MENCEGAH
KENAKALAN REMAJA
Olih
: I Wayan Sukeman
PUPUH DURMA
1. Aab
mangkin, kebawosang jaman global
Pengaruhé nglimbak gelis
Awanan sandang saringang
Mangda nénten purug jaman
Melaksana pelapanin
Timbang-timbangang
Encén beneh encén pelih
2. Truna
truni, pinaka penglantur bangsa
Ngiring sarengin mesanthi
Iriki ngrereh imba
Anggén sasuluh di raga
Pang ten kaworin ban kali
Keni narkoba
Miras kriminal sakalwir
3. Saantukan,
banget kobet penadosnya
Yaning sampun kakenénin
Penglanturé dadi sungkan
Janten rug ikang Negara
Awanan sadurung memargi
Wilah-wilahang
Mangda tan keleb ring margi
Teges :
1. Inggih,
yan bawosang kawéntenan jagaté sekadi mangkin, sané kebawos jaman global,
Duaning sané mangkin gadget sampun akéh,
internét sampun ngelimbak rawuh ring désa-désa, mawinan raris, janten pengaruhé
napiké sané becik sapunika taler sané kawon gelis pacang ngerawuhin,
Punika mawinan sampunang kedalon, gumanti
sandang pisan pengaruhé punika saring-saringin,
Tatujoné boya sios, mangdané nénten raris kateteh
antuk kemajuan jamané, napi malih mangkin taler kebawos jaman kali,
Sapunapi antuk ? sinalih tunggil rikanjekan
mapidabdab, maparilaksana patut yatnain,
Wilah-wilah ring sajeroning adnyana,
kayun-kayunin dumun
Duaning ring jagaté wénten rwa bhinéda, patut
kelawan iwang, sané patut ngiring anggéang sareng sami, sané iwang ngiring
kutang punika dohang.
2. Duaning
para daha teruna, punika sané kebawos génerasi muda, sané jagi ngelanturang kawéntenan
jagat indonésiané ngantos kapungkur
wekas,
Sekadi mangkin iriki ring arja widyaksara
sampun ngelimbakang pesantian, ngiring puniki sarengin, tonton utawi pirengang,
Riantukan ritatkala mesanthi katah kawedar
daging-daging sastrané, iriki raris sinalih tunggil genah ngarereh pretiwimba
utawi conto sané becik,
Widyā çāstra sudharma
dipanikanang tribhuwana sumenë prabhāswara.
pangawĕruh
daging-daging sastra dharmané luwih, pinaka suluh jagat tigané sané masunaran
dumilah
Mawinan
patut pisan sanghyang aji sastrané anggéang pinaka sasuluh,
Mangda
nénten raris, kalikub antuk pengrabdan kaliyugané, kapaid antuk pengaruhé sané
nénten becik,
Minakadinnyané
keni narkoba, inum-inuman sané munyahin, miyegan, ngelaksanayang sané kebawos “tindakan
kriminal”, lan sané tiosan.
3. Riantukan
mejanten pisan sareng sami jagi katibénin pakéwuh rawuhing kulawarga lan
panegara,
Yaning sampun kantos iwang mapagubugan, kaworin
raris antuk pengaruh kawoné punika,
Mejanten génerasi mudané jagi biapara, nénten
lingu ring among-amongan pinaka panglantur bangsa druwéné,
Yan sampun sapunika, tan wangdé raris pacang
rugada kawéntenan jagaté penadosannyané,
Punika sané mawinan, sadurung pacang
maparilaksana, ngeruruh sawitra, mapagubugan maprekanti ring pakraman,
Sandang kayun-kayunin dumun
Mangdané nénten iwang pemargi, kadi sasenggaké,
mebudi ngeruruh suarga, nungkalik nerakané raris sané kepangguhin, mangda
nénten sapunika.
