( IDA KETUT JLANTIK )
XV. PUPUH DURMA
XV. PUPUH DURMA
1. Nuli matur
Sang Sucita sada bingar, getar alus mangrenanin, beli sang swéca, maraga tulung
tan pegat, kadi tukad banjur mili, twara telad, saking nguni rawuh mangkin.
2. Tuhu
wyakti sang awataran citāsatwa, jati
sadu darma budi, prajnya susila, satya maring swamitra, twara rered metoh pati, kenyem girang, yén goda miwah tuyuhin.
3. Wyakti
luwih kadi toyané sagara, yadin ubek manggih bresih, inggih sapunika, yén tityang ngupamayang, kanirmalan kayun beliné, twara uwah, dyastun carén syang ratri.
4. Nawi
tityang katuduh antuk Hyang Titah, manados jun saksat patis, beli nganggén wadah,
toya mawak karma suka, pungkur
beli pacang mukti, ring swarga, nutug nyrewadi nyukanin.
5. Sané
mangkin sok tityang matur manunas, aluh
mangkin pungkur ketil, ampah kyulé malajah, takuté mamaksa awak, ngawé selselan
diuri, dadi sungsang, buwung nulung dadi ngindih.
6. Nggih
dumadak tan kapok beli swéca, sambil cucud manuturin, mangda sida énggal,
tityang bisa mayah tresna, puputang punika rihin, matirtayatra, tityang tan
purun nulakin.
7. Wiréh
sampun rumasa bébas ring manah, pitutur beli ngawinin, lwir pedang rahasia,
megatang anté indrya, aturé manekéng hati, sangkan lédang, Sang Subudi
mamyarsi.
8. Sampun
puput sang kalih mapasukéta, né bénjang pacang mamargi, wus negem ring manah,
nyambung babawosé lyan, hitep ngonjakan sastrāji, saling timbal, saling turut
saling tangkis.
9. Darma Jñyana
Wéragya lan Aéswarya, jantos lepah kabawosin, Sebet ngalih imba, anggén mitrangang
satwa, né nepék ngawénang ngarti, sangkan tingglas, ngenah ané mula ilid.
10. Ukuh matur
sang Sucita manunasang, indik Sang Hyang Wisnu nguni, duk matemahan kurma,
daweg das ngékārnawa, kagét cingak jadma prapti, sampun wayah, lintang nengah
tuwuh mirib.
11. Adeg
lanjar muwa tipis lihat cedang, nanging bungkukan akidik, tuwuhé ngawinang,
sinah bagus duké bajang, hyas sesaputané cepil, tindak dabdab, ngawas sambil
nyemu manis.
12. Sasampuné
sang kalih matumbak tingal, maring putusané prapti, sang kalih tedunan, ngadeg
ngaantos sang prapta, né sampun ngehes nampekin, saha nunas lugra ring ida sang
kalih.
13. Karihinan
sang kalih ukuh manyapa, tamyuné matur digelis, nggih titiyang nunasang, ring
iratu sang karowa, awinan tityang mariki, pacang yadnya, maring Sang Sucita
tangkil.
14. Antuk
warni tityang durung tatas wikan, kéwanten parab uningin, sangkan kadi ngadab,
dyastun tityang kantuncedang, ndawegang tityang ndikain, sang Sucita,
nyawur mitrangin sang prapti.
15. Mangalantur
ida nyapa tur nakénang, wastan sang wus prapti, miwah kabwatanya, tamyuné matur
manimbal, duh ratu sang bagus kalih, munggwing tityang, saking kautus mariki.
16. Wyaktinnya
babawose ngawé girang, rawuhang tityang né mangkin, doh ngawénang lara,
awinan sampunang selang, nanging kadi sada pingit, makawinan, yan wérayang
kirang becik.
17. Becik
nyanan tityang matur pakalihan, Sang Sucita manyawurin, bapa sang utusan, tan
nyandang bapa ngobetang, dyastunné ida dini, wiréh ida, saksat déwék tityang
patis.
18. Sing unduk
saluwir buwatang tityang, twara payu kajalanin, yan ida tan lugra, kéto
pidagingnya bapa, sangkan da sangsayéng hati manyinahang, né kabuwat teka mai.
19. Nadak
gantas iputusan nguningayang, duh ratu sang bagus kalih, wiréh wus kalugra,
sinah tityang manguningang, Ida Sang Dyah Karuni, ngutus tityang
ngaturang surat mariki.
20. Sambil
matur iputusan ngambl surat, ring kampék masawuh asri, tumuli katurang, saduk
sang Sucita nanggap, maprabawa linuh dihati, iputusan, matur dané ngamalihin.
21. Duh sang
bagus né mangkin tityang nguningang, wastan tityang puniki, I Mahadasraya,
mula wit parekan sayang, saking lami tityang ngiring, Dukuh prajnya,
juru emban Dyah Karuni.
22. Nawi
ajerih kakecap suraté ngentap, wiréh bawos anak istri, ngentap karna lanang, nuluh
uwat alit pisan, manuju untenging hati, lintang rungka, becik tityang matur
kidik.
23. Mangda wénten
nandan ngabih bawos ida, ngiring ngentap marga sipit, nawi wénten baya,
pamihalang miwah pamunah, mangda wénten manatingin, mangdén sida, kadi
angestining hati.
24. Niki
saksat sangkaning wit manah tityang, matur ring iratu mangkin, ndaweg juwa
gelisang,
ambil ida gustin tityang, réh anggén tityang ngetonin, solah ida, banget
bingung kirang éling.
25. Sering
nyaru ka batan pudak ngaraga, ngangken ongkeb ngalih tis, wahu tityang marika, éncol,
manyusutin tinggal, ryantuk tanggun kancerik, kenyem nadak ngaku sipenan ring
aksi.
26. Sujatinnya
déwa gumantunging tingal, ngawé sedih sering nangis, tembé pangguh tityang, ida
gelitik ngawé gita, nyatwayang Siti Sundari, mawiwaha, ring sang Bimaniyu
nguni.
27. Samaliha
tan pati kénak ngajengang, sering bengong mangangenin, lipya ngalih sekar, ajiné
sering kadatan, mangarga ring sang Hyang Widi, jantos tityang, sering ngentos
mangayahin.
28. Kalih
nahan ida ngandika ring tityang, saking madasar tan éling, manakénang satwa,
caritan I Déwi Sita, né manggih masatya laki, nuli tityang, matur kenyem
menyaruwin.
29. Ngudyang
ratu nakénang sang patibrata, iratu kantun taruni, banget ngawé runtag, ring
manah tityang ituwa, réh tityang kantun subakti, ngudyang tingal, tan becik
kojarin aji,
30. Sampun
sinah tityang sedih yan katinggal, uling alit tuyuh mreténin, mangandong
anyinggal, jantos luwur twara elad, cucud ngayah syang ratri, sambil tuwa,
satuduh tan nahan panggil.
31. Luwir
myara witing sekar érmawa, uling alit ngumpit gulis, mabulung manyiram, tan
ngitung tuyuh manyaga, kagét wawu muruk ngawit, tumbuh sekar, raris mabutan
managih.
32. Kudyang
twara dadi tangkejut ring manah, wiréh banget katungkalik, nyaluwagang manah,
dadi gering salah acepan, ngalih né tepuk lisik, duh ratu mas, sampunang
ja banget lalis.
33. Luwih ida
ajin iratu kayunang, wiréh ida sampun lingsir, sayan tan nyidayang, ngalih kus
miwah sekar, ngaryanin kalpika rimbit, karawista, ngiyasin siwamba malih.
34. Tityang
ukuh kantun matur sada panjang, gelis ida manyawurin, megat atur tityang,
jantos mrasa kendel manah, nanging ida anak wagmi, ébek tatwa, wacanané
sapuniki.
