alas bareng kancil
Kidang banténg manjangan
Pacerungung manuh pisan
I Siladeri jerih tan sipi
Empu Dibiaja ngucap
Eda takut mai paekin
51. Apan mula, Buka cai tui makadang
Saluwir sato ring pretiwi
Yén ada kasengkalan
Tulung eda mangeléngayang
Eda cai iri ati
Yan bisa olas
Pemalesné
tresnané panggih
52.
I Siladeri, Manesek
tan maren nyumbah
Empu Dibyaja ngewarahin
Mantra pangirut buana
Sih sarwa mambekan
Kauncarang sai sai
Momo drowakané eretang
Buwin eda memati mati
53. Apan ento, Tingkah
ala jelé pesan
Asing tumon pada jerih
Tingkahé dadi karana
Yan gedeg
geting timpalnya
Ring jadma jawat sato tuwi
Ring jadma jawat sato tuwi
Yan tresna matimpal asih
Yan bisa olas
54. Yadin sato, Ya bisa mangaresepang
Menampi anak asih
Kéwala bina munyinnya
Pangerasané tunggal
Keranannya dadi ajahin
Apan tui sasaran jadma
Kéto tatwannyané jati
55. Nah né jani, Bapa ngidihang tulungan
Ring kadang buroné sami
Buat ngidihang empehan
Raris ida ngandika
Iba buron sareng sami
Bapa ngidih panak
Apang sida enu urip
56. Nah olasin, Anak cerik kanerakan
Méméné suba mati
Panyonyoin dini empuang
Buroné pada ningehang
Singané bangun maningkrik
Nguwangsitin I kidang
Déning ya manakan cenik
57. Ya I kidang Manesek Empu Dibiaja
Nyadia
pacang manyonyoin Empu
Dibiaja mangucap Siladeri
kema serahang Pianak
cainé né jani I Siladeri
ngiringang Kidangé
medem manyonyoin
58.
I Siladeri Lintang lega mangantenan
Pianaké
nyusu ngelanting
Kanti
pules malelepian
Kidangé
bangun nelanang
Empu
Dibyaja ngucap aris
Siladeri
kema jemak
Pianaké nah jalan mulih
59. I Siladeri Nyemak pianak lega pesan
Buroné pada magedi
Empu Dibyaja budal
I Siladeri tan pasah
Dadi ada ebo miyik
Surya mekalangan
Empu Dibyaja manyingakin
60. Dadi mangerasa, Nyihnayang sampun pragat
Yasané ring asrami
Tuwi tong dadi andegang
Buat pasuwécaning Hyang
Pagawéné pacang tampi
Apan suba mabuah tasak
Sang menandur mengalapin
61. Dadi bengong Empu Dibyaja ngeresepang
Raris ngandika aris
Siladeri bapa mindah
Tuara ja katutugang
Tresnan bapané ring cai
Apan titah Hyang
Tuara ja dadi kelidin
62. Né bin telun, Dité wagé kerulut temunnya
Pangelong ping pitu pasti
Ditu bapa mejalan
Suryané suba ngajanang
Ngutarayana sejati
Jani bapa nyerahang
Umah lan isinnya sami
63. I Siladeri, Ningehang enek ring manah
Ngerasa lacuré tan sipi
Sing gelantingin empak
Sedih ia raris manyembah
Titiang naweg matur sisip
Ica tan ica
Nganggén
titiang panjak miskin
64. Kranan ipun, Titiang rawuh memarekan
Nyokor ring sang sida luwih
Laut nunas panyupatan
Pangleburan pataka
Punika ratu suwécanin
Nganggén parekan
Kéngin titiang ngaréwedin
65. Kalih mangkin, Pemelapan kadi titiang
Paseramane iriki
Wantah kasub saking kuna
Luwih tan petandingan
Kapica ring titiang mangkin
Dados kaletehan
Punika ratu kayunin
66. Yéning dados, Yéning tan mekrana iwang
Talerké titiang suwécanin
Tingkahé dados jatma
Magenah ring paseraman
Mangda tan iwang pemargi
Inggih nikain titiang
Empu Dibyaja nyawurin
67. Ento patut, Atur cainé ring bapa
Jani bapa ngelugra cai
Uli jani ko temponé
Sida cai mapodgala
Ené bekel tanpa bukti
Sastra tuwi dadua
Resepang pejang di ati
68.
Ne tatwannya, Meraga
Sanghyang rwa binéda
Sanghyang adu muka jati
Gecek nyandang seedang
Buatin baan adnyana
Apan tuwah kucap sakti
Meraga geni toya
Asing mala gempung basmi
69. Suba basmi, Saluwir malaning awak
Sida adnyanané ening
Eningé mawak suda
Sudané mawak sukla
Suklané Siwatma jati
Jatining suksma
Acintya suksma jati
70. Ento né perihang, Manukuh di paseraman
Upaya pasangin pengasih
Telung warna seranannya
Munyi budi tingkah
Ento patutang pang bersih
I tri kaya parisuda
Bakat suksmane gisi
71. Hyang Suksma, Astawa tuwi sadina
Awanan mamuja sahi
Patemuning yoga adnyana
Adnyanané jati sudha
Ditu Hyang Siwa malinggih
Kerana to buwatang
Budiné sujati hening
72. Kerana nirgawé, Ngadu puja budi murka
Mawéda muwatang daging
Sahi manguyeng bajra
Mangungkulang daksina
Manguncarang sloka sruti
Buwat anggon ngarad
Kakécéné apang mati
73. Saja lega, Namping pipis krépé-krépéan
Yan pules
nyapnyap mangipi
Kéwala
suba menyarik
Ngipi meték jinah
Bangun mawéda masépak
Apang énggalan
Buwaté mangitung daging
74. Manguncarang, Pangastawa mamerih emas
Suksemané tuwi mebading
Masilur ban emas
Suksemané jati ilang
Ilang baan uyak daging
Daging tong bakat
Basang
puyung nampi daging
75. Apan simpang, Né leteh kadénang kedas
Peliaté tuwi mebading
Mekaca tan perasa
Ngeranayang sad rasa
Ngulah lemuh parajani
Pules malegaran
Basangé sakit sesai
76. Yening cai, Jani sakit ada maang ubad
Jawat pacang nyimbuhin
Yan wekas kesakitan
Tuara ada nyama braya
Pacang tundén nulungin
Krana jani kenehang
Usadané bekelang mati
77. Saking manah, Krana manggih suka duka
Manahé pesu kesisi
Dadi munyi lan tingkah
Tuwi manurut di manah
Yan manahé dusta jati
Tingkahé dadi sasar
Sing munyiang dadi pelih
78. Kerana melah, Anaké mangaduwang tapa
Sadina ngilangang pedih
Melahnya
ngaduwang sastra
Sedana ngilangang momo melahnyané ngelah padiAnggon upakaraPakukuh idep merih yukti
Sedana ngilangang momo melahnyané ngelah padiAnggon upakaraPakukuh idep merih yukti
79. Kerana mayoga, Sedana ngeningang manah
Ngincepang I suduk suwari
Teriti nunggalané
Meraga Ongkara mulé
Malingga Hyang Siwa murti
Murtining adnyana
Meraga Hyang Tuduh jati
80. Sanghyang Tuduh, Tumitah suka landuh
Acintya suksma jati
Meraga tan peraga
Apan rupané tan awas
Ida né awas ring ati
Linggayang ring puja
Astawa sai sai
81. Siratin Asepin damarin setata
Pepes cakupin lima tuwi
Buat ring padma hredaya
Déwa pretista dulurnya
Kuta mantra ento malih
Upeti stiti
Pamuput prelina jati.
82. Tuwinnya keto,
Gagunané di peseraman
Nyaring idep apang bersih
Ento né madan tedas
Yan wantah idepé dusta
Yadin sai sai mabersih
Murud tur masiram
Tulya putih taluh jati
83. Ulat tedas, Pekantené putih sentak
Di jero tuwi barak jati
Yan to pingit kehéman
Sinah sembuwuk dadinnya
Apan jati tan pamanik
Keto upaminnya
Ngadu puja budi paling
84. Ne buwatang, Taluhé mesari petak
Ento dadi memanik
Maniké mawak merta
Mebayonin kerana majiwa
Awanan dadi niktikin
Mamesuang awak
Apan tuwah sujati urip
85. Pesunnyané, Tuwi
menadi kokokan
Mangindang tanpa kampid
Matinggah jalan mula
Di kayu parijata
Ento kayu utama jati
Mabuah merta
Mebayonin sejagat sami
86. Nah aketo, Resepang simpen di manah
Bapa mamekelin cai
Patut sastrané manggehang
Ento cecatun sang wikua
Yan wang sudrané kabukti
Cecatu sawah
Suka ya mangelah daging
87. Yaning pican, Hyang pertiwi ento nista
Yaning pican Sanghyang Aji
Ento luwih utama
Nanging masih tetesang
Nunas suécan
Hyang tuwi sukil
Apan merta mawor wisya
Apang bisa mengalihin
88.
Tuwinnya kéto, Pemragatnya
tuwi kukuhang
Bakat rahayuné gisi
I Siladeri nyumbah
Idepnya suka bingar
Kasuwécanan tutur luwih
Tulya petengan di jalan
Endag bulané nyunarin
89. Kacarita, Kocap sampun tigang dina
Empu Dibyaja memargi
Siladeri katinggalan
Kari mengajak pianak
Empu Dibyaja tong nolih
Manerus mejalan
Kasugian tong katolih
90. Mener kelod, Pemarginé katerusang
Gunung Tri
Srengga kaungsi
Uli ditu manganginang
Menék ring himalaya
Bengangé linggah tan sipi
Tong ada kakayunnya
Surya engseb maring margi
91. Dadi campuh, Petengé tekéning lemah
Maindehan pada sepi
Empu Dibyaja kocap
Sampun mawak prenata
Amor maring téja bumi
Suka molih suwarga
I Naya angdé apsari
92. Tan kocapan, Sang sida molih suwarga
Kocap I Dukuh Siladeri
Kari
manggeh ring pasraman
Tan maren ngajap pianak
Yan kala bedak mangeling
Ka ajak ring alas
Buron teka manyonyoin
93. Suba lami, Sawetara roras temuang
Pianaké jani suba kelih
Kusumasari adannya
Sai keurukang sastra
Makidung muang kekawin
Wariga lan mantra
Sami sampun kauningin
94. Luwih pradnyan, Ayu Anom magoléran
Waluya kadi apsari
Pantes sing solahang
Sébet mengayahin mapuja
Siladeri suka tan sipi
Manahnya mapuja
Pageh nirmala hening
95. Pasemengan Ni Kusumasari kocap
Kayeh mandus mabersih
Sambilang mengalih sekar
Iju raris mejalan
Nabdabang
pandiyangan luwih
Tur ngukup toya
Seregep saupacara sami
96.
Sampun sadia, Raris
matur ring reramannya
Bapa raris masuci
Pandiangan
sampun dabdab
Dukuh Siladeri ngucap
Nah kema kepawon jani
Jukuté lebengang
Kusumasari mangiringang
97. Lintang gupuh
Padidian di pawon nyakan
Ngeracik
basa ngendihang api
Suba lebeng mekejang
Meanteng nanding ejotan
Raris nabdabang mesagi
Mangda sampun sepan
Jerih pacang ningeh munyi
98. Kacerita, I Dukuh wus mapuja
Kusumasari nyagjagin
Tragia mengaturang canang
I Dukuh alon angucap
Bapa suba seduk cening
Kesumasari nimbal
Titiang
sampun wus mesagi
99. Sira Dukuh, Siladeri raris mamuktia
Kesumasari ngayahin
Manteng natiya negak
I Dukuh wus mojana
Nah laut medaar cening
Kesumasari
ngiringang
Tumuli
medaar aris
100. Wus medaar, Raris ia manginang sedah
Laut nabdabang nganjinin
Benang sutera kamelohan
Bikas endek kakembangan
Tuwi tuah waged mecateri
Nyongkét maguwun domas
Pradnyan sagunaning istri
101.
Kalungang lungang, Ortané
teked ka negara
Panak I Dukuh Siladeri
Jegég
pradnyan tanpa pada
Apsari tulya ring jagat
Sugih tuara ngitung daging
Madé Kérti ningehang
Maidep pacang nelokin
102. Déning mangkin, Pianaké mengpeng teruna
I Mudita keadanin
Bagus alep tur srengara
Pradnyan ring tatwa sesana
Peranda Buda mengajahin
Pepasih ida
Wirocana puputing aji
103. Madé Kérti Kocap ngawukin pianak
Somahnyané ditu nyanding
I Mudita teka kocap
Paranamya ia negak
I Madé Kérti mamunyi
Duh cai mudita
Kerana bapa mengaukin
104. Kéné tuwinnya, Né bapa maningeh orta
Reraman cainé jani
Ditu di gunung kawia
I Siladeri pungkusannya
Jani
suba mujangganin
Mengajak
pianak
Madan Ni Kusumasari
105. Sujatinnya, Ento mula pianak bapa
Né cai pianak I beli
Pecak duké
ngantiang luwas
Kema ka gunung kawia
Cai wantah enu cenik
Ditu bapa nyilurang
Cai pangentos I beli
106. Buwina ada, Pabesen I beli ring bapa
Buwaté ngemaang cai
Bungkung lintang utama
Jaga satru tuwi socannya
Bungkungang cai nelokin
Kema ka gunung kawia
Sinah tuara ketandruhin
107. Buka jani, Cai suba mawak truna
Patut cai manelokin
Apang nawang rerama
Misané dadi tawang
Kocap jani suba kelih
Bapa midep ngocékang
Sarat pacang mamuwatin
108. Dadi bengong, Méménnyané madingehang
Kangen wetu mangeling
Inget tekén I pianak
Sa duké ka ajak luwas
Mara duang oton pasti
Jani meorta daha
Tuwara ja taén tepukin
109. Tur mamunyi, Mudita nah jalan luwas
Mémé ajak manelokin
Misan cai sujatinnya
Mémé midep nagihang
Pacang
nemuang ring cai
Mémé meled pisan
Mangawénin saking lami
110. Apang pragat, Utang méméné ring pianak
Manelahin dakin gigi
Buwin tuara ada lénan
Né
nyandang pacang saratang
Né muwani nimbal mamunyi
Ento patut pisan
Jalan luwas
tagih jani
111. I Mudita, Jani ia anggon siap
Adu ka gunung kawi
Tetandingan ring misannya
Metaji baan liyat
Mabulang
ban kenyung manis
Nyai ditu ngembar
Beli nyadya menyayanin
Bersambung .....
