I Wayan Sukeman
I.
PUPUH SINOM
1. Sembah
pangubaktin tityang
Uleng ring Ida
Hyang Widhi
Kasengguh Maha
Acintya
Ébek ring sajebag
gumi
Mangda lédang
mangakséni
Atur kawulané
jugul
Nunas tél
waranugraha
Waras rahayu
sinami
Ya ta landuh
Nora hana
kameranan
2. Swastyastu
panyembrahma
Utamané ring atiti
Kalintang
angayubagya
Égar manah tityang mangkin
Mapan sampun ngrawuhin
Antuk paswécan iratu
Nodya lan ngerastitiang
Wantah suksma ngwalesin
Yan tan manut
Nunas agung sinampura
3. Swadharman
sang meagama
Uleng ngerastiti bakti
Kecap sastrané margiang
Éling setata ring widhi
Melarapan kayun hening
Agama anggén panuntun
Né waluyannya pangemban
Wangun sajeroning urip
Yajña iku
Né pinaka seranannya
II.
PUPUH GINADA
4. Sang pradnyan
wénten mawosang
Utaman srada mwang bhakti
Katungtungin antuk Yajña
Éling melaksana patut
Manah wak lan
kayika
Apang jati
Nuut sané parisudha
5. Sané patut
pratyaksayang
Ulengang pisan ring ati
Kebawos bantang agama
Élingang tatiga iku
Mekadi Tatwa
Susila
Ané siki
Né mewasta Upacara
6. Sané
kebawosang Tatwa
Unteng sasuduk wiyakti
Kaucap tatuwek Yajña
Élingang ngiring plajahin
Mangda sida sami tatas
Apang pasti
Nénten kambang yan mayajña
7. Sané kebawos Susila
Utsaha laksana becik
Kanjekan ngewangun yajña
Encén né mewasta patut
Mebawos lan melaksana
Apang yukti
Nyihnang ambek subhakarma
8. Selanturnya
kebawosang
Upacara né kaping tri
Kocap polah parikrama
Éédan Yajñané manut
Maserana upakara
Ané marti
Niyasan Hyang Widhi Wasa
9. Sekadi adéng imbannya
Upacara saksat
kulit
Kalih Susila putihnya
Ento Tatwa sari iku
Mangda
sida masikian
Apang
panggih
Né madan
manik utama
10. Selehin tujon Agama
Utama pisan wiakti
Kalepasan né buatang
Ento ulengang ring kayun
Mokshartam jagadhita ya
Ané marti
Niskala skala kasukan
11. Serana nincap
tujuan
Unduk yajñané marginin
Kadi né munggah ring tatwa
Élingang susila nulur
Mapiranti upakara
Apang jati
Nemuang unteng tujuan
III. PUPUH DURMA
12. Sapunika,
yéning cutetang mawosang
Ulahang yajñané mangkin
Kanggén srana pasucian
Ento i rajah mwang tamah
Mangdané satwam menadi
Apang prasida
Nyuciang bwana agung alit
13. Sampun munggah, ring Manawa Dharma Sastra
Udaka kanggén ngedasin
Kumel ring angga sarira
Ento patut laksanayang
Mesiram ngedasin daki
Anggané nyalang
Nglantur kayuné bersihin
14. Sané kanggén,
nyuciang reged ring manah
Utaman dharmané suci
Kateleban pikayunan
Éling ngagem kepatutan
Mewastu sida kalilih
Ané ngranayang
Nora galang ring jñani
15. Selanturnya,
sané kanggén nyuciang jiwa
Uncaran aksara suci
Kotaman sastra agama
Ento pinaka pasucian
Miwah tapa brata luwih
Ané prasida
Nyuciang jiwané jati
16. Sané ka-pat,
yan nyuciang paidepan
Unteng kawruhané gulik
Kapatutan anggén dasar
Élingang mangda tan iwang
Melajahin sané pelih
Apan ngranang
Nyasar tan uning pemargi
IV.
PUPUH SEMARANDANA ( CILINAYA )
17. Selanturnyané
puniki
Utsahané mnain tingkah
Kampihang solahé kawon
Elingang Ida Hyang Atma
Mangda polih linggih Ida
Antuk pidabdab rahayu
Né kebawos subhakarma
18. Sakwéhing
sarwa maurip
Utamaning panrestian
Kamolihané dadi wong
Ento patut suksemayang
Mapan méweh kakeniang
Agetang pisan ring kayun
Nénten dados maselselan
19. Sesampun sida
maurip
Utsahayang mapidabdab
Karma wesana nénten doh
Ento nuutin laksana
Manut Subhāsubha karma
Awanan uleng ring kayun
Né patut jalan laksanang
20. Sané tyosan
kocap mangkin
Unteng tatujoning Yajña
Kanggén pinaka serana
Éling ring Ida Bathara
Melarapan upacara
Anggé pinaka penyambung
Nyujur ring Hyang Widhi Wasa
21. Sembah bhakti
ring Hyang Widhi
Uncarang sedina-dina
Kéngin ngaturang suksema
Ening kayuné ngarcana
Maduluran banten canang
Andus dupané malepug
Nulur daging pangastawa
22. Sampun lédang
Ida ngardi
Urip degdeg raga waras
Kerahayuan daging jagat
Ento panugrahan Ida
Malih wus kacumawisang
Ané anggo pangan kinum
Nika patut suksemayang
23. Siosan cihnané
bhakti
Utsaha manut swadharma
Kemargiang nekéng tuwas
Éling nulung wang kalaran
Mamiara daging jagat
Apang sida degdeg landuh
Namiang ring prtistana
V. PUPUH PANGKUR
24. Sabinaning yan
mayajña
Utsahayang mangda sida manut indik
Kecap tatwa Mpulutuk
Élingang pang tan iwang
Melaksana tanpa dasar ngulah laku
Ala janten temahannya
Nénten pacang mapikolih
25. Sekadi anak
memarga
Utamayang makta suar yaning wengi
Kanjekan ngentasin rurung
Élah mapan smpun galang
Mewastu memarga antar tur rahayu
Awanan Hyang Aji Sastra
Nika anggén suluh margi
26. Sané kinucapan
Tri Rna
Utang uripé tatiga linging aji
Kocap Yajña anggén naur
Ento kebawos Déwa Rna
Malih asiki Resi Rna mangelantur
Ané katiga Pitra Rna
Ngiring né mangkin tegesin
27. Sané kebawos
Déwa Rna
Utang uripé ring Ida Sang Hyang Widhi
Kéngin Ida Sampun asung
Éman ring sarwa Bhuta
Mapaica kauripan lan pangempu
Awanannya Déwa Yajña
Naler Bhuta Yajña glarin
28. Selanturné
madan Rsi Rna
Utang uripé ring Ida Sang mraga Rsi
Kapicayang pangaweruh
Entas saking ketambetan
Mawit Ida raris sida uning tutur
Awanan raris Rsi Yajña
Nika sandang nggén naurin
29. Sané kaping
tiga rakwa
Utang uripé ring Ida yayah bibi
Kénten taler ring leluhur
Embasé ring mrecapada
Mejalaran antuk Ida lan ngerungu
Awanan mapanauran
Nangun Pitra Yadya mkadi
VI. PUPUH GINADA
30. Selanturnya
kawedarang
Unduk yajña yan nganutin
Kala utawi masannya
Ené kepah kalih uku
Madan Nitya Karma Yajña
Ané siki
Naimitika Karma Yajña
31. Sané madan
Nitya Yajña
Ulah yajñané sesai
Klaksanang sadina-dina
Ento minakadinipun
Mayajña sésa setata
Anteng sahi
Nyakupang lima ka mrajan
32. Swadharmané
kelaksanang
Uleng kayuné tan gingsir
Kadi sisya ya melajah
Én Petani ya memacul
Maka sami pageh yasa
Anteng ngulik
Né pinaka swadharmannya
33. Sané malih
siki carca
Undagan yajñane arti
Kocap Naimitika yajña
Ento sekenang
mangrungu
Marti yajña né napkala
Anut sasih
Napi ké anut wewaran
34. Siosan Tilem
Purnama
Utawinnya Pujawali
Kalih Piodalan jagat
Ento maka sami mungguh
Maring Naimitika Yajña
Ada buin
Nu liu yaning bawosang
35. Satwang manut
tingkatannya
Undagan yajña wénten tri
Kanista Madya Uttama
Ento soang mepah telu
Manut mampuhé laksanang
Apang tusing
Ngeranayang biapara
VII. PUPUH DURMA
36. Sané mangkin,
Panca Yajña kebawosang
Uningin mangdané pasti
Kapertama Déwa Yajña
Ento katur ring Bhatara
Maturan maka piranti
Ané lascarya
Nekéng tuwas tan pamerih
37. Sios punika,
ngemargiang Déwa Yajña
Utsaha sané marginin
Kadi nangun Pura - Mrajan
Élingang taler miara
Marisak sampunang lali
Anteng ngayah
Nyihnayang manah subakti
38. Sané ping rwa,
Rsi Yajña kebawosang
Uleng katur ring para Rsi
Kadi ngaturang pdaksinan
Éling ring guru pengajian
Melajahin sastra mekadi
Antuk manah
Nulus tan ngajap pikolih
39. Selanturnya,
Manusa Yajña kawedar
Upacara sané suci
Kelaksanang ring Manusa
Ento pinaka pamyara
Mawit raré kantos lingsir
Apang sida
Nemu kadegdegan urip
40. Sané ping pat,
Pitra Yajña pidartayang
Upacara manut indik
Kaatur ring para pitra
Elas kayuné ngrastitiang
Mangda polih genah becik
Ane lénan
Né katur ring yayah bibi
41. Sios punika,
Bhuta Yajña kebabahang
Upacara sané suci
Katiba ring Bhuta Kala
Ento jati tatujonnya
Mangda somya ikang Bhuti
Apang nora
Nyengkalén ring wang maurip
42. Sapunika,
kidik indik Panca Yajña
Uning titiang wantah kidik
Kémawon uning nyambatang
Épot milu menyatwayang
Medasar pongah juari
Anggén melajah
Nora takut kakedékin
43. Sios malih,
indik yajña kepah tiga
Uningang tityang né mangkin
Kaping sikiné Satwika
Ento ka-rwa Rajasika
Muah Tamasika
Malih
Apang sinah
Ngiring né mangkin lanturang
44. Satwika yajña,
yajña né kemargiang
Uleng kayuné tan gingsir
Kelascaryan jroning manah
Ening tan pangajap phala
Medasar Srada lan Bhakti
Ané buwatang
Ngelaksanang Yajña jati
45. Sané munggah,
manut ring tatwa agama
Upacara sané yukti
Kebawos Satwika
Yajña
Éka medasar ban Srada
Manah lascarya
kaping dwi
Ané ka-tiga
Nika wantah Sastra
Aji
46. Sané kaping
pat, Daksina kebawosang
Uncaran Mantra
- Gitādi
Kaping lima nto kinucap
Enem madan Annaséwa
Muwah kaping pitu raris
Ané mangaran
Nasmita mangda uningin,
47. Srada ika,
pangegané né pastika
Uleng ngarcana Hyang Widhi
Kelascaryané
punika
Elas meyajña nekéng twas
Muah né madan Sastra
Aji
Asing meyadnya
Né kemargyang manut Indik
48. Saha Daksina, punia ring pamuput yajña
Utawi ngaturang sesari
Klanturang Mantra
lan Gita
Éédan japa pamujan
Maduluran gita santhi
Annaséwa ika
Ngaran penyanggra atiti
49. Sané mwasta, Nasmita mangkin bawosang
Upacara Yajña memargi
Kémawon boya tujonnya
Endog-ndogan sareng warga
Mangda kadén paling sugih
Apang ksumbungang
Nora ika donya jati
50. Sapunika,
kebawos Satwika Yajña
Uningang titiang né mangkin
Kocap Rajasika
Yajña
Ento yajña kemargiang
Medasar kayuné
pamrih
Apang kājumang
Ngédéngang déwéké sugih
51. Sang Pandita,
ngicénin Dharma wacana
Ulian mangda kucap ririh
Kayuné mangda kesambat
Ebék sastra kwéhing tatwa
Mabudi ngajap sesari
Ané perihang
Ngaran Rajasika iki
52. Sang mapunia,
ulian mangda kbawos dana
Ulian kayun pamerih
Kancan tapa upawasa
Ento stata kelaksanang
Mangdané molihang daging
Aji kasaktyan
Naler Rajasika
nami
53. Selanturnya,
iki Tamasika Yajña
Ulah Yajñané memargi
Kéngin tanpa dasar sastra
Edoh saking tujon yajña
Meyajñya nuut-nuutin
Asal mejalan
Nto Tamasika
kwastanin
54. Sang meyajña,
sanista madya mottama
Ujar menaké wedarin
Kelidin mambekang kroda
Edohin letehing jñana
Mwang kecampuhan wéci
Aywa kasingsal
Né ngranang tan mapikolih
55. Sang akarya,
sampunang ngalem drewya
Ujar Déwa tattwa aji
Kaliliran wwang uttama
Ento anggo tatuladan
Mangda rahayu kepanggih
Ayu phalanya
Nginutin kojaring aji
56. Sampunang ja,
matungkas kala meyajña
Uneb rasa iri drenggi
Kelidin sané ngawetwang
Érang maring pakayunan
Mangda jati-jati hening
Asing pidabdab
Nému kasidaning kāpti
VIII. PUPUH GINADA
57. Sapunika wus
kawedar
Unduk yajñané akidik
Kémawon banget lédangang
Eleké nénten karungu
Manah tityang melajah
Agung sisip
Nunas banget pangampura
