III. PUPUH GINADA
1. I Mudita maningehang
Manahnya suka tan sipi
Baané mangelah misan
Kenyem tur mamunyi alus
Inggih kadi bawos bapa
Titiang ngiring
Pacang manelokin iwa
2. Mémé bapa iring titiang
Merika ka gunung kawi
Taler nguningang midarta
Bapannya mesaut alus
Buat dewasané luwas
Bisa cai
Bapa tambet sok nuwutang
3. Sedek ia ngomongang luwas
Sagét kulkulé mamunyi
I Mudita nyagjag mesuang
Beli wayan
ngudiang ngulkul
Sang
mangulkul nimbal ngucap
Anak mati
Ngerentebin jani ke banjar
4. Keliané madedauhan
Baosang mengambel gumi
Apang nanem parejanian
Bin telun pacang mecaru
Kocap manca wali krama
Né bin mani
Banjaré kanikang ngayah
5. I Mudita madingehang
Cendet pamunyinnya inggih
Mulihan ia nyemak blakas
Mangeraris ka banjar iju
Lek ia pacang kasépan
Kumah sang mati
Gupuh nulungin mekarya
6. Banjaré ya pada teka
Marérod luh muani
Ditu ya pada mangucap
Mudita marérén malu
Mai ke medaar canang
Kanti lepis
Nyemak gaé padidian
7. Dahané pada megarang
Nampih basé mangenjuhin
Ada mangenyitang roko
Sami pada demen ngulgul
Anak tong taén medihang
Kalem gati
Tuwah
pantes sing solahang
8. Raris nabdabang ka sétra
Watangané wus mabresih
Sampun puput mupakara
Mudita raris makidung
Liyu Banjaré nuwutang
Ramé gati
Kocap rawuh maring sétra
9. Watangané wus murugan
Banjaré megantian mulih
Dadi cicingé miyuran
Mapunduh-punduh
mangulun
Anaké ngeri ngantenang
Gati mulih
I Mudita raris budal
10. Satekané jani jumah
Dapetang bapané sakit
Luh muani buka dadua
I Mudita lintang gupuh
Nyimbuhin ngalihang uap
Megadangin
Sakité sayan ngerahatang
11. Kebus bara buka panggang
Awak sakit buka ulig
Bapannya
ngarod mangucap
Cening bapa lambian lacur
Sakité tan sida lawan
Nah pecikin
Sirah bapané ajahan
12. I Mudita tuara nulak
Mecik sirah tuara gingsir
Meménnyané maduwuhan
Mudita mémé dong tulung
Sirah mémé rasa belah
Leheng mati
Tong sida bahan naanang
13. I Mudita madingehang
Yéh matané membah mijil
Lawut mamunyi nelanang
Bapa titiang pamit dumun
I mémé ngawukin tiyang
Ajak mai
Depang dini punduhang
14. Bapannya tong sida ngucap
I Mudita mengalihin
Laut nyagjag ka meténan
Méménnya ka sangkol pesu
Balé dangin kapunduhang
Tur kagisi
Kasundang ya maka dadua
15. Limannyané né kanawan
Bapannyané
ketatakin
Limané kébot méménnya
Tuara ja mangitung tuyuh
Méménnyané ngaliyepang
Lantas mati
Lemet lélo di pabinan
16. I Mudita manelanang
Nyaréang
reramannya muwani
Méménnyané kakisidang
Suba nyem tong ada bayu
Mudita raris manyumbah
Sedsed ngeling
Ngerurubin wastra paséhan
17. Sasuban marurub melah
Bapannyané kajagjagin
Angkihané ngamenékang
Bapannyané pesu peluh
I Mudita mangénggalang
Manyimbuhin
Mangengkahin
bahan bawang
18. Bapannya inget ngeliyab
Ngangsehang
mesuang munyi
Gawur tur mamegat-megat
Mudita kalintang tuyuh
Cai mengayahin bapa
Cendek
jani
Bapa nutug imémé pejah
19. Né jani bapa mawekas
Yening suba bapa mati
Kewala suba murugan
Nanging ké
apang mapunduh
Mémén cai tekén bapa
Laut cai
Luwas ke gunung kawia
20. Orahang juwa bapa pejah
Bareng tekén mémén cai
Bungkungé ingetang aba
Né masoca jaga satru
Apang eda ketandruhan
Cihna yukti
Cai tuwi pianak bapa
21. Munyinnyané megat-megat
Mangereres nglantas mati
Mudita ngeling mangerak
Batis bapannya ka gelut
Pisagané teka nyagjag
Manelokin
Pada ya kangen ring manah
22. Ada mamunyi nelanang
Nguda ké sawané depin
Patut pandusin kedasang
Boréhin pang eda kaku
Bangsing
bingin muang cenana
Kéto jati
Sami mabriuk matutang
23. I Mudita tuara nulak
Tan maren
ngepes mangeling
Masih inget ya manyumbah
Tingkah astiti maguru
Sawané raris ka jemak
Kapandusin
Liyu megarang mangisi
24. Sawannyané buka dadua
Suwud manjus keboréhin
Mudita nyemak paséhan
Sutra putih maka rurub
Tur sawané kesaréyang
Luh muani
Tulya mara penganténan
25. I Mudita mengantenang
Sedih nulamé sang mati
Mémé bapa buka dadua
Tresnané merabi nerus
Tuara saja dadi belas
Kayang mati
Las tuwara ngangen pianak
26. Yata ké anak banéhan
Doh para sehem manolih
Medalem sekadi titiang
Kéné belog turin sigug
Tuara mangelah gagunan
Ludin miskin
Napi anaké toliha
27. Asing ningeh pada olas
Dadi ya milu mangeling
Sagét Ida Peranda Buda
Sasuhunan nyané rawuh
I Mudita tuwun negak
Tur ngebakti
Raris ya matur sembah
28. Ica sasuhunan titiang
Nyingakin panjaké miskin
Papané kalintang lintang
Kadi mangkin titiang ubuh
Menawi pitra kesasar
Manumadi
Kerana nerakané lintang
29. Pedanda alus ngandika
Mudita da sanget sedih
Apan panitahing Sanghyang
Masih laksanané malu
Ada jani katemuang
Salah jani
Dadi riwekas buktiang
30. Dija ngalih melah duang
Menarengké buka cai
Ida Sang Panca Pandawa
Sekala Déwa manurun
Meraga dumadi jadma
Masih sedih
Kanerakan sakéng alit
31. Mangumbang mideh-idehan
Ngagéndong mangidih-idih
Nanging kayuné tan obah
Mamerihang darma patut
Kerana rahayu kabuktiang
Teked jani
Ayu ucapé ring jagat
32. Kéto ban cai ngimbangang
Lacur cainé né jani
Yadin sangetang nyakitang
Masih tuara dadi idup
Mingkin ngawé keneh buyar
Inguh paling
Patut idepé ya paling
33. Tingkahé dumadi jadma
Darma patuté ulati
Yadin tiwas tanpa braya
Eda teka miyat miyut
Darma patuté manggehang
Wekas manggih
Pagawéné jani temuang
34. Tingkahé dadi pianak
Tatuwiané buka jani
Eda maren
ngértiang kawitan
Réh mutang jiwa ring guru
Tong
pragat bayah ban jinah
Buka cai
Astiti bakti anggon mayah
35. Sinah rahayuné bakat
Akéto cai kenehin
Réh jani ada dawuhan
Tan kicén mabiya puwun
Réh gumi kageringan
Nah urugin
Pangentas juwa tetepang
36. Kéto juwa cai jalanang
Eda enu sanget sedih
Mudita resep ngiringang
Pedanda ngraris mantuk
Mudita nyuwakang awak
Matur aris
Upakarané
nggih wangunang
37. Banjaré raris ngaryanang
Lén ada manyemak tiying
Buwat pacang panusangan
Lanté miwah tumpang salu
Buwin ada
nunas pangentas
Sada gati
Dabdab manyuwun daksina
38. Kocap sampun mupakara
Sawané wus maci-aci
Raris nabdabang ka setra
Bangbangnyané
sampun puput
Sawané wus mapangentas
Luh muwani
Katanem dadi abangbang
39. I Mudita bengong negak
Sigsigan ngepes mangeling
Sang ngatonang pada olas
Luh muwani pada mitutur
Ngudiang
ja sanget sebetang
Wiréh ganti
Amoné jeneng tuwuhnya
40. Jalan ja mulih lipurang
Urukang tiang megending
I Mudita nurut budal
Anaké tong ada mantuk
Laut kumah I Mudita
Sareng sami
Manginepin mangda purna
41. Ada ngajakin mepelalian
Ada buwin
ngajak megending
I Mudita manuwutang
Sagét ada ngaba sangu
Mangingu anaké samian
Lintang becik
Tetep maolah-olahan
42. I Mudita kaujurang
Makejang pada ngawukin
Mudita mai medaar
Jaenan yan ajak liyu
I Mudita tuara tulak
Lintang ririh
Tingkahnya ngalap pitresna
43. Tuara ja mengaguang awak
Magibungan sareng sami
Ramé sarwi makedékan
Ada saling timpug balung
I Mudita nyemak ulam
Kecatotin
Baan sané eluh bajang
44. Ada ngesopin anggutan
Mudita suka menampi
Né tuwa turin pawah
Milu mangesopin muluk
Ada lén buwin ngwalesang
Uli samping
Mejek tabia tekén uyah
45. I Tuwa ya sedeng binal
Kaesopin uli samping
Lalah makucah kacihan
I tuwa ya siat siut
Ada nyemakang caratan
Mangecorin
Cunguhnyané tuwi ka siam
46. Ramé kedéké mabriag
I tuwa misuh manyerit
Yéh matannyané membah
Tengas tenges siat siut
Kedéké mombak ombakan
Ramé gati
Kocap pada wus medaar
47. I Mudita alon ngucap
Ratu ida dané sami
Titiang menawegang pisan
Titiang
pacang luwas ke gunung
Manelokin iwan titiang
Sané mangkin
Mangda sampun salit arsa
48. Boya jati titiang nglaliang
Buwat swécané
sareng sami
Titiang jati nyuksemayang
Swécané kalintang tulus
Punika bekelang titiang
Lintang luwih
Wiakti tuara bisa telah
49. Yéning swéca antuk berana
Punika kalintang ganjih
Wiakti wantah gelis telah
Yan swéca kayun rahayu
Saumur tuara
ja ilang
Jawat mati
Kari juwa bekelang titiang
50. Sapunika sujatinnya
Awanan titiang mepamit
Pabesen reraman titiang
Saduknya makiré lampus
Mangda
titiang mangorahang
Dané mati
Ring titiang maduwé uwa
51. Malih nyandang kadi titiang
Luwas pacang manelokin
Uwan
titiang di gunung kawia
Durung
titiang nahen pangguh
Kocap dané bapan titiang
Duké alit
Titiang reké kasilurang
52. Punika awanan titiang
Meled pisan mangda uning
Ring dané ngrupaka titiang
Mangda
sampun dané tandruh
Kéwanten titiang uninga
Titiang gelis
Pacang rawuh tulak budal
53. Sing ningeh buka pangsegang
Né bajang alon mamunyi
Inggih beli Wayan Mudita
Ento papineh tan patut
Yening pacang beli luwas
Maninggalin
Kayun anaké piteresna
54. Sujati maan upetan
Indayang beli pinehin
Né tuwa manimbal ngucap
Yéning kéto luh tan patut
Nulak pabesen bapannya
Cendek jani
Masih ja pada tuwutang
55. Tingkahé numadi pianak
Tuduh reramané iring
Buwin yan ada anak tresna
Tresna jua
anggen menawur
I Mudita nyandang luwas
Menyalanin
Kadi pabesen bapannya
56. Nanging eda mangengsapang
Tresnan ida dané sami
Kerana da makelo luas
Buka dadua
nyandang turut
Bakti tresna pada bakat
Ento luwih
Né perihang dadi jadma
57. I Mudita resep ningehang
Tumuli matur raris
Sapunika manah titiang
Né mangkin
pacang ka gunung
Nutudang ring iwan titiang
Mangda uning
Dané meraga kasebalan
58. Sasuwénnyané abulan
Titiang tulak rawuh malih
Asing ningeh pada suka
Banjaré ngorahang mantuk
Buat bekelnyané luwas
Katurunin
Sangu katekaning jinah