( IDA KETUT JLANTIK )
X. PUPUH GINADA
1. Kagét
sampun abang wétan,
ngandika Ida Sang Resi,
amonto malu pragatang,
buwin pidan jalan sambung,
bapa merasa kirangan,
ngajak cening,
mabawos magagonjakan.
2. Cening
apang masih maan,
sirep ajahan né jani,
adin cening I Sugata,
mangdén ngiring merem ditu,
bapa masih kuru negak,
jahan malih,
suba ngantin bapa ngarga.
3. Gelising
carita kocap,
pada makolem digelis,
ajahan sampun semengan,
sang merem sami mawungu,
gelis masiram ngastawa,
Sang Hyang Rawi,
puputing saupacara.
4. Puputé
manangkil muwah,
ring Ida Sang Maha Rsi,
misadyang pacang mamindah,
makadi ring sang ahayu,
sampun tangkil ring sang tapa,
matur pamit,
tan kirang ngawénang suka.
5. Pedanda
raris ngandika,
bapa twara mrasa iying,
katinggal bahan idéwa,
kantun rumaket ring kayun,
nanging dyastu sapunika,
jani ngawit,
muruk nahan sakit belas.
6. Dumadak
lantur mamarga,
tur énggal bwin teka mai,
nah kema cening morahan,
tekén I adi sang hayu,
apang da nto dadi cara,
crita gelis,
ring sang hayu pamit budal.
7. Tan
panjang kacaritayang,
sang ninggal lan katinggalin,
pada sarat muwat unang,
kayunné ngalawan kayun,
méh malilit jroning rasa,
twara kaksi,
sok linuh ngendas diraga.
8. Pada
duweg nanem rasa,
nanging ring aksi maciri,
kadi agni ring tabunan,
andusnya kanten makudus,
dyastu kayunné ngedetang,
nging dibibih,
kalis pangrawosé lagas.
9. Pamuput
atep di tengah,
payu mablasan di sisi,
kadi pegat katik jarak,
getahnya enu mangatut,
gelising carita kocap,
wus mapamit
ring I Sugata tan lupa.
10. Raris
matur I Sugata,
dumadak patinggal beli,
kadi pakésah Batara,
matinggalan teduh landuh,
munggi mangda sapunika,
sang ninggalin,
keni sané kaacepang.
11. Sasampun
beli matinggal,
tityang pacang maca tulis,
tulisané jroning manah,
manah imbok sang hayu,
né rawit misi karangan,
solah beli,
sering pacang ngulgul tityang.
12. Sadurung
beli mamarga,
paicain tityang gurit,
né mapupuh Smarandana,
dyastu pitung pada cukup,
né nyatwayang cakrawaka,
kala sedih,
tinggalin manuk déwata.
13. Nggih
beli margi durusang,
ampura tityang ngulgulin,
sang hayu kanti kémengan,
bulak balik nabdab semu,
pongah kimudé madukan,
kanti kabilbil,
jantos kasép manyaruwang.
14. Sang
Sucita kenyem nimbal,
nah jani beli ninggalin,
kéwala adi Sugata,
preténin sekaré harum,
mangdénnya digelis mekar,
medal sari,
né miyik mabur mimpungan.
15. Ring
rawuh I tamblilingan,
malih apisan mariki,
mangdén napet panyambrama,
sekar kembang masari rum,
mangda wénten isatpada,
megat langit
ngeburang sari ngatut lawa.