( IDA KETUT JLANTIK )
VIII.
PUPUH GINANTI
1. Mirib suba liyu tahu,
Kadi né mungguh ring aji,
jatin sangsara punika,
wetu saking tingkah pelih,
pelih saking ketambetan,
tambet dadi dasar sedih.
2. Tambeté ngawinang lacur,
bulak balik manumadi,
bingkih malahibin duhka,
dekah nguber sukan hati,
ngalih hidup mati bakat,
ngalih bajang tuwa panggih.
3. Tambet tan lyan puniku,
dadi kranan sami-sami,
krana jenged kadi jantra,
suka duhka malinder panggih,
jani sedih nyanan girang,
suwud girang sedih malih.
4. Yan banya nu tunggun hidup,
liyu tegenang dihati,
nanging yaning suba tuwa,
kisut cengkud kalud sakit,
angkihan mamegat-megat,
apa né tegenang malih.
5. Pamuputnya mati bungkus,
kakencané telah ledis,
twara ada buwin kandayang,
kabelet payu negakin,
tumbén jemet nyak manyerah,
naros twara makelatin.
6. Acepanné kudyang hiyu,
megoh nanggu séket keti,
makejang tondén kasidan,
puput nyerah ngaba gering,
geringin salah acepan,
bek maisi sakit hati.
7. Jumunin dumadi tudtud,
nudtudang edoté nguni,
demené maawak bangkaan,
anggon ngalih né demenin,
nanging pragat dadi nungkak,
mati enggalan nyagjagin.
8. Ping séket jantos ping siyu,
bulak balik manumadi,
ngubungin pakitan manah,
kadén iya bisa trepti,
suba satak nagih domas,
suba siyu nagih aketi.
9. Pamuput tan tahén cukup,
nandang, kuwang sahi-sahi,
kadi pasih nyolo tukad,
lwir agni maksa lengis,
sahi embuh sahi kuwang,
tan sida antuk ngenemin.
10. Tan pawatas tan patanggu,
kitané sahi nagihin,
yaning tan wénten kasidan,
sinah dadi sakit hati,
ibuk sedih manyangsara,
masih tambet manasarin.
11. Suba tingglas twara kamur,
tambeté pukuhing sedih,
sangkan buwatang alihang,
tamban ipuné sujati,
tan lyan kawikanan,
nto tambannya jati pasti.
12. Ané madan wikan iku,
bisané mangawé galir,
ngadayang muwah ngilangang,
salwir né ada dihati,
hala hayu suka duhka,
ngunadika
apang uning.
