( IDA KETUT JLANTIK )
XII. PUPUH DURMA
1. Sang
Subudi
kenyem tur masawur getar,
duh kaki sang yaksa sakti,
sangkan cucuné teka,
mai nyadya maingetang,
ban kaki nyakitin gumi,
nah dumadak,
kaki nyidayang nyalinin.
2. Wiréh
tondén
ngenteg dijatinin tingkah,
ané madan sila yukti,
déning kadroponan,
awakin momo angkara,
sangkan mamahak mamaling,
mangawasa,
sahasa mamati-mati.
3. Twara
pesan
ngelah angén miwah sayang,
ngulahang suka padidi,
nah juwa suudang,
I raksasa gelis nimbal,
nunas pangampura rihin,
antuk pekak,
kadi congah manimpalin.
4. Kadi
banget
ngawé tengkejut di manah,
mirib bes sanget tungkalik,
né tindihin pekak,
melah pekak manuturang,
ané mula kasungkemin,
cucu nimbang,
né iwang pacang kutangin.
5. Kehangkaran
dadi dasar sasungkeman,
ditu Hyang Hurip kastiti,
réh ento wisésa,
ngodagang saluwir ada,
yan ento pada tidongin,
tan wurungan,
bangkrut sasar jroning hurip.
6. Wiréh
ida
hyang angkara tanja liyan,
né ngréka guminé sami,
uli ditu medal,
kema masih pemulihnya,
krana patut nto baktinin,
peteng lemah,
tur apang yatna dihati.
7. Yaning
pageh
bakti maring Hyang angkara,
sinah sida asing kapti,
nanging tan sabarang,
anaké pacang nyidayang,
nindakin bakti astiti,
ring hyangkara,
apan godané tan gigis.
8. Kama
Arta
Kawiryan lan Kakasuban,
ento wekasing utami,
anggon pangabaktyan,
Hyang angkara mangda suka,
yan ento padé tidongin,
sinah menggah,
iraga kapongor sedih.
9. Nto kranannya
Patpat né patut limbakang,
apang da katunan bukti,
mangda trepti suka,
Hyang angkara né malingga,
ring angga sarira mukti,
Kama Arta,
Wirya Kakasuban malih.
10. Mangdén
gampang
makatang nto maka patpat,
artané ungsi pangrihin,
ento saksat tlaga,
Kama Wirya Kakasuban,
mawak ulam katak patis,
sinah teka,
tan buwat ya kanti alih.
11. Nanging
sinah
Arta né nto kadat bakat,
yaning twara kedasarin,
bahan tingkahé patpat,
Purusa lan Parikosa,
Nastika muwah Kasaktin,
réh punika,
patut agem jroning hurip.
12. Ané
madan
purusa nto jani artyang,
baniné twara mamilih,
bani ngrampas arta,
ané mula twara gelah,
bani ring sang manindihin,
tur mihalang,
dastu karebut tan jerih.
13. Miwah
ané
maadan kaparikosan,
twara angen twara sedih,
tekén sang karampas,
teka lagas ngampok ninjak,
ngaplukin bahan gagitik,
nusuk munggal,
apan tan sayang dihati.
14. Sapuniki
sané mawasta Nastika,
tan nyak pati gugonin,
mingkin ané nu samar,
kadi kecaping agama,
kocap pacang nraka panggih,
yén manyorah,
Hyang Yama kocap nyakitin.
15. Sang
Nastika
tan ngugu swarga nraka,
mingkin karmapala malih,
wiréh kapastiang,
ento tutur anak mokak,
anak bes lebihan jahil,
suba bangka,
bakat bannya majejehin.
16. Kasaktyané
ento buwin kategesang,
kuwat di tengah di sisi,
luput ring senjata,
bayu pramanané kuwat,
sabda lan hidepé sidi,
nggih punika,
né mula sungkemin kaki.
17. Ento
krana
kaki tuara jangkayan,
mamahak mégal mamaling,
ngalih rajabrana,
makadi muwatang pangan,
asing ané kacumponin,
tan sangsaya,
nyambal jadma nyérét getih.
18. Yan
kasidan
ento jatining kotaman,
jaba jero manggih
luwih,
basang wareg lega,
keneh lan pangrasa suka,
apané buwin itungin,
déning pragat,
suka bungah wareg sahi.
19. Yan
sang getap
takut mamahak mamégal,
dulurin hatiné ganjih,
jejeh manyahasa,
mamungal nyempal manglanjak,
aduk sayang gagang giging,
kanti duga,
magawé tuyuh mauntit.
20. Megoh
apus
déwéké akuang swarga,
rambangang ragragan lengit,
kendel ngamah kocap,
pacang swarga yan tan nyorah,
miwah tan mamati-mati,
bes gugwan,
awaké tulus ngadesit.
21. Bané
gerap
duweg madalihan ngéndah,
dalih pelih sang mamaling,
baané takut katara,
kimud adanina dusta,
runtag yan ngelémpagin,
sang ngelahang,
sakit ketugé mabalik.
22. Kaki
tatas
tekén kawruhan pandita,
mula demen makenta sering,
bané bes resepan,
tekén tutur samah kocap,
asing angkuhang madan plih,
sarwa nraka,
di kaditwan kocap panggih.
23. Bes
ngliwat
paliaté joh sangah,
ané pahak tan pedasin,
bangbang manyungklingang,
lihaté jelap sawatang,
ané tong ade pedasin,
tulus bangka,
bregugwané ngawinin.
24. Né
idéwa
masa ké tan pawikan,
sangkan praratuné nguni,
molih kakasuban,
takutin Tri Bhuwana,
déwa buta rep ajerih,
kaling jadma,
makkakeb takut mangili.
25. Masih
tumggal
manadi dasaring yajnya,
twah angkara kastiti,
mayadnya ban yuda,
mapuja gregehan jaran,
lan swaran gajah padati,
mabajra ban
suryaké ngébekin gumi.
26. Masekarura
ban tumbak panah lan cakra,
magandaban rah ngudadi,
sahanan sasocan,
ané kelés saking busana,
ketes tempuh pedang keris,
maka wija,
madupa abuké ngliputin.
27. Agni
murub
nyeleg muwunang nagara,
maka padamaran suci,
bangké pajulimpang,
macahcah lan saling sempal,
nto pinakang banten suci,
madaksina,
ban rampasan ratna manik.
28. Apan
nista
sukané ulih kurenan,
madya saking ngipil-ipil,
mamacul ngulak-ngulak,
sukané ulyan ngrampas,
ngadokang angkaran budi,
marikosa,
ento wekasing utami.
29. Yaning
darma
sahi sangsaya di manah,
megoh ganjih melas hati,
jejeh ya neraka,
bangkéné patakut goyal,
dalih pacang manggih wéci,
yan madusta,
ngugu munyi tan pabukti.
30. Teka
kodag
awaké kenta bulanan,
ban twara ngelah telengis,
adanin mabrata,
akuang suka makasan,
né pidan sop dahar jani,
daharang jengah,
kocapé anggon ngecapin.
31. Kaki
masih
ngelah angén miwah sayang,
nanging tan salah pangungsi,
sayang tekén awak,
teked tekén ubuhan,
pyanak somah minakadi,
ento pyara,
réh dadi amongan kaki.
32. Ento
krana
sangkan kaki mangulahang,
ngalih rajabrana sahi,
anggon myara awak,
somah pyanak mwah ubuhan,
bojog kedis minakadi,
réh amongan,
nging tan sabarang olasin.
33. Ada
sisa nto anggon sepelan,
maka yasa ring icening,
apang suka bungah,
suka manahé ngatonang,
muwah anggon bekel diuri,
kala tuwa,
inganan tan mampuh ngalih.
34. Nguda
onya
anaké tulung sakitang,
tong nawang darmané hurip,
awaké matiang,
anaké lawut hidupang,
unteng hatiné moyanin,
sanget sungsang,
kawaruhé nyangkala diri.
35. Pidaging atur
kakiné ring idéwa,
né jati sungkemin kaki,
ngulah suka sekala,
huripé apanga suka,
tan ngétang kayangé mati,
réh sang pejah,
bantas bangka tekén nengil.
36. Suba
mati
seken twara ngelah rasa,
budi manah twara kari,
nguda buwin dalihang,
bisa ngrasa suka duhka,
buduh ortané gugonin,
né sakala,
pangguh lawut nto boyanin.
37. Duh
sang kalih
sok kaki polih nguningang,
né kasimpen jroning hati,
nanging ampurayang,
nawi wénten lepit iwang,
pamuput kakiné mangkin,
nyadya nunas,
sabuh wacanan sang kalih.
38. Sang
Subudi
masawur getar tur banban,
tan mari semuné manis,
duh kaki sang yaksa,
iyang banget mangajumang,
ban kaki séngeh dihati,
tuhu prajnyan,
kuwat mangitungin indik.
39. Mirib
kaki
suba manyelehin satwa,
sastra Wéda wus kagulis,
tur suba mabuktya,
kaki sampun kretayasa,
polih panugrahan luwih,
sakéwala,
panampiné ada lepit.
40. Réh
suksema
daginging sastra agama,
tan gampang pacang manampi,
yan tan paguruwang,
makadi yan tan kaswécan,
antuk Ida Sang Hyang Widi,
bisa sungsang,
kawuhé kadén kangin.
41. Kaki
ngadén
angkarané patut sembah,
ulih ditu dasaré pelih,
wiréh I angkara,
mawak tukang pancing prajnyan,
mamarenang kasukan gumi,
silib pisan,
mapancing ban duhkan hati.
42. Asing
anak
nyak nyanggem kasukan jagat,
ngambah pancing perihati,
ring arta buktiang,
duk ngalih kéwehé dahat,
suba bakat kéweh ngemit,
miwah ngaba,
jejeh rusak miwah lisik.
43. Dikénkéné
maling teka manyengkala,
sang ngraksa bareng ngemasin,
yadin duké telah,
ulih saking kapatutan,
mingkin momo ngawinang lisik,
nyelsel pisan,
dadi sakit jroning hati.
44. Ento
krana
Ida Sang Maha Pandita,
sang uning madalem gumi,
mawéh paplajahan,
ngatarayang I angkara,
mawak tukang sunglap ririh,
singid pisan,
kéweh pacang sida uning.
45. Pangrasané
ngerasayang ngelah awak,
ento angkara kadanin,
ento né ngadakang,
hala hayu suka duhka,
tuwin malinder sahi-sahi,
an patanggwa,
ané kawengku ban sedih.
