( IDA KETUT JLANTIK )
VI.
PUPUH GINADA
1. Beli bagus Sang Sucita,
tityang I Sugata tangkil,
ngaturin beli ngajengang,
wiréh sampun wengi langkung,
bawosé ngiring sapihang,
mangda polih,
nyangih taji mangawitang.
2. Bin pidan malih wéntenang,
kaklecan malih kawitin,
nanging tityang mangahapang,
ayam tityang dyastu buruh,
wiréh ipiyanné rusak,
ampeh angin,
campakan titiangé ical.
3. Nangingké sampunang duhka,
tityang demen guyu beli,
I Sucita raris nimbal,
aduh adi sang abagus,
jani beli iwang pisan,
ngarihinin,
beli matur ring iraka.
4. Wantah adi sampun sinah,
tan wénten pacang ndukain,
wiréh tasaking kadarman,
twara santulin ban unduk,
nangingké né madan iwang,
manggeh pelih,
dyastu ja tan kapiduhkan.
5. Pamuput nunas ampura,
réh durung nunas ring adi,
kedusan kayuné galang,
ngawinang beli tan santul,
kalud indrya mingungang,
krana beli,
lali matur mapinunas.
6. I Sugata matur nimbal,
sampunang beli manjangin,
wiréh sampun sami galang,
kayunné manampi kayun,
pacang napi rawos ragrag,
né tan parti,
yan dasaré twara suka.
7. Malih tityang manguningang,
manah tityangé sujati,
bedak tityang maduwé ipah,
né wikan tur darma sadu,
agenan tityang malajah,
mangdén sering,
tityang ngiring mangonjakan.
8. Bilih Ida ajin tityang,
ugi tan lyan kaapti,
wantah mantuné utama,
wruhing sastra gama iku,
tepeting sila gunawan,
twara ngingsir,
manggeh bakti ring Hyang Titah.
9. Sami telebé ring sastra,
miwah penampéné tunggil,
panujuné ugi tunggal,
punika panegulan kukuh,
tingkahé maipah matwa,
apan tunggil,
jiwané nyelir sarira.
10. Nika ngawinang tan belas,
jiwané sahi manunggil,
kadi pacampuh akasa,
tan dadi pegat satuwuk,
yadin sarirané belas,
tileh nyiki,
wiréh pangrasané tunggal.
11. Wantah kaweruhé tunggal,
ngawetuang rasa tunggil,
rasané tunggil ngawinang,
srirané sering mapunduh,
yaning kaweruhé tungkas,
sinah sulit,
pacang ngatepang sarira.
12. Masih muwuh manekekang,
yan anteng saling unyain,
mingkin tangeh tekén goda,
tahu ring kesaktén unduk,
sané kuwat mamalasang,
nto kabasmi,
bahan tatasé ring tatwa.
13. Sayan kuwat manekekang,
maipah mamatwa wyakti,
tuwin manyama beraya,
masawitra maji ibu,
yan barés mawéh ampura,
ring sang pelih,
mingkin twara ngawé iwang.
14. Arah tityang ngocoh pisan,
sagara bakat tasikin,
janjan ngucap tidong melah,
dyastu bawosé patut,
swéca beli ngampurayang,
tityang alit,
mula kirang unadika.
15. I Sucita malih nimbal,
rawos adi lintang luwih,
muwat tigang kautaman,
dasar lantaran panuju,
punika patut samian,
tur nyukanin,
banget beli nyuksmayang.
16. Jati wantah arang pisan,
sang nyidayang kadi adi,
patut mula dadi dasar
panujuné tuwi rahayu,
kalihné kanggén lantaran,
ugi becik,
amreta sanjiwani saksat.
17. Katah anak kadroponan,
ajum ngangken ngardi becik,
nanging satak ngingsak ayam,
boncos nulung pitik puwun,
tur madasar manah punyah,
dong meludih,
né kéto tan nyandang tulad.
18. Sangkan sanget bli ngajumang,
sakadi bawos iadi,
rawosé dahat utama,
adi mangguh pala hayu,
beli suka madingehang,
mirib adi,
paragayan Sang Hyang Dharma.
19. Sang Sugata sébet nimbal,
wantah solahing sang luwih,
né pradnyan ébeking naya,
tan paling ngalih pangajum,
tétéh pangus ngawé suka,
sang miragi,
nyusup ngawé wareg manah.
20. Jiwan tityang rasa ruwat,
manuncap swargané luwih,
késah saking wéci désa,
lukat bawos béli bagus,
ngritis sat tirta utama,
nanging jati,
tityang tambet ludin nista.
21. Inggih jwa beli puputang,
ngiring marayunan mangkin,
sodané alal ngantosang,
dot rayunang beli bagus,
wiréh sinah pacang lukat,
dados jadmi,
yan sang utama ngajengang.
22. Tamyuné sami ngajengang,
Sang Sugata tansah ngiring,
mangan tan mamona brata,
itep sambil ngrawos ditu,
bawosé marupa éndah,
pada wagmi,
mapo teleb mapo ica.
23. Sang Sugata manyorogang,
kakuluban dawun anti,
saha kenyir manguningang,
niki anti wastan ipun,
yan niki sering ajengang,
kocap becik,
doyan kéman ban batara.
24. Yaning piduh rayunang,
matah wiadin ratengin,
punika kocap ngawinang,
mangentikang kayun luwung,
sadu darma kapiwlasan,
hea malih,
ngawinang teleb ring tatwa.
25. Yan ngajengang tan pauyah,
punika kalangkung becik,
ngawinang pageh ring manah,
ngawé jenang ikacarum,
yan galitik manakonang,
tan kidikin,
rayunané ngawé melah.
26. Makadi Ida Sang wikan,
teka gampang ngalih luwih,
dawun-dawunan ngawinang,
banget nulung ngardi luwung,
réh uning milih ajengan,
turin apik,
tan sabarang karayunan.
27. Yan kreng ngajengang kakara,
kocap tan ngawinang becik,
banget ngawé butek manah,
ngejohang cedanging kayun,
mangentikang budi tamah,
kirang becik,
becik kidikang ngajengang.
28. Sang Subudi raris nimbal,
beli banget mamisinggih,
saja tuwah ajeng-ajengan,
banget ngawé hala hayu,
makrana ragané waras,
krana sakit,
rayunan tuwah ngawinang.
29. Yan racun bakat ajengang,
awaké tan wurung mati,
yaning amreta ajengang,
seger waras bakat pupu,
yan déwéké karusakan,
bareng sakit,
kenehé twara buwungan.
30. Dadaharan ané melah,
ngawé kénak raga pasti,
ragané waras ngawinang,
kayuné manadi landuh,
saking kalanduhan manah,
buwin mabalik,
ngawetuang raga waras.
31. Awinan ida sang pradnyan,
marayunan sanget apik,
nginganin yogya tan yogya,
nyén sanggup ngajengang racun,
mangdén tan nyakitin manah,
bes nyejehin,
yén ada bani nyanggupang.
32. Jatinnyané madan manah,
ganjihan sanget ring angin,
kaling tempuh dadaharan,
kudyang mangentegang kayun,
bantas sanding sebeng rusak,
suba sedih,
magejulan mangogah awak.
33. Ento krana nyandang yatna,
pepangananné pilihin,
tondén nyandang mangandelang,
ngelah kekuatan kayun,
nagih ingerang dimanah,
pangda pelih,
degagé kadén wisésa.
34. Yan banya api pasaja,
ngudyang takut nunjel cetik,
nanging yan buka gedebong,
da ja pangkah ngasén teguh,
degag nantangin keléwang,
tulus iding,
pegat kesampwak sapisan.
35. Apang bisa ngaba awak,
ngadungang ring salwir indik,
kénkén bahan matindakan,
ambul apa sandang suhun,
teked dija malu garap,
nto ingenin,
apang sukat asedengan.
36. Sedeng becik wus ngajengang,
sang tapa sampun manganti,
maring balé petamyuan,
sang kalih manangkil sampun,
I Sugata twara belas,
ugi ngiring,
pedek ring sang pangempuan.
