GEGURITAN - MENCEGAH KENAKALAN REMAJA

MENCEGAH KENALAKAN REMAJA

            Olih I Wayan Sukeman

PUPUH GINADA

1.     Polahé mapagubugan

Banget ketil ngemarginin

Mapan gelis ya ngelahlah

Indargamang  kadi ambu

Asing kadeket kaworan

Kawon becik

Banget saking pergaulan

2.    Bilih ring mengpeng yowana

Akéh gagodan mikatin

Ngiring pada sayagayang

Sastrané anggén panuntun

Tutur guruné resepang

Mangelidin

Nto kenakalan remaja

Teges :

1.     Inggih, pidabdabé ritatkala mapagubugan utawi bergaul ring pakeraman sandang Pisan punika yatnain.

Wiyakti dahat méweh ngemargin, mangda nénten iwang mamilih sawitra,

Duaning pasawitrané gelis pisan punika pacang ngelahlahin, yaning nénten pageh jagi ngamong raga, 

Yan rerehang pretiwimba, pasawitrane tan bina sekadi ambu yata bo napi ké miyik, bengu, andih lan sané tiosan, 

Sang sapasira kadeket antuk ambuné punika mejanten jaga kalahlahin, yan madeket sareng  sané miyik, kadeket antuk miyiknyané, yan madeket sareng sané andih, kadeket antuk andihnyané. 

Sapunika wiakti, kawon utawi beciké, banget mawetu sangkaning pagubugan utawi pergaulan, upamin ipun ; yan bergaul sareng sekha santhi sa-tené uning megending yan bergaul sareng bebotoh, sa-tené uning memotoh, sapunika taler sané tiosan.

  

    2.     Napi malih raris mangkin rikanjekan panedeng daha teruna kebawos masa pancaroba, 

Mejanten katah gegodané sané rawuh, yan iriki tuna antuk mikayunin mejanten dados ngulah laku, 

Punika mawinan mungpung kantun wénten galah melajah, ngiring pada sayaga, yatna sareng sami

Dasarin antuk daging-daging sastra agamané anggéang sepat siku-siku, pinaka titi pengancan ritatkalaning memargi,

Sapunika taler tutur pengajah sang rumaga guru, guru rupaka taler guru pengajian punika patut incepang ring kayun ngelantur laksanayang, 

Tatujoné boya sios, mangdané nénten iwang pagubugan utawi salah pergaulan, mangda sida raris kalémpasin punika sané kebawos Kenakalan Remaja.

Share: