( IDA KETUT JLANTIK )
XI. PUPUH PANGKUR
1. Sang
kalih mapamit budal,
sada asru,
ajahan adoh digelis
marga alit kilak-kiluk,
lemuh luwir inggekan madya,
sané lengkyang,
kagét tukad ya kapangguh,
gelis sampun kalintangan,
sampun rawuh maring pinggir.
2. Rawuhé
ring pinggir tukad,
wénten batu,
ageng lumbang becik nyulig,
wungkulin baingin agung,
mabangsing ya mailehan,
dahat samah,
punyannya agung aluhur,
ditu ida mararyan,
sambil nyingak toya hening.
3. Sang
Subudi mangandika,
adi bagus,
indayang juwa cingakin,
katang-katangé né atub,
né mebun malepah samah,
dawun ipun,
podol twara ngelah muncuk,
maniru dawun subita,
sekarnya putih lan tangi.
4. Masih
ngaé sukan manah,
yan kadulu,
ngirangin kuru di margi,
éling beli ané malu,
ada anak manuturang,
dawun ipun,
anggon tamba beseh luwung,
mulig misi bawang adas,
nanging né mabunga putih.
5. Malih
yan lablab dawunnya,
lawut inum,
sakit ngrasa katelasin,
ring botor mirip mabarung,
paturu manadi balian,
masih nulung,
sakit beseh umbin ipun,
ulig lawut olésang,
bawang adas campur masih.
6. Kocap
I botor punika,
dawun ipun,
né matah yadin ratengin,
seringang ngajengang lawut,
munahang ngrasa turunan,
teka aluh,
tamba mudah guna luwung,
twara tuyuh ngalih balyan,
nanging yéning kauningin.
7. Ukuh
ngalantur ngandika,
jeg macebur,
wénten bojog ageng putih,
saking binginé ngrembun,
tadah doh tur manyagjag,
lawut matur,
mabasa manusa caluh,
ampura tityang déwa,
matur ring I bagus kalih.
8. Wénten
kabuwatan tityang,
nunas tulung,
ring idéwa sané mangkin,
sakit manah tityang langkung,
antuk wénten pyanak tityang,
mwani aukud,
ical ipun juwang pandung,
yaksa sakti ngapak-ngapak,
ring jagat mangrusuhin.
9. Sring
ipun mamaling jadma,
saha ngrampas,
nanging boya wénten uning,
réh ipun nganggé kaweruh,
ajimaya mawisésa,
dahat teguh,
ring sarwa sanjata luput,
kéweh anaké nglawan,
dyastu nyidayang ngetonin.
10. Nanging
dyastu sapunika,
teka gampang,
patin ipun tityang uning,
toya tamresan iku,
saking taru bodi medal,
wus kabakta,
yan pacret sapisan lampus,
nanging tan jatma sabarang,
né dados pacang nampésin.
11. Jadmané
yogya mademang,
yaksa iku,
anak sadu darma budi,
tepet ngamong sila hayu,
mabrata tapa tan pegat,
twara surud,
bakti ring Ida Hyang Tuduh,
teleb maring japa yoga,
asih ring sahanan murip.
12. Idéwa
manahang tityang,
tuhu sadu,
sampun ngamong darma budi,
idéwa nyandang manglebur,
sang yaksa né dahat corah,
keni nanggu,
ambek ipuné tan luwung,
wusan ngrandahin jagat,
ngrampas tur mamaling jadmi.
13. Dikrangkéng
majaro waja,
dahat kukuh,
ditu pianak tityang ngesil,
sering ngamé bapa ibu,
nyerit mangenyagang basang,
yan akudang tahun
sampun ditu ngengsub,
jawat kubuh kwéhing pangan,
tan bébas né ngawé sakit.
14. Sakit
pitresnan ibapa,
lawan ibu,
iseng pianak mangangkepin,
mangapyuk mangawé sungsut,
napi anggén tityang tamba,
boya luntur,
yan tan sang abagus nulung,
sanget duryasaning bapa,
né tan nulung pyanak sedih.
15. Das
tityang ngemasin pejah,
sareng somah,
mangimpasin sakit hati,
nging éling tityang ring ipun,
kari hurip kasangsaran,
muwuh sedih,
yan kuningin tityang lampus,
punika awinan tityang,
tan tulus nyeburin agni.
16. Puput
nandang sakit jengah,
sahi sedih,
nyelselang pakérti nguni,
sambil nulamé Hyang Tuduh,
dumadak gelis ngampura,
manywécanin,
tityang ibusét né lacur,
né mangkin kagét idéwa,
panggihin tityang iriki.
17. Dyastun
tityang bojog nista,
langkung lacur,
ngwales swéca boya uning,
dumadak ja sang abagus,
lédang manyambungin yasa,
nulung tityang,
né sakit nyedihang sunu,
bilih punya karman idéwa,
pacang ngewales diuri.
18. Kocap
yasan sang Darmika,
kadi ratu,
sedih yaning twara polih,
nulungin sang nandang lacur,
né kéweh sekadi tityang,
nggih lanturang,
kadarman iratu bagus,
nggén tityang pawéwéh yasa,
né mawak sila utami.
19. Mangda
idéwa pawikan,
munggwing tityang,
mawasta Sang Artati,
titisning Anila sunu,
né kasub sakti tur darma,
juru jaga,
watek sang masolah hayu,
munahang sahanan corah,
kéman ban sang Rama nguni.
20. Ring
bukit Kadalipuspa,
umah tityang,
ring réjéng prasa sripit,
wénten guwa dahat pengung,
iriki tityang magenah,
katah ditu,
mas inten mirah tan kétung,
ring tityang nora maguna,
wiréh ngutamayang manggis.
21. Ditu
tityang nandang jengah,
sareng somah,
sedih pianak ninggalin,
kagebag ban bosét liyu,
bareng pada mapangenan,
réh gustinnya,
ical I raksasa mandung,
méménya sedih maguyang,
réh kécalan unteng hati.
22. Munggwing
bukité punika,
sada adoh,
nika tepeng kanten kangin,
arang wénten jadma rawuh,
apan bukit madurgama,
réjéng pangkung,
paras iding rungka langkung,
macan baruwangé katah,
gajah warak lan lalipi.
23. Ring
samping bukit punika,
tadah soran,
sada wénten nangun kérti,
pada prajnyan sidi sadu,
kalih sami wibuh sisya,
tur irika,
katah bulakanné luwung,
sanding sarwa sekar katah,
kdapan taru becik-becik.
24. Sumeken tityang irika,
mamuktiang,
pican Ida Sang Hyang Widi,
manawi sang bagus pungkur,
wénten pakayun merika,
nglila-lila,
matirta yatra ngelawut,
sambat guhya naman tityang,
sinah tityang mamendakin.
25. Ibusét
raris nampekang,
makisi-kisi,
nampekin karnan sang kalih,
wusané makecos nungkruk,
tadah dohan magenah,
ngamalihin,
nyambung atur mangalantur,
nggih déwa malih pirengang,
atur tityangé puniki.
26. Munggwing
genah I raksasa,
boya adoh,
kaaksi saking iriki,
maring munduké puniku,
ring nyampihnya wénten guwa,
nyanding tukad,
irika ipun manunggu,
genah iding nriping pisan,
rungka madurgama pingit.
27. Malih
tityang misekenang,
yan idéwa,
samput muwat toya puniki,
sinah ipun twara mampuh,
tan sida maksa idéwa,
kalih yaning
siratang ring tanah luwung,
sang yaksa tan sida ngliwat,
selat adepa nguliling.
28. Yaning
buwat ngamademang,
karitisin,
déwék ipun mangda keni,
sampunang sayang ring ipun,
yaksa loba ngrusak jagat,
wantah siki,
yan sampun nulung nak liyu,
sané keni kakéwehan,
manggeh patut kawastanin.
29. Sang
Subudi mangandika,
duh Artati,
kasub ira mamiragi,
bahan getar tétéh pangus,
muwat pidarta utama,
pantes cai,
turunan wanara agung,
né ébeking kaprajnyan,
sanget ja ira mamuji.
30. Nanging
sambil memangenang,
bahan cai,
kanti dekus sanget sedih,
tinggal pyanak juwang pandung,
bareng ira manyakitang,
dyastu pejah,
tan takut pacang mapagut,
mayuda nandingin yaksa,
mingkin ada patulung cai.
31. Nanging
dot ira manawang,
apa krana,
sangkan cai manguningin,
kapatyan yaksa iku,
I wanara matur nimbal,
saking kawit,
tityang nguningayang ipun,
mangdénnya I bagus tatas,
ring indik ipuné nguni.
32. Wyakti
kadi pangandikan,
sang prajnyan,
pagehé nyalanin bakti,
bani nandang bedak seduk,
munahang pangrasan lidah,
mwah ngalawan,
pangodag pasta puniku,
ulyan kuwat mekek manah,
tan wurung polih kasaktyan.
33. Tityang
banget mangajumang,
pun sang yaksa,
dahat pageh sané nguni,
tan papangan tan panginum,
ngangén brata nirahara,
tur mayoga,
tepet tan pangitung tuyuh,
bakti ring Ida Hyang Brahma,
sangkan Ida manuronin.
34. Ida
sané wéh nugraha,
dwaning ipun,
sida mawisésa sakti,
sasampun saktiné kinum,
teka punyah ngapak-apak,
lobang kara,
mamahak mamégal mamandung,
mamati-mati sahasa,
krura manyejehin gumi.
35. Kanggén
manyambungin cacat,
pyanak tityang,
kagét kakosa kapaling,
nyerit ipun tulung-tulung,
réh tityang mrasa kuciwa,
makawinan,
kabelet manadi sungsut,
ibuk malingsah maguyang,
hatiné lwir iris-iris.
36. Sawyakti
tan wénten gampang,
ngamong teduh,
mekadi ngamong kasaktin,
yan tan mabih darma sadu,
gelis ajum ngapak-apak,
kadi gidih,
déwéknya nagih mapadu,
sang momo kéweh nahanang,
lekahan luwaban sakti.
37. Saktin
mayonin angkara,
lekad loba,
lawan kopané matindih,
élah pelihé mawetu,
pelihé gampang nekayang,
tuwuh bawak,
ngaba kamatiné lawut,
atmané dadi sangsara,
kénkén bahan ngupas pelih.
38. Gelis
tityang nguningayang,
dwaning tityang,
jantos seken tatas uning,
munggwing kapatian ipun,
sawus pyanak tityang ical,
nuli tityang,
mandéwa seraya lawut,
ngastiti Ida Hyang Rudra,
syang ratri ngastiti bakti.
39. Wawu
tityang kutus bulan,
ndéwasraya,
kagét Ida mangrawuhin,
lugra kadi né wus katur,
dwaning tityang saking lawas,
sahi ngadang,
maninjo anakné sadu,
sané yogya ngamademang,
sang yaksa né lintang sakti.
40. Mirip
halan karman tityang,
sampun nanggu,
kagét idéwa kapanggih,
kadi pandukang Hyang Tuduh,
sawiréh sinah idéwa,
pacang sida,
ngardiang jagaté landuh,
munah I raksasa murka,
né tan mari ngusak-asik.
41. Sang
Sucita mangandika,
duh wanara,
Sang Artati luwih wagmi,
mirib suba lintang tuhu,
buka ané kapidarta,
sakéwala,
ira todén jati tahu,
sok cai nawang padidyan,
masih nu orta kadanin.
42. Sang
Wanara matur nimbal,
inggih déwa,
sang luwih prayatnéng budi,
atur tityang wyakti bagus,
sakadi Sang Séwagara,
tan pasaksi,
nanging nyanan sinah pangguh,
tulang jadma paselengkat,
buktiné manadi saksi.
43. Pamuput
raris mamarga,
maréntowan,
ibusét mamargi rihin,
dyastun Ida tan pasangu,
nanging tan rumasa lapa,
wiréh kaduk
kayuné éling ring satru,
jantos lingsir sang hyang surya,
kantun ring tengahing margi.
44. Pamarginé
minggir tukad,
ngaduluwang,
wus adoh lumaku gelis,
ibusét mangalah ungkur,
tedun munggah benceng pisan,
nincap kayu,
sébet mangacosin ambung,
kagét nesek ya madandan,
mapo nenceng malahibin.
45. Ibusét
ngantos mararyan,
ngamel taru,
saha umatur pihuning,
inggih ratu sang abagus,
puniki taru utama,
né kapuji,
mwasta liligundi wulung,
yan nyabran tumpek ajengang,
asta guna pacang molih.
46. Nanging
mangdén malih pisan,
mangajengang,
tan becik yan mangancadin,
nyabran saniscara nuju,
kliwon lawut buwatang,
ditu pangan,
muwuh mabrata tan surud,
tan wenang ngajeng carikan,
tur tepet ring sila yukti.
47. Malih
né tan kayogyayang,
ring umanis,
mangalap liligundi,
tan ngempak twara ngabut,
makadi tan ngrusakang,
liligundi,
kéto babratannya bagus,
aywa lali aja lupa,
yan pacang manglaksanain.
48. Yan
kéto bahan nepetang,
tan wurungan,
kocap kanirbanan panggih,
tur muwuh panjang tuwuh,
lara rogané maimpas,
réh punika,
papanganan busét Agung,
né maparab sang Anoman,
sangkan sakti darma kapuji.
49. Sang
kalih manyuksmayang,
saksat molih,
panugrahan déwa luwih,
saha tan mari manyumbung,
Sang Artati pragusa,
malih matur,
ibusét ngaturin nunggu,
pacang ngalih woh-wohan,
tan kocap gelis prapti.
50. Bekul
apel miwah hea,
kakeniyang,
sampun katur ring sang kalih,
wus mukti mamarga lawut,
lintang doh pamargin Ida,
kalud rungka,
iding réjéng kilak-kiluk,
sang kalih kagét manyingak,
tulang batok pagelintik.
51. Tumuli
Ida ngandika,
Sang Sucita,
uduh cai sang Artati,
né tulang jadma kadulu,
di tengah di pinggir tukad,
mirib suba,
pahek I raksasa iku,
ncén sé tiban guwanya,
indayang ja patujuhin.
52. Déwa
bagus sang utama,
daging nika,
tulang-tulangé kaaksi,
garagas carikan ipun,
pecak anyudang belabar,
nuju kancab,
munggwing gowannya doh kantun,
swatah tigang hyu depa,
genahnya saking iriki.
53. Becik
ugi yan kawitang,
mapakayun,
niki wénten batu nyulig,
irika ngiring malungguh,
nyandang dabdabang locita,
mangdén adung,
tingkahé maranin satru,
réh punika kawenangan,
prayatna weruhing aji.
54. Munggwing
gowan I raksasa,
tan makanten,
wénten munduk mangilidin,
wiréh tukadé mabéluk,
dajan nyjol munduk punika,
nglikuk kangin,
saking iriki kadulu,
wénten rangdu tegeh nunggal,
duwur gowa tampek kidik.
55. Sapunika
pihuningnya,
sang Artati,
sang tiga marembug raris,
gelising carita sampun,
molih sarin tatimbangan,
sami adung,
budi satwa karegep huwus,
mamarga dahat prayatna,
ateh angin mangesirsir.
56. Paimpas
buroné mapas,
kidung kancil,
nyamping anengen ngimpasin,
pangataging karma hayu,
pacang jaya ring payudan,
sada gati,
pamargi sang tiga iku,
mangelantur tan halangan,
crita sampun tampek mangkin.
57. Ibusét
matur uningé,
inggih déwa,
né mangkin tityang mapamit,
pacang mangunggahin taru,
maninjo sambil prayatna,
ngintip selah,
yan wénten pamargi nulung,
sinah tityang tan manggayang,
tan ajrih ngemasin rihin.
58. Sang
kalih kenyem manggutan,
lawut mamarga,
sampun waspada kaaksi,
muwaran gowa puniku,
tampek saking pinggir tukad,
krura pisan,
tulangé mamunduk-munduk,
ada helet ada hanyar,
ambunnya kalintang alib.
59. Ring
pinggir gowa punika,
ebun katah,
ageng maslingket makilit,
nyanding kayu agung awub,
kanten sanget ngresin manah,
ring sang getap,
nanging sang kalih mawuwuh,
kapurusané manyingak,
ban angén ring sang kabukti.
60. Nyilib
sang kalih nampekang,
sedeng becik,
kadi kilonan ban Widi,
I raksasa sedeng maturu,
sang kalih sampun jumelag,
maring pingir,
gowané ngrétésang banyu,
mamegat ambekan gowa,
puput sampun keseretin.
61. Séwos
malih né kabakta,
wus sayaga,
bungbung lan lalang maisi,
pacang nggén nyiratin ipun,
yan tan nyak ngasor ngandap,
kagét makerak,
bojogé sané kaubuh,
bahan nanangnya dingeha,
umyang maswara manyerit.
62. Sang
yaksa nuli ngadahap,
enten bangun,
runtag sajeroning hati,
yan entegang mwuwuh buwut,
sangkannya mawangsit medal,
nganggar pedang,
somahniya nu manyingkrung,
bareng mangajak pianak,
kantun cerik kajangkutin.
63. Sang
yaksa jerih mangakak,
jerih kulkul,
sarwa buroné miragi,
kayang paksi sepi samun,
gajah warak mengkeb getap,
nanging liyan,
sang kalih ngatgat mapanduk,
ngélah-élah samping gowa,
sang yaksa yatna kasisi.
64. Sampun
tampek ring pamedal,
sawatara,
madoh kalih depa mirib,
ring genahé makritis banyu,
nadak ngetor i raksasa,
pedang ulung,
magelur ya tulung-tulung,
somahnya tan maningehang,
sang kalih nyagjag nyelehin.
65. Sang
Subudi mangandika
ring sang yaksa,
né sampun kicalan sakti,
maselat krétésan banyu,
kadesek tatan madohan,
ih sang yaksa,
ngudyang kaki nyongkok ditu,
mirib kaki nu matingkah,
ngaregepang mantra sakti.
66. Sang
yaksa mingkin makesyab,
ban ngatonang,
sang abagus maka kalih,
sapisanan jeg mangayuh,
saha nunas kahuripan,
ban rumasa,
déwéké lemet tan mampuh,
mawinan matur pranata,
duh ratu sang bagus kalih.
67. Mnawi
Sang Hyang Siwa Budha,
manyakala,
katon rawuh saking sepi,
antuk tityang congah nluju,
sangkan tulah kanti rebah,
tan pabayu,
lima batis nadak rumpuh,
sapasira sé idéwa,
ndaweg ja tityang ndikain.
