( IDA KETUT JLANTIK )
XIII. PUPUH SINOM
1. Jatinnya
madan angkara,
togog tanah mamingungin,
ban seken marupa jadma,
engsap tekén tanahé rihin,
yadin soké mlakar tiying,
kekadén ada sok tuhu
tekén tiying kadén lénan
yan soké lén tekén titing
apa nyamud,
tekén tiying kadén lénan
yan soké lén tekén titing
apa nyamud,
ngembus tiying soké ilang.
2. Kéto
masih I angkara,
ya mawak twara jati,
sangkannya mrasa ada,
demené hidup ngawinin,
maulat tekén takut mati,
makit tekén loba kudu,
mwang sang raga dwésa,
ento mulatan marakit,
kagét pesu,
marupa I ahangkara.
3. Angkarané
ngawé bina,
mamadih unduké sami,
bisa ngrasa jelé melah,
hala hayu lara pati,
iya duweg mulak-malik,
sébet mamincerang unduk,
sangkan langah anak nawang,
rasané kasép ngrasanin,
kadén tuhu
sané linyok tahunan.
4. Disubané
I angkara,
mawak tawang twara jati,
ditu pasti sayan ngenah,
linyok kasukané dini,
patuh tekén pules ngipi,
manggihin kasukan luwung,
sujatinnya tidong saja,
gambar I angkara nulis,
bakat gugu,
bahan belogé ngawinang.
5. Sadurungé
tawang saja,
déwéké pawakan sepi,
patuh kén pules adanya,
I angkara nu nylangkangin,
nto mangawinang paling,
ané tidong-tidong rebut,
kanti sugat mahiyegan,
makejang buwat kaalih,
suba tepuk,
éméd tur lawut sabatang.
6. Sanuné
mawak angkara,
yaning telektek pedasin,
hidupé cara mabola,
ngencotang nguber nyagjagin,
suba bakat buwin tanjungin,
suba ketes kepung lawut,
kéto sang ngalih kasukan,
suba bakat kutang malih,
buwin ruruh,
balikiné suba kutang.
7. Yan
kaki suba nyidayang,
makatang artiné jati,
kadi tuturé itunyan,
ento jatining matangi,
adoh saking pules ngipi,
suba bangun ulih bangun,
campuh tekén rasa sukla,
gumi turya kaadanin,
suwud ibuk,
runtagang isuka duhka.
8. Nanging
ento kereng hilang,
tan makelo bakat aksi,
yan tan abih bahan galang
galangé buwin artinin,
dakin corahé gedyangin,
bahan papinehé patut,
patuté buwin sampatang,
bahan kenehé tan pamrih,
uli ditu,
kaki pacang polih galang.
9. Ento
anggon ngalih turya,
Hyang Sukla mangdén nampekin,
wadahé apikin pisan,
apang twara misi daki,
kerana sahi bresihin,
angkarané sahi sutsut,
yaning sahanan kasukan,
merasa twara ngedotin,
ento tuhu,
cihnan I angkara punah.
10. Né
kaki buwin pedasang,
diyastun awaké mati,
angkarané hidup waras,
uli bangkéné makisid,
ngaba ambak cara hurip,
ditu lawut ya mamupu,
buwah tingkahnya ipidan,
saduknya kari mahurip,
hala hayu,
manut ring tingkanya suba.
11. Yan
kéwaléndrya adokang,
tuwah wisayannya uningin,
unduknya twara tawang,
né élah kelawan ketil,
né sinah miwah né hilid,
ento tusing tawang lawut,
ané pacang sida nawang,
tan liyan ulih pangarti,
uli ditu,
ané hilid pacang sinah.
12. Jani
iyang manuturang,
né nandang suka prihati,
tan lyan ento I angkara,
tusing ja awaké kaksi,
yaning awaké tingalin,
dadi adek dadi usud,
ento batas dadi wadah,
pungkur yaning suba mati,
puput lampus,
sang angkara tadah ninggal.
13. Bangkéné
tuara ngrasa,
buka rawos kaki tuni,
nanging angkarané ngrasa,
twara bareng iya mati,
kéto masih duké hurip,
mula awaké tan milu,
ngarasayang suka duhka,
twah angkarané ngrasanin,
nanging saru,
ban rasané ngébekin awak.
14. Ketil
dadi cacimpedan,
I angkara dahat singid,
ya mati busan-busan,
kadi hidup sahi-sahi,
iya ané takut mati,
demen hidup ya satuwuk,
ya nagih mangodagang,
salwiring ada di gumi,
iya nguduh,
manusané tan rérénan.
15. I angkarané
kucapang,
dadi atma duké mati,
ya nandang swarga nraka,
I angkarané masih ngipi,
I angkara yan manengil,
dadi leplep ya aturu,
I angkara, yan mangendas,
kapancéndrya malali,
dadi bangun,
kéto kaki ketatwannya.
16. Kéto
malu ban ngitungang,
apang da jag
mamoyanin,
réh tan genep bahan mata,
ané anggon nyelehin gumi,
réh tan kidik ané singid,
samatra twah né kadulu,
liyunan tuara tawang,
kaling ké tuna pangarti,
megoh purun,
maboya tan palantaran.
17. Kaki
ituni nyambatang,
patpat tingkahé kagisi,
Purusa lan Parikosa
Nastika muwah Kasaktin,
nto pacang nyidayang polih,
arta minakadin ipun,
kama wirya kakasuban,
pacang nutug suba pasti
sanget rikuh,
tur ngeresin dingeh hiyang.
18. Yaning
Ida Sang Darmika,
abesik tuwah kaungsi,
kasukané tan parasa,
né langgeng tan bulak-balik,
réh Ida wus tatas uning,
ring kasukan anaké liyu,
sukané ulian arta,
kama wirya kasub malih,
suka palsu,
kasukan misi kadukan.
19. Né
kaentap kanggén marga,
masih ya tuwah abesik,
tan lyan ané madan darma,
rurung halus dahaté tis,
marga hidup bisa ngabih,
yan sangkala sang manuwut,
ya manulung ya manyaga,
ya mahekang ané ungsi,
bekel ditu,
ngawé gampang sang mangentap.
20. Réh
Ida Sang nuluh darma,
tan mangawé anak sedih,
tan ngardi jejeh muwah runtag,
tan mari nyukanin hati,
ngawé girang ngawé becik,
tur ngawé wasané hayu,
ngawé anak trepti suka,
uli hidup kayang mati,
twara surud,
kayunné maulah darma.
21. Ida
waluya mamula,
kasukan ring para jadmi,
ento mabuwah utama,
manulung salantang margi,
lén tekén I durbudi,
né nandur tingkah tan luwung,
sipok lawut nunas suka,
ring Widiné ngamenggahin,
nikel pangguh,
sinah kéweh bakat tandang.
22. Sang
ninggal, sukaning darma,
sukan corahé kaungsi,
patuh ring anak petengan,
mentas diréjéngé belig,
ngalih galang ngelidin sasih,
kunang-kunang lawut ruruh,
né makedép kapah-kapah,
matuncap saksat pacadi,
ngawé labuh,
kéto maluya tan liyan.
23. Katah
antuka nyinahang,
kotaman darmané wyakti,
lawan kanistaning corah,
antuk sang abagus kalih,
matimbal-timbal nuturin
pada teleb-teleb nutur,
sang yaksa sampun kalyahan,
amretaning tuturé luwih,
kadi anyud,
momon ipuné ring manah.
24. Jantos
nadak mapangenan,
ring tingkah ipuné nguni,
antuk mangkin sampun tingglas,
kanten ring jroning hati,
kadarmané tuhu luwih,
corahé mawak pangapus,
pedas pasti twara bingbang,
jati yaksa nyandang puji,
ban tan bingung,
nimbang saluwir kakencan.
25. Awinan
nyakupang lima,
nguntul mangabakti,
saha matur pranata,
duh ratu sang tuhu luwih,
iratu nyandang kapuji,
apan prajnyanné putus,
mirib Hyang Guru nyakala,
nyadya tityang sida manggih
Widi asung
medalem tityang kasasar.
26. Banget
rumasa ring manah,
iwang solah tityang nguni,
saking guru mangawinang,
tityang malajah sané rihin,
ring yaksa kalintang sakti,
tur sugih tan keni itung,
wastan ipun Sang Téjase,
tityang madan I Durbudi,
antuk cucud,
dwaning tityang kaéman.
27. Gurun
tityangé punika,
seken nguruk mituturin,
mangda tityang kukuh kuat,
ngetohin angkara budi,
kroda loba irihati,
keni tan késah ring kayun,
pageh ngimpasin kadarman,
réh punika goda sahi,
ngawé runtuh,
kasukan miwah kayaksan.
28. Coton
tityang manuwutang,
tambeté né mangawinin,
tityang ngidem dandan buta,
doh rahayuné panggih,
sastra gama keni tungkasin,
darmasastra né kapurug,
tan ngatang sarwa larangan,
pamuput iwang kapanggih,
twara buwung,
ngemasin duhka sangsara.
29. Ngelidin
tuyuh ajahan,
matimbangang beneh pelih,
pamuput tuyuh tahunan,
panggih tur lara tandangin,
réh yéning damang padidi,
manakonang iwang patut,
boya wénten ngatarayang,
nuju iwang né sungkemin,
sinah lacur,
waluya manyetik awak.
30. Bukti
ipun kadi tityang,
sadurung iratu panggih,
andel ring déwék pragat,
tan nyandang uwah-uwuhin,
né iwang patut kadalih,
tur nyalanang twara santul,
pamuput nya mangkin sinah,
iwangé né kasungkemin,
kudyang nyutsut,
tingkahé kadong liwat.
31. Wantah
jati ilid pisan,
réh tan kanten antuk aksi,
né mawasta pala karma,
mingkin wasanannya malih,
sang tambet sukil nguningin,
kaling sang moyanin tutur,
sajawi sang anteng mlajah,
tur matimbang ring sang wagmi,
bu andulu,
karmapala mwang wasana.
32. Tityang
wawu sida ngedat,
manulad anak matangi,
kasidan warah idéwa,
ngimpek ngoyal manundunin,
nanging kari mrasa ngipi,
ilabin tingkahé langkung,
mukti sukaning kamurkan,
ngardi tan ngantas mamargi,
kari bingung,
banguné madaging ngundap.
33. Bilih
kabingungan tityang,
saking yoni mangawinin,
réh tityang mula raksasa,
mawak loba kopa drenggi,
kéweh ngutang manyusutin,
kadi I beduda iku,
padem yan ipun manulad,
isadpada sané suci,
ngisep santun,
réh mula mamukti camah.
34. Kadi
ipun I manusa,
dyastu tangeh maring diri,
kapingser ban I lelapa,
kudyang pacang maninggalin,
tulus ngayuh mangayahin,
sakaptin I basang seduk,
sapunika waluyannya,
déwék tityangé puniki,
nyerah utuh,
méweh ngutang momo manah.
35. Dwaning
matur sinampura,
mugi ratu tulus asih,
ring tityang i lobangkara,
tityang nglungsur padem mangkin,
mangdén tan maweweh malih,
momon tityangé kapungkur,
mangda puput mangkin pegat,
saking suwécan sang luwih,
sat gagutuk,
bekelang tityang ring paran.
36. Malih
yan iratu lédang,
wénten pyanak tityang siki,
saksat maka unteng manah,
lungsur tityang mangda hurip,
turin ipun kari alit,
durung uning lampah laku,
déréng patut kancap danda,
raré mundung kawastanin,
ndaweg ratu,
punika lugrahin tityang.
37. Mangdénnya
tan niskarya,
paswécan iratu ngurip,
ngurip ipun pyanak tityang,
mangda wénten mamreténin,
mamiyara manyayangin,
keni ipun tutug tuwuh,
méménnya becik huripang,
puniki lugrahin malih,
sang apunggung,
mula kopa mapinunas.
38. Réh
Déwa sat Sang Hyang Darma,
juru ngampurayang pelih,
tukang adyanin pinunas,
pandé ngelebur sipok hati,
undagi nerapang suci,
craki ngadyanin sakayun,
inggih punika lanturang,
tityang juru manunasin,
mangda durus,
iratu molihang yasa.
39. Kapungkur
yaning kasadyan,
ipun kari tutug hurip,
bilih sida manutudang,
kadarman iratuné luwih,
makirangin murka drenggi,
ngénakin sesaman hidup,
sinah mangawénang suka,
ring kayun iratuné luwih,
tityang milu,
molih suka ring niskala.
40. Sang
Subudi raris nimbal,
wacanané nudut hati,
nguda wayah ngutang iyang,
iju mawuwatang mati,
yan anaké kadi kaki,
nu gampang nyalinin angkuh,
apan madéwék utama,
boya watek buron kaki,
kwéh kaweruh,
apan wateking prasaka.
41. Ané
maadan prakasa,
ngelah manah cita budi,
bisa nyemak bahan lima,
majalan sok nganggén batis,
déwa yaksa miwah jadmi,
wangsa prakasa puniku,
makajang pada kahanan,
atma wisésa utami,
sapakayun,
yan teleb pasti kasidan.
42. Lén
tekén I watek gana,
soroh ya I kebo sampi,
watek ané masukupat,
makulit tebel tan tipis,
wyadin I watek pesi,
ané tan patangan suku,
kadi lalipi lalintah,
iris-iris poh jelati,
ento tuhu,
lacur tan ngelah prajnyan.
43. Mingkin
kaki watek yaksa,
utamayan tekén jadmi,
ngelah hidep liwat kuwat,
kasub pageh nangun kérti,
sakti wisésa mahekin,
krana raksasa kasengguh,
apan dadi juru raksa
sangkan Ida Sang Hyang Ari,
ida nguduh,
I raksasa ngraksa brana.
44. Nanging
ada luwir goda,
ngawinang santul di margi,
munggwing sang mawak raksasa,
ajumé ditu mayilib,
punyah ngawé kéweh gumi,
anggonnya mangalih kasub,
sangkan ento kaki tinggalang,
apikin lawan dihati,
mangdén suwud,
kaki mangundap tahunan.
45. Wiréh
suba kapragatang,
bahan Ida Sang Hyang Widi,
rurungé macanggah duwa,
sang nuluh yogya milihin,
sahanan tingkahé becik,
beneng kswargan manuju,
saluwir tingkahé hala,
ngungsi kanaraka ngilis,
suba puput,
twara pisan dadi obah.
46. Bwin
ada nyandang ingetang,
anggon darsana di hati,
kadi Sang Nandiswara,
mwang Sang Mahakala Jati,
mraga yaksa maka kalih,
ento imba nyandang tiru,
Ida ngemit Hyang Iswara,
yatna tan pangétang pati,
jatin ipun,
nunggal nindih kapatutan.
47. Da
tanwruh tekén awak,
né mula mawak utami,
bisayang mantesang raga,
ngadungang tekénin indik,
kala ngalih né utami,
gedénang ambaké ditu,
rasayang Sang Hyang Wisesa,
mula jati ngraganin,
pangda sumbung,
bisayang ningkesang awak.
48. Buwin
iyang maingetang,
tekén kaki ané jani,
yan saking ada acepan,
ngutang kasipokan hati,
tan nyandang mamerih mati,
wiréh né ngrasa nu hidup,
wiréh ya tan bisa pejah,
dyastu banya suba mati,
manggeh kantun,
mangrasayang né merasa.
49. Ngelidin
pangrasa corah,
mengkeb kajeroni mati,
patuh tekén anak bedak,
malaib kapuncak bukit,
bukit paras batu nginggil,
tuh dangkal tur ngliwat kebus,
joh pacang polih suka,
sangkan kawitin pinehin,
uli hidup,
patuté ngutangin corah.
50. Sawiréh
ada binannya,
hidupé kalawan mati,
hidupé tongos makarya,
dimatiné tongos mukti,
bwah tingkahé duk hurip,
sangkannya sejroning hidup,
nyuwudang tingkahé corah,
matiné tan mwat arti,
nyuwudang jaruh,
nging muktyang wohing tingkah.
51. Mirib
yaksa cengeh pisan,
clang resep ring arti munyi,
cedang tan kamer dimanah,
duweg madih beneh pelih,
mirib yaksa mula ririh,
sangkannya masawur kenyung,
nyinahang giranging manah,
inggih déwa Budamurti,
tityang nuhun,
tan tulak ring sawacana.
52. Wiréh
sampun tingglas pisan,
daging patuté né singid,
wacanan iratu mungkah,
boya wénten samar malih,
saksat kagemel kagisi,
kotaman warah iratu,
sangsayan tityangé tastas,
budi rurus mangentikin,
dwaning puput,
sapatuduh iring tityang.
