( IDA KETUT JLANTIK )
IV.
PUPUH DANGDANG
1. Aduh ratu mas mirah sang luwir ratih,
nyundar galang,
etis kadi amreta, panglukatan taruna sedih,
boya saking tityang nyumbung,
ban tembé tityang manggih,
jegég sekadi imirah,
pantes dadi pasar caksu,
jantos wénten kasangsayang,
manah tityang,
selang ring déwek mangipi,
yan bangun méh mirah ical.
2. Yan upami wyakti tyityang mangipi, méh imirah,
rabin Hyang Iswara,
maraga Hyang Giriputri,
né nyandang kasembah suwun,
iratu mula kapuji,
apan déwaning adéwa,
maka minyaking tutur,
sarining yoga brata,
nggih dumadak,
iratu lédang nampénin,
menganggén saksat bukpada.
3. Boya ugi iratu sang sekar wangi, pacang nulak,
tityang isadpada,
né mider nyerepang miyik,
buduh badudané wukut,
bes mangawé salah indik,
sakadi witning pinang,
ndikapang manulak gadung,
né suka nglilit nyaratang,
ngawé bungah,
ngaturang bangkit lan merik,
sigug yan ngantos bun petak.
4. Daging mangkin tityang matur mangawitin,
ring imirah,
kedeh mapinunas,
dumadak lédang nampénin,
mangdénnya imirah puput,
ngodagang tityang puniki,
anggon juru manupdupang,
nyisinin sambil mangelut,
dyastu kala imirah,
kahongkeban,
tityang séngeh mangilihin,
nyutsutin karingat muka.
5. Tityang suka yan mirah pungkur nyarengin,
kala menggah,
réh sampun ngapalang,
pangrumrum pamurnan hati,
sampun mabukti ping siyu,
manglebur ibuk brangti,
kudang-kudang kakarangan,
kawiraja sané kasub,
kaketus sampun karambang,
satus pada,
cara swarga turah iriki,
mangkep sampun kapastika.
6. Kala uyang tan sida merem digelis,
kari gampang,
dipabinan ngebah,
tityang sanggup magadangin,
sambilang nyosohang rambut,
kaduk manglawut manyiksik,
ngiras nyangkrimang imirah,
mupah kapah ngurut susu,
ngicalang laad lamad odak,
tur mantesang,
ncén ané sandang usudin,
ratu jeg meneng manggayang.
7. Tityang tanggung mayasin mangdén becik,
tan pacacad,
polos papatutan, nanging sanget nudut hati,
asing ngeton dot maniru,
tityang kasub uling alit,
mula juru payas koptah,
prakanggé dipuri agung,
saking duweg mamantesang,
tan méndowang,
nguwah nguwuh malih kidik,
puput dados tan pacacad.
8. Inggih ja ampakang lambéné manis,
né waluya,
korin Hyang Iswara,
né maraga bawos inggih,
né muwat arti pasanggup,
medalang tuntun ban kenying,
réh sampun sami sayaga,
Catur Lokapala nunggu,
Hyang Indra dimatan tityang,
Hyang Kuwéra,
ring karna alal manganti,
ring irung Sang Hyang Baruna.
9. Sang Hyang Yama ring cangkem,
tityang manganti,
pacang nyanggra,
kusung kahiringang,
ring utek katurang linggih
kastawa ban gurit kidung,
kasepin ban girang hati,
madamar ban manah bingar,
mawisik éling satuwuk,
inggih sapunika mirah
raris nimbal,
Dyah Karuni manyawurin,
gagebugé tangar pisan.
10. Bawos bli kalintang-lintang mamuji,
lwir merasa,
napak Budaloka,
keburang wacana bangkit,
tegeh ngolété kalangkung,
mangawénang res dihati,
réh tityang kalintang nista,
bocok kalud lintang jugul,
tan wruhing tatwa kanda,
kapetengan,
nanging ké tan salit tampi,
réh tityang kapihutangan.
11. Sané pidan duk tityang tulungin bli,
manudukang
kancerik punika,
durung pisan tityang lali,
nanging ké bes ngencot langkung,
yan déwék tityang kaambil,
banget pisan joh sahimbang,
pican beli lintang agung,
déwék tityang langkung nista,
bes ngatimang,
ngawé kapok sang nulungin,
ngudyang sé capungé lawar.
12. Mangkin tityang mapidaweg ring bli,
matur ngawag,
manguningang wreta,
antuk manuduk ring margi,
yan rabi sané katuju,
laba nista kawastanin,
yéning kasugyan saratang,
madyama laba kasengguh,
nanging yan merih sawitra,
mautama, nika laba pinih luwih,
sangkan ngiring masawitra.
13. Ngudang buduh ngutang swarga ngalih wéci,
sanget tawah,
milih né jelékan,
né melah twara cumponin,
banget ngawé anak bingung,
pineh ja beli kawitin,
minab kari kirang waras,
kirang nimbang langkung napsu,
petengin lawat indrya,
dong bes bas ja,
Hyang Smara kasub pacadi,
tan milih nyangkala anak.
14. Minab sering bli ngajengang kopi,
durén ulam,
sangkan banget galak,
indryané ngusak-asik,
lwir yaksa sakti ngamuk,
becik tuba ban keladi,
punika sering rayunang,
mangdén indryané enduk,
madyané sering leblebang,
mangdén jenang,
kayuné raris tambanin,
bahan sarwa tatwa kanda.
15. Tan paguna sugihé ring idemit,
masih nirdon,
antengé anggurang,
tan muputang karya kidik,
nirdon ugi bli bagus,
beli kasub prajnyan wagmi,
yan tan manyaga indrya,
awinan kawitin bangun,
ngudyang labuh bwin kakebang,
dadi suka,
mamanjak ring satru jahil,
indrya musuh ring kaliliran.
