( IDA KETUT JLANTIK )
V.
PUPUH SINOM
1. Ndaweg tityang mapinunas,
ngalemesin beli mangkin,
laba utama saratang,
masawitrané sungkemin,
yan tityang ngiring marabi,
runtiké pacang mapatung,
wiréh angkarané medal,
paturu saling angkenin,
selir palsu,
réh ngangkenin twara gelah.
2. Olih pengangkené medal,
kenehé ngodag tan gigis,
saking kayuné mangodag,
ragané mrasa bupati,
bahan rumasa ngagungin,
pada tan suka kauduh,
sami nagih mameréntah,
yan tungkasin dadi jengis,
méh mananjung,
paling kidik dadi jaljal.
3. Dadi sanget mapangenan,
peréntahé katempalin,
ulun hati magejulan,
tumbén katélér ngagunin,
bas ahatan uling nguni,
bwat ngelah panjak tutut,
dadi gring salah acepan,
suka padem yan tan ajerih,
sanget kalut,
puput sedih kakeniyang.
4. Ngalih sukan makurenan,
patuh san ring manyagjagin,
lawat kakelik mangindang,
nika tutug ngalih etis,
engsap tekén peluh pidit,
etis ganjah bakat ruruh,
awinan beli pinehang,
tityang matur saking jati,
pineh dumun,
dadi wisya sengguh amreta.
5. Sangkan ngiring masawitra,
sareng muruk ngalih jati,
mangda kadi Kresna Arjuna,
saling jaga metoh pati,
akéh labané kapanggih,
saking pasawitran metu,
lebih suka kirang duhka,
langkung untung kirang rugi,
beli bagus
sampunang ja ngambil tityang.
6. Né jati jegég dijagat,
manis etis manyukanin,
tuhu lanus tan pacéda,
tan kahanan tuwa pati,
sayan lami sayan becik,
sayan wayah sayan luwung
réh jati istri utama,
sang suklabrahmacari,
istri hayu,
sayan lingsir mamajangang.
7. Punika becik rangkatang,
aluh twara ngalemesin,
sok yan jati beli arsa,
ngudyang sé tityang lemesin,
jadma gelis tuwa pati,
pangaputan sarwa letuh,
kisan isin jajron saksat,
basang-basang pasuranting,
lan paparu,
ati limpané ditengah.
8. Réh beli takep indriya,
sangkan kejokan pangaksi,
tan cingak ané ring tengah,
sok ring jaban kulit kaksi,
kulit bawangé ngilidin,
yan kupak barak kadulu,
madaging wat pacarangcang,
garagas makaput getih,
twara buwung,
dadi banyeh ya samyan.
9. Jiténdrya lan sawitra,
yan angkep sumingkin becik,
tan wénten kirang kagunan,
waluya Lembu Nandini,
bisa ngicén asing kapti,
sangkan anggén rurung tuwut,
marga kenceng tan macanggah,
ngojog karasané luwih,
eda ganggu,
beli pacang ngambil tityang.
10. Sang Sucita gelis nimbal,
nika patut rawos adi,
nanging kirang unadika,
anggah ungguh mangdén uning,
tan wurung isinga mati,
yan paksa uwéhin ambung,
ilembu tan wurung pejah,
yan paksa mangsa icénin,
ngudyang buduh,
ibaduda icén sekar.
11. Sang Biksuné mula wenang,
manyuklabrahmacari,
tityang réh mula kéndryan,
awinan ngalih imanik,
né katuju wantah tunggil,
béda bekelé kapundut,
swadarmané élingang,
paradarmané kelidin,
pangda slingsut,
tingkahé mélanin darma.
12. Ané madan swadarma,
amongan raga padidi,
ané madan paradarma,
amongan wong liyan wyakti,
amongan I parajurit,
mayuda mangardi luwung,
sang prabu magehang jagat,
swadarman anaké istri,
pinih luwung,
yan nyidayang patibrata.
13. Punika mirah pinehang,
réh manik maraga istri,
patibrata paling melah,
nggén larapan ngalih suci,
tityang mangiring imanik,
anggén srana guru kakung,
mangdén sida makaronan,
saparan tunggal pamukti,
adi hayu,
linggihin pinunas tityang.
14. Tityang sanggup twara tempal,
sapakayunan mangiring,
dyastu manyahjah kota,
ninjo wawangunan rawit,
yawat kasagara ngraris,
malayar mangalih nawu,
ngawasang bungah sagara,
kliyahan toyané becik,
ring das surup,
Hyang Surya Kalintang éndah.
15. Sambil ngawas gulem barak,
nyalang mawor biru kuning,
maputih madadu gadang,
lwir cayan nawadéwati,
papindan gulemé becik,
kadi gambar ngéndah erut,
lwir wayang malalampahan,
sanghyang pawana ndalangin,
dahat lengut,
sanget nguwuhin kasukan.
16. Yan waneh maring sagara,
kagunung halas mangraris,
sambilang matirtayatra,
teher mukti sarwa sari,
tukad danuné tinjoin,
sarwa wulangun tan kétung,
muwuh swaran paksi umyang,
halus tambungin sundari,
uduh ratu,
kénkén sukané pangguhang.
17. Yan adi lesu mamarga,
tityang mangemban imanik,
twara sandang sumangsaya,
tityang mula juru sunggi,
megat Ni Karuni nyawis,
naging gagebuké enduk,
arah tityang tan ngiringang,
tityang twara ja bani,
nimbal ngebug,
I Sucita mangucutang.
18. Nguda takut imasmirah,
réh tityang nandan mangabih,
nesek twara mabelasan,
mangrumrum sambil mamuji,
mangawas madyané ramping,
stél ring tayungné lemuh,
tindak dabdab magélohan,
lwir camara tempuh angin,
tanggung nawu
yan tityang sampun ngiringang.
19. Pungkur yan tekaning samaya,
imirah séda ngrihinin,
tansah tityang mangiringang,
ngetut pamargan imanik,
wiréh bayané tan kidik,
tityang ngabih mangdén lantur,
yan tityang padem rihinan,
tan nyujur kaswarga gelis,
kari nunggu,
ring watwagalagil ngantosang.
20. Dikalan mirah prapta,
mangdén wénten nandan ngabih,
apan marga sripit pisan,
batu ganjih asing njekin,
kalud pangadang tan kidik,
garuda bwaya asu,
ageng karura tur galak,
ring sampun sami klintangin,
ditu ngucur,
manuju smaraloka.
21. Ngélingin puriné suba,
bahan suwé katinggalin,
ring taman talagadwaja,
ugi gelisang cingakin,
gedong sekaré né marik,
matumpang masusun-susun,
bilih kakawané samah,
masang jaring ngurambatin,
nyawan liyu,
tambulilingan nganggwang kita.
22. Wénten ugi manah tityang,
ngiring mangda tan marabi,
nanging Hyang Smara bijal,
nyelir nyelang déwék beli,
wiréh Ida Déwi Ratih,
malingga ring adi hayu,
yan tempalin bilih tulah,
becikan ja margi iring,
mangdén sampun,
keni pamastun batara.
23. Ah beli jeg ngéndah pélag,
bes ngawé dalihan paling,
sampunang ja bengkung tulak,
masawitra pinih becik,
teka nguda buduh adi,
twara ada kanda luwung,
katak mangasihang naga,
pitik ngasihin kakelik,
uduh ratu,
nyén sanggup pacang nanggungang.
24. Duh adi jiwatman tityang,
Wusan ja adi ngulgulin,
iratu bes banget ngéndah,
tityang mula anak kenyih,
nggih jwa mirah linggihin,
pinunas I sedih ngunngun,
bilih mati tityang mirah,
yan tan gelisang tambanin,
ngudyang ratu,
banget menyandénin tityang.
25. Nguda sé iadi engsap,
tekén peragayan Ratih,
ndaweg ja éling-élingang,
tityang mula guru laki,
Hyang Smara ngaraganin,
dados mirah gelis bingung,
lali ring unduké kuna,
mider ping sering dumadi,
pada nurun,
sami milih saseliran.
26. Duk imirahé maraga,
ring Ida Batari Sri,
ring Wisnu tityang maraga,
duk dumadi déwi Saci,
ring Indra tityang ngutpeti,
duk ring Damayanti mungguh,
tityang dados Prabu Nala,
mangkin dadi Dyah Karuni,
jeg mapangguh,
ring tityang bagus Sucita.
27. Pipiné mecembleng barak,
tandan tityang ngaras nguni,
punapi malih kobetang,
sangkan kadat ngalinggihin,
menawi imanik brangti,
antuké wawu kapangguh,
kasép tityang manudtudang,
iratu sang hayu luwih,
mangdén huwus,
durusang tityang uwélang.
28. Kéwanten wusan nguwélang,
pamadain ban ngasihin,
siramin ban muka bungah,
tirtain samita manis,
kalpikain liring manis,
kidungin bahan pasanggup,
mangda sapisanan lukat,
malan tityang satus keti,
ratu hayu,
nggih juwa sampunang kadat.
29. Dyah Karuni keni piyah,
mamédah nusuk ka hati,
ngeres mamuluh kosodang,
aturé geles piragi,
inggih sang Sucita beli,
bes gemes ngantek papusuh,
icénin ja tempo tityang,
ané lyan bawosang rihin,
bes maupuk,
tityang mula pagul pisan.
30. Indayang tityang nunasang,
mungpung tityang mamanggihin,
satwa nungkak kirang sinah,
ndaweg ja tityang ndikain,
punapi sé né ngawinin,
ring sampuné ngelah liyu,
manggeh masih mangulahang,
ngalih satunggoning hurip,
sanget lacur,
dadi juru alih nyabran.
31. Malihné tunasang tityang,
napi madan sarin sugih,
punapiké sujatinnya,
kantiné sapanjang margi,
kalih kantining sang mati,
napi mwasta jatin satru,
sakit napi paling rahat,
punika tityang ndikain,
pacang sungsung,
sat beli iringang tityang.
32. Tityang suka mangantosang,
dyastu tan wénten ja mangkin,
sok beli lédang nyanggupang,
Sang Sucita manyawurin,
antuké bes sampun lami,
pungkur tityang pacang nyawur,
wawu ukuh Sang Sucita,
mapamit sagét prapti,
sang abagus,
né maparab I Sugata.
