( IDA KETUT JLANTIK )
XIV. PUPUH GINADA.
1. Atur
iraksasa nungkak,
réh somahnya teka nyerit,
magambahan nyangkol pyanak,
nyonyonnnya lambih ngalantung,
ageng luwir kukul kembar,
basang benting,
pungsedé melontod ngenah.
2. Makamben
poleng pandalan,
duhuran tud sangat ginting,
bulun batiskuning samah,
kukun macan manggé kalung,
bok gémpél maplilitan,
pasuranting,
mwa cengkrok gigi langah.
3. Caling
lengkong lanying pisan,
sat pedang pemancut hurip,
bungut lowér linggah nyebak,
lwir kori manjing kekubur,
kudang bangkén buron jadma,
mangaranjing,
kabasangnya saksat sema.
4. Mangelur
saking kadohan,
macan kidang res ajerih,
gajah waraké mangéngap,
irengan lutung macepug,
tangkejut kasép magisyan,
iraksasi,
nyagjag nampekin somahnnya.
5. Makerak
matabuh sugal,
beli tidong-tidong mwani,
dija saktiné ipidan,
dadi aluh kaka ngayuh,
tekéning manusa nista,
twara lebih,
twah duwang ukud nguda.
6. Apané
matatu rahat,
dadi tembé buka jani,
kadi macan agung nyumbah,
tekén kancil ikut perut,
sanget twara ngedalemang,
somah sakti,
ngudyang tusing makawukan.
7. Lek
dadi raksasa luwa,
kasorang wong duwang katih,
kalud nguda pecéh pesan,
lablaban ajembung embuh,
déh ira jani ngarepang,
nyérét getih,
pacang daharang papusuhan.
8. Tur
ira tan takut pejah,
yan musuhé lebih sakti,
kémad hidup kapacundang,
yan suba matindih kakung,
kéto iraksasa ngucap,
manampekin,
mwaninnya gelis manampat.
9. Uduh
nyai somah kaka,
tungkakang nyai mamunyi,
apang da nyambungin tulah,
tekén ida sang abagus,
réh murtining Hyang Wésnawa,
eda bani,
jalan ida sungsung sembah.
10. Yadin
nyai mawisésa,
nganggon pangiwané sakti,
sinah ento tanpa guna,
réh ida maraga luput,
Ida nganggon aji pegat,
Né kakemit,
antuk dwadasa darma.
11. Satondén
kaka ngalawan,
jeg lélo tan bisa ngritip,
bayu enduk turin runtag,
makakeb cara das lampus,
yan lawan sayan lumah,
sayan sakit,
yan sebetang mwah jengahang.
12. Nanging
yan sayan endukang,
sebeté sayan tunain,
mingkin hidepé kasorang,
ilangang kenehé ngungkul,
bayu lawut matuptupan,
kwat mabalik,
cara seger budi jenang.
13. Sanjata
tawah madaya,
ento ngéncél mangenain,
puser pengrasané bedah,
saktiné tan sida nempur,
wanén kakané ipidan,
meséh jani
nyaluk getap anyar pisan.
14. Krana
kaka matur nyumbah,
sanggup mangaturang diri,
nyai katekaning pyanak,
ajak bapa pacang nyungsung,
jakan nunas darma suka,
tur suwudin,
mupu sukan kamomowan.
15. Réh
sukaning kamomowan,
élah manggih sakit hati,
nanging sukaning kadarman,
langgeng etis dayuh nerus,
ento krana melah matyang,
kenehé runtik,
welas hatiné hidupang.
16. Ipidan
duk cenik nakal,
mati kabajang dumadi,
momo mangambekang corah,
mati manumadi lawut,
dadi tuwa kagét sadya,
mahan ngawit,
mawurukin darma tatwa.
17. Jroning
hidup sapisan,
sadya kadarmanné panggih,
tan kadi anaké liyan,
dumadi pang séket satus,
mara koné molih darma,
kéto nyai,
jalan suwud nambek corah.
18. Wiréh
disubané tuwa,
matiné terang nyagjagin,
disubané banya pejah,
mukti buwah karma ditu,
buwah tingkahé né hala,
pasti panggih,
ditu sangsara temokang.
19. Krana
jani sedeng melah,
ditwané bekelé alih,
buktiang dikadituan,
anggén nyupat halané ilu,
saksat itunian maguyang,
nguyak daki,
jani sutsutin kedasang.
20. Buwin
ada pinget kaka,
icening sahi ajahin,
uli cenik ya embanang,
bahan tuturé rahayu,
ajak apang kaduk enyak,
matuhutin,
kadi kecap sastragama.
21. Yan
kasép ban mangajah,
kaduk sigugé nuwunin,
dakiné kadong manungal,
yan gebeg méh babak belur,
bilih tan sida ilangang,
déning sulit,
nyutsut daki kasipokan.
22. Sangat
pelih irarama,
né tan ngajah pyanak cenik,
halan kuwangé mangajah,
tan wurung pacang katemu,
pamédan sipoking panak,
mangenin,
krana tan dadi ampahang.
23. Dumadak
nyai nutugang,
pitresnan tekéning laki,
suka bareng nyungsung Ida,
mawurukin darma patut,
ento ané idih kaka,
maka bukti,
saja tindih tekén kaka.
24. Kéto
munyin iraksasa,
ngalemes matabuh gigis,
sebeng enduk ningkes pisan,
lihat halep muwa nguntul,
karaksasannya tan parawat,
iraksasi,
ngaléyos masawur banban.
25. Duh
kaka jiwatman ira,
rawos kaka bes ngangenin,
mula kaka tongos ira,
maragatang yasan wadu,
ané madan “patibrata” ,
satyéng laki,
bani bareng suka duhka.
26. Ira
twara nyudi suka,
yan ngawinang sakit laki,
sidané nyukayang somah,
ento sadyan ira hidup,
wiréh ento kanggon sampan,
ngaliwatin
alunan bawasagara.
27. Ento
masih kanggon umah,
né ojog kayangé mulih,
mulih kajagat niskala,
ditu ira bareng kakung,
mupu upah katuyuhan,
duking hurip,
yan tan tandur apa alap.
28. Ira
sanggup tan ngawénang,
salwir ngéwehin laki,
asing pantes manyukayang,
ira nindakin tan takut,
nto anggon ira amongan,
jroning hurip,
sambilang ngantosang pejah.
29. Tahén
ira ningeh orta,
yan takut mutangang kérti,
tapa brata lan yoga,
pangkah nagih suka lawut,
ring Widiné mapiduka,
katungkalik,
nikel kaicénin lara.
30. Krana
ira twara tulak,
sapatuduh kaka jani,
mingkin ké mangawé melah,
kagrombong geni dyastu,
né sinah nyakitin awak,
twara jerih,
makaronan bareng kaka.
31. Né
muwani nyawur nimbal,
déwan patuté ban nyai,
nah jalan jani pragatang,
nuli ring sang kalih matur,
duh déwa hyang panembahan,
sang utami,
dumadak tulus paswéca.
32. Wangdé
tityang nunas pejah,
kadurus mamitang hurip,
tityang miwah pyanak somah,
puput katur ring iratu,
tityang nunas magurwa ,
ngawit mangkin,
lédang idéwa narima.
33. Sang
Subudi nyawur énggal,
ento wekasing utami,
nanging iyang maselselan,
ban tondén madéwék guru,
pangidih kaki tan sida,
twara misi,
eda kaki maselselan.
34. Né
jati guru adannya,
yén ida nyingak ngusudin,
mingkin mawéh panugrahan,
pramangké sidiné pangguh,
sadripuné nadak punah,
hati bresih,
réh ida sida ajnyana.
35. Nanging
masih twara gampang,
né madan sisya sujati,
né bani nyarwang raga,
kanggén subakti maguru,
ané kéto patut makatang,
wisik luwih,
ané madan panugrahan.
36. Nanging
bantas masawitra,
iyang tan takut nyanggupin,
saling emban saling jaga,
kadi manyamané adung,
pada saling paingetang,
né mangardi,
kerahaywaning sawitra.
37. Iraksasa
twara tulak,
né luh tansah mangiring,
agni sampun kaendihang,
maka saksi pada sanggup,
tan pacang druhakéng mitra,
silih asih,
tan pacang mamurug dharma.
38. Katah
tuturé kawedar,
saking Sucita Subudi,
né tiba ring iraksasa,
serawuhing somah ipun,
sadagingin dharmasastra,
né utami,
sang yaksa mawuwuh suka.
39. Sawyakti
tan wénten lémpas,
kadi warah para resi,
saking babawosé kedas,
muwuh kayun suci halus,
tekaning pratingkah awak,
sané bresih,
tan wurung mangawé suka.
40. Lan
gunan sajané nawang,
sidin telebé nyungkemin,
saktin wikanné ngandayang,
ngadokang né madan patut,
pulung mangawénang sida,
asing kapti,
teka aluh kaisinan.
41. Kadi
ida sang karowa,
sang Sucita lan Subudi,
wiréh tatasné ring saja,
kawruhé ditu makumpul,
sangkan satruné ngasihang,
dadi bakti,
lutut matemah sawitra.
42. Sapuputing
iraksasa,
sanggup masawitra becik,
sané sampun kesaksinan,
antuk Hyang Agni iku,
sang yaksa ngidih aksama,
nekéng hati,
ring ipun ibojog petak.
43. Duh
cening wanara petak,
da sanget sebet dihati,
sang sadhu anggon tuladan,
menggahé sakedap luntur,
yadyastu sang ngamusuhang,
nunas hurip,
tan wurung ida ngaksama.
44. Yadin
anaké nyebetang,
pepes mamancana nyilid,
sanget ngawénang sangsara,
yan lacur sangkala lawut,
yan teka nunas tulungan,
ngaku pelih,
masih tan lalis manulak.
45. Bahan
kayunné maumbah,
antuk sastra yoga sahi,
sangkan ajnyanané kedas,
kadi gedah bresih halus,
krana tumbuh kapiwelasan,
gung ngawubin,
iangkara puret taoan.
46. Yaning
watek mapowongan,
buka nanang momo hati,
tulén kulit komang-komang,
nurut salakun sang nyaluk,
miwah kadi panglamusan,
mapi hurip,
angkihang ban anak lénan.
47. Keto
twah twara bina,
sang blog manumadi hurip,
yan lacur rangsukin hala,
sipok tingkahnya tan wurung,
yan celepin kapatutan,
jeg nyukanin,
hidupé ban sasilihan.
48. Sanget
bina ring sang prajnyan,
né molih hurip sujati,
ida twara kapasukan,
ban jiwa mangéndah erut,
manggeh saking kasucian,
yan mamargi,
sangkan pamarginé lasya.
49. Ida
nganggén hurip tunggal,
tan nganggon jiwa aketi,
dyastu langcah jiwa samah,
né saksat danu mapengung,
ida belibis waluya,
teka kalis,
nyilem tan belusang toya.
50. Réh
nanang bingungang murka,
lwir peteng kejokan sundih,
pantas tindakanné ngawag,
pati gabag pati entul,
apa anggon mamedasang,
butan hati,
tulus nyerah kapacundang.
51. Daging
nanang manawegang,
ampura ugi né mangkin,
solah mamané né iwang,
pyanak cai bakat pandung,
saktin jahaté ngawasa,
teka nyelir,
tan ada nggon makelatang.
52. Cening
sawitran sang dharma,
dumadak gantas ngaksami,
mugi jwa nanang ngidayang,
maniru nyalinin angkuh,
ngiring ida sang karowa,
bareng cening,
jani ngawit masawitra.
53. Sasubané
mamarekan,
bilih sida kalahlahin,
réh Ida Siwa sakala,
mraga panglukatan bingung,
déning banya mawak nista,
yadin kincit,
nugraha jalan sandangang.
54. Edoté
tekéning lintang,
singké ento loba kadanin,
tidong melah kojarannya,
tan wurung matemah kéwuh,
bisa munah rasa kuwang,
nto sujati,
madan nyandang kabawosang.
55. Kadi
cekok lawen sekar,
natak sabahé ngulungin,
tuwah ambul jajangkannya,
ento melah nyandang tiru,
da kadi mameri ngamah,
tan ngingenin,
mati mamatu palanya.
56. Kéto
munyinnya iraksasa,
sambil nguntul ngindih pelih,
saha maningkesang awak,
sedeg munyinnyané enduk,
masih ngawé angen manah,
sang miragi,
ngengsapang sipoknya suba.
57. Brangtinnya
ibojog petak,
né nyleg lwir agni ngendih,
pangaksaman iraksasa,
madulur pamahbah luwung,
lwir blabar agung membah,
manglancahin,
agniné lingsem ajahan.
58. Ibojog
raris angucap,
uduh maman tyang mamuji,
ban cengeh nyalinin tingkah,
sébet ngutang né tan patut,
sat wisya dadi amerta,
kadi sukil,
ngeton surya tengah dalwa.
59. Jani
sambil iyang malajah,
nganutin sang darma budi,
ngengsapang kaplihan timpal,
anggon ngumbah dakin kayun,
bilih nyidayang ninggalng,
doleg hati,
né ngawé sasaring marga.
60. Ilalipi
nyandang tulad,
ngutang kules tan nglipetin,
dumadak iyang manyidayang,
ngutang sebet mangdén nerus,
mwah pyanak suba bakat,
nu mahurip,
mokoh ya magélohan.
61. Lintang
sukané dimanah,
ban manik hatiné panggih,
patut sanget suksmayang,
olas mamané puniku,
bahan myara nyayangang,
uling cenik,
mamreténin kanti bajang.
62. Tiyang
rumasa ring manah,
tan gampang ngimpasin pelih,
yaning twara maduluran,
asung swécan Sang Hyang Tuduh,
kapo ada pangaksama,
pican Widi,
ngawé tan tulus wiroda.
63. Kobeté
madingang manah,
Né getap ngesorang diri,
mangdén bani masawaka,
tekén sang sugat ring kayun,
alah nyeburin sagara,
suka mati,
yan padé muwukang manah.
64. Kéto
pangrasaning muda,
gampang sunglap rasa diri,
ané iying mrasa abot,
né abot mrasa ampung,
takuté nglawan manah,
dadi bani,
tungkas ngajak nyama kadang.
65. Krana
tyang ngajum pisan,
ring indik mamanné jani,
teka élah maséwaka,
ngasor tekén tyang ilutung,
saja maman luwih purusa,
sangkan bani,
ngalawan musuh di tengah.
66. Arang
anaké nyidayang,
ngelawan musuh dihati,
né sakti sekadi maman,
maciri pacang manempur,
sahanan musuh dijaba,
yan tan Widi
paswéca bilih tan sida.
67. Bani
ngaku déwék iwang,
tekéné tibané pelih,
tan takut ngaksamayang,
ring sang iwang nunas ampun,
nto jati anak purusa,
tuhu sakti,
ento madan pratimoksa.
68. Krana
iyang ngaksamayang,
yén maman marasa pelih,
sat mapatung meli melah,
ban pipis ampuran kayun,
angganing cara mayuda,
pada bani,
ngembulin ngrejek itungkas.
69. Sang
kalih menyeruh sugat,
kanti polih galih kasih,
pada mukti nasi suka,
maulam ban kedék kenyung,
magelut tegul ban girang,
lwir patemwing,
pratiwi lawan akasa.
70. Sang
Subudi lan Sucita,
kenyem lédang manyingakin,
marasa ring kretayuga,
réh katak ring naga adung,
pada kayunné ngajumang,
bané sapih,
pada wicaksana.
71. Makadi
ring iraksasa,
kasob kayunné tan gigis,
ban saksat agni mangobar,
kagét etis teduh landuh,
rasa polih mangatonang,
sang Mukasti,
duk somya kabajrājnyana.
72. Iraksasa
matur nyumbah,
ring ida sang bagus kalih,
duh déwa sang hyang sinembah,
sang mawéh hurip matumpuk,
jiwa kalawan ajnyana,
kahuripin,
agung ratu utang tityang,
73. Tambis
tityang ngangkep pejah,
jiwa ajnyanané mati,
reh pademé mamwat jahat,
tambet luwir peteng masusun,
idéwa kagét swéca,
ngicén sundih,
dados pangurip ajnyana.
74. Tityang
saha pyanak somah,
katur sapa druwé sami,
malih wénten jimat tityang,
pusaka wit saking dumun,
luputing sarwa sanjata
wus kapuji,
tur uning mamaya-maya.
75. Saking
sarat mangaturang,
mugi idéwa manampi,
saksat pangwales amatra,
reh icén iratu langkung,
rasa ping sapta mangjadma,
durung pasti,
tityang pacang sida mayah.
76. Kocap
ida sang prajnyan,
mula bébas lagas hati,
tan rered mangamong tiwas,
kaling ngraksa sugih takut,
tan nulak ring suka duhka,
apan kalis,
awinan tampén durusang.
77. Pan
jadmané durung manah,
sakadi tityang puniki,
pantes punyahang brana,
nging idéwa sinah luput,
réh kaprajnyané kuwat,
sakti sidi,
munah punyah pitung ambal.
78. Sang
Subudi nyawis nimbal,
tan iwang pangrawos kaki,
sujati ida san prajnyan,
ring arta kama tan suwud,
kagunanya tan katunan,
antuk bukti,
maring sakala niskala.
79. Sakéwala
palilayang,
yadin tan matampi jani,
iyang waluya makingsan,
pungkur sinah ngidih rawuh,
kalaning ada gunanya,
nanging jani,
bantas ngidih awak budal.
80. Tondén
iyang manerangang,
adan iyang makakalih,
né sang Sucita parabda,
apang kaki seken tahu,
sang Subudi adan iyang,
kéto kaki,
aja lali awya lupa.
81. Dumadak
kaki sang tinggal,
polih marga darma jati,
panjangyusa luput lara,
kéto masih cai lutung,
ajakya icening budal,
ira mulih,
mugi pungkur panggih muwah.
82. Ilutung
sedih manadak,
iraksas numpang ngeling,
ban raket lutut dimanah,
lawut jani pegat caplus,
krana magetih dimanah,
membah kaksi,
ngetél manadi yéh mata.
83. Yadin
patuh mrasa bahat,
sang katinggal lan ninggalin,
rodran jagaté ngawinang,
payu belas sang matemu,
pamuput pada mangucap,
lantur margi,
sambil muwat kaisengan.
84. Tan
carita teked jumah,
carita ida sang kalih,
Sang Subudi lan Sucita,
katah barayane rawuh,
magenti mara mangajak,
lwas malali,
sambil matutur-tuturan.
85. Yan
maletang kudang dina,
sang kalih marembug malih,
mangadungang pacang luwas,
matirtayatra ke gunung,
Sang Subudi sampun wikan,
ring tan kidik,
kakobetan sang Sucita.
86. Nanging
antuk anak prajnyan,
kobeté jerih mangili,
ngayuh mangaturang,
élah(aluh) ida ngilut tutur,
dadi tali lemuh kuwat,
ngedeng hati,
jeg tutut sang mula tungkas.
87. Cara
jukung sawat ngepal,
ban duweg itukang kemudi,
nuluh selah angin keras,
matitis ané katuju,
krana sangkalané mimpas,
suka panggih,
duk tiba ring pelabuhan.
88. Né
mangkin kapidartayang,
bawos ida sang Subudi,
né tiba ring sang Sucita,
dabdab wacanané halus,
duh adi bagus Sucita,
sang sutindih,
tuhu sawitra utama.
89. Awinan
beliné teka,
nguyain iyadi mai,
jaba dandan kaisengan,
masih ada buwat karembug,
mawosang indiké luwas,
ngajak adi,
kaalas matirtayatra.
90. Suba
beli ngarasayang,
kobet pakayunan adi,
sakadi imanuk angsa,
tembé manggih tlaga luwung,
sedeng nawu masileman,
ngalalangi,
sinah tong logas matinggal.
91. pagatik
cingaké nyapnyap,
nancep nusuk unteng hati,
pakosod kulité nguda,
kesed putih gading halus,
luwir anta waja kuwat,
negul hati,
kéweh saja pacang megat.
92. Réhné
maadan samara,
musuh sakti kéweh nangkis,
silat sulit mameletang,
sébet nuwis ngimpek ngimpus,
ngawé lara ngres makesyar,
ngilu ngidih,
jumahan kulit pagriyam.
93. Mula
macundagang jagat,
kayang déwa milu lilih,
kalingké mawak manusa,
ilu kapacundang hidup,
aget réh kicen lek manah,
ban Hyang Widi,
ada anggon nyangka manah.
94. Mawuwuh
ada pawarah,
sang wiku muwuh ring aji,
nuduh sukaning indrya,
bek maisi cetik racun,
dadi bibit sarwa hala,
mawak gering,
jahat dadi satrun tapa.
95. Beli
ngindayang nuturang,
dumadak adi manampi,
tingkahé ngated indrya,
né luwir balabar suluk,
ingeté malu cedangang,
cara ngendih,
kanti né ingetang hilang.
96. Yan
ingeté ané lumah,
kaput ngundap lamad harip,
ané lahat kaingetang,
sagerehan ribut bangun,
pada nagih dadoyanan,
mangrépotin,
déwéké imput ngencanang.
97. Saksatang
ikunang-kunang,
sarwané ingetang sami,
ingeté duk remrem kiyap,
sat peteng ideng tur libut,
makrana ikunang-kunang,
nyundar kaksi,
ngulapin ya pakabyar-kabyar.
98. Nanging
yan ingeté cedang,
nyundar galang nyalang bresih,
lwir surya tan kaalingan,
antuk mendung ngundap nguyuk,
kunang-kunang ané ingetang,
hudep sami,
makelplek téjannya punah.
99. Sangkan
ingetané cedang,
anggon dasar maminehin,
minah salwir kakencan,
da saking mangundap nguyuk,
réh ingeté kaput ngramang,
asing kapti,
sinah twara kasidayan.
100. Sawiréh
ingeté cedang,
né sajan tan mawor harip,
ento OMKARAPRANAWA,
ring dalem twas amungguh,
maraga sang Wénatéya,
gruda sakti,
né ngantegang ring tujuan.
101. Disubané
sida bakat,
ingeté né kenceng ngendih,
mara jumuning tuptupang,
papinehé anggén nempur,
saluwir kayunné rusak,
sinah lilih,
asing ané ngaduk manah.
102. Kéto
ban bagus magelar,
ngalawan indrya sakti,
muwuh warah sanghyang sastra,
anggon jimat sikep duhung,
apang kukuh sakti kuwat,
twara lilih,
nangkis kasaktin indrya.
103. Bawos
beliné punika,
boya saking mamegatin,
ané madan jatukarma,
karman adi ring sang hayu,
sok anggon nyangka indrya,
né umili,
apang da ngelos malabar.
104. Mangdén
tan ngancap ngalancah,
nganyudang kasatyan adi,
wiréh kasatyan punika,
ratuning kadarman tuhu,
surya yan ring sarwa téja,
Pasupati,
yaning watek sarwa déwa.
105. Sahanan
watek prasaka,
déwa raksasa lan jadmi,
yaning kasatyanané ical,
punah sangat nista pangguh,
tuwin ratu yan tan satya,
sinah manggih,
surud pmuktyanné ical.
106. Awinan
adi Sucita,
eda ima eda lali,
apang tangar apang yatna,
ngamong kasaktyan puniku,
nto anggon hurip pasaja,
nto bélanin,
carunin ban jiwa raga.
107. Sangkan
beli sada panjang,
mabawos tekén adi,
wiréh kaduk masubaya,
matirtayatra, né malu,
dewasané nandas teka,
mangdén adi,
sida nuwonin ubaya.
108. Mated
ida mawacana,
sawitrané kadesekin,
malih ida mangandika,
sambil ngelut ngusud-ngusud,
eda adi salit rasa,
bahan beli,
sanget sipok agung goda.
109. Tan
lami adi kakutang,
dihalasé bareng beli,
salah mukum tegul sabda,
kaduk sawuh ané malu,
nggih adi jalan lalwang,
hidep mati,
maktinin déwi kasaktyan.
110. Singnya
ada paswéca,
nugrahan hyang satya déwi,
gelis sida kakeniyang,
sang dadi mustikan kayun,
baniné ngated kisengan,
ring Karuni,
anggon banten satya yadnya.
111. Sang
Sucita wus rihinan,
mineh bawos sang Subudi,
rumasa seksek ring manah,
wiréh sami sakti wibuh,
tuturé nglawan smara,
pada sengit,
mayuda sejroning angga.
112. Luwir
papranging naga,
pada ngadu wisya sakti,
malilit milut milehan,
ring waduk malulunlulun,
ngejongang raga sarira,
krana paling,
nyambat beli lawut rebah.
113. Karingeté
deres medal,
luwir sabeh kenem mili,
enyak mirib upas naga,
nyembar umili malepuk,
matemahan toya wisya,
mangliputin,
sangkan Sang Sucita lupa.
114. Sang
Subudi gipih ngemban,
ngarep babayon sidi,
dasa bayu wus ginelar,
pacatma karegep sampun,
kaparahang ring sarira,
jahan meling,
Sang Sucita madekesan.
115. Sang
Subudi ngelut nangyang,
nyutsutin muka ngupinin,
wang jerone kendel nadak,
mated nginyuk makpak simbuh,
bueung imput payu lega,
ban ngetonin,
gustine matangi kenak.
116. Byange
payu manungkak,
nading pasegehan alit,
putrane jagjagin usap,
antuk tangan kiwa ditu,
lali kanane ngamelang,
cedok misi,
toya ulung nyiam wastra.
117. Ade
len wangjero bajang,
rupane bocok kidik,
uling ilu kasmaran,
edot manyanding sang bagus,
mingkin polih ngatep tangkah,
saking lami,
ngalih margi tong mabahan.
118. Jani
aget maan selah,
epot nyelag sada gipih,
ukuh ngelut nyangkol ngemban,
mangden nahan polih huwus,
indryane ngandeng nlaga,
saking lami,
lacur kasep karihinan.
119. Lawut
galeng cokor bakat,
payu nto sangkol arasin,
masih maan asiyupan,
ngecapin lahad sang abagus,
nanginng tan ngawe tunayan,
smara hati,
lwir agni nilap minyak.
120. Sang
Sucita sayang jenang,
kayun ne matutup gelis,
rakane nindih ngandika,
hentegang kayune bagus,
Hyang Kundalini regepang,
saking haris,
mangdén ajnyananné galang.
121. Pranayamané
rihinang,
laksanayang saking haris,
sanghang pranabayu haras,
isep saking lyanging irung,
tedun kapuser antegang,
mandén nungggil,
ring sanghyang bayubyana.
122. Lawut
pegeng patelahan,
sawusé medalang malih,
saking alon pangda sambrag,
bayuné medal kairung,
suba mrasa telah medal,
balik buwin,
huyup kapuser antegang.
123. Bwin
pekek cara ibusan,
terusang bulak-balikin,
pajalan bayu pang dabdab,
cenik halus turin rurus,
apang da mamegat-megat,
kanti sepi,
tan ada swara pirengang.
124. Sadurung
maranayama,
tegaké apanga gampil,
bawong lan bangkyang jegejang,
eda bengkuk eda nguntul,
masila masih sekenang,
tangan kalih,
leser dilulud takepang
125. Tlapakan
tangané kiwa,
takepang di lulud kiri,
kanané di lulud kanan,
kéto bahan apang luwung,
tur degengan pang da onyah,
mara ngawit,
mranayama kadi busan
126. Kenehé
da byahpara,
apang nuwut bayu ngilis,
munggah muwah manedunang,
duk mekek makadin ipun,
manahé milu encepang,
apang sepi,
tan ada krimikan manah
127. Sayan
lami kamargyang,
bayuné pang sayang alit,
pipitang apang nyidayang,
kanti twara munggah tedun,
degeng bareng ring manah,
dadyabesik,
incep luwir tan parasa
128. Ditu
mara madegdegan,
ajnyanané nerus sepi,
cedang twara kawaranan,
Hyang Kundalini né mungguh,
ring kibulbuwung umunggah,
pacang ngungsi,
kasiwadwara tan liyan
129. Uwat
alit né kahentap,
limpa katuncap pangrihin,
nerus jantungé kapatas,
ka mula kanta manglantur,
munggah terus malih ngentap,
slagan alis,
mamétél ka siwa dwara.
130. Wus
mungguh ring siwa dwara,
ring tunjungé lintang luwih,
sané malawa sahasra,
nyundar téjané ndih murub,
sadripu trimala punah,
hulap sami,
makeplek petengin galang
131. Sang
Sucita wus madabdab,
nurut bawos Sang Subudi,
gelis sampun kasidayang,
nadak kayuné jeg luwung,
cedang galang manarawang,
sangkan sami
penyakit manahé getap.
132. Wanan
rarud matinggal,
pabresat malahib paling,
nyalupsup ring sang kéndryan,
né lumah ngalawan kayun,
ditu seken tan kisidan,
wiréh ajrih,
ring sang prajnyan budi cedang.
bersambung ke Geguritan Sucita II
