KIDUNG RIKALA WALI KAPITU DI DESA PAKRAMAN TALEPUD

KIDUNG, TEMBANG, GENDING SINDIHAN

 RIKALA KARYA KAPITU RING PURA PUSEH

DESA PAKRAMAN TALEPUD – BANJAR PUJUNG KAJA - GIANYAR

KIDUNG KAWITAN WARGASARI

1.   Purwakaning angripta rum ning wana ukir, kahadang labuh kartika, panedenging sari, angayon tangguli ketur, angringring jangga muré.

2.  Sukania arja winangun winarna sari anggoling  tangi sampuni riris, suma hura rum rumning puspa priyaka munggwing srengganing réjéng.

KIDUNG WARGASARI

1.    Widiadariné tumurun, ngegana di ambarané, anonton sekaré harum, ambunia merik sumirit, kaula pada manangkil, presama manunas ica, mangda gelis turun, ring pura malinggih.

2.   Warga sariné kapitu, ana nonton palinggihé, énak manah muang kayun, anut satingkahé sami, sapalinggih tanpa gingsir, umarek ring guru mangké, dinagé umatur, nunas amertha sari.

PANGUKUP SANGHYANG

1.   Sanghyang sampat, mariki turun malingsé, malingsé mangda becik, mangigel sereg-seregang.  3 x

2.     Seregseg-seregseg sira yayi turun sira manalimat.  3x

3.     Sri ayu putus, kajalunggah lumaris ledah, uladana-uladana, sri putus mgonjar-gonjar. 3x

4.     Unya-unya urut-urut, urutang ayu dedari ayu dupdupang apanga sirep.  3x

5.   Dumara ngegana dumara sidi, ana nembah diarepé tumurun Betara Indra, Widiadara Widiadari anggon Sanghyang

6.     Dumara ngegana dumara sidi, dupdupang panga lali puniki ganjaran sira pulpulang pang déldélang, pang énggal-énggal nadi, ingsuna katon karma  mengajar, kebiar kebiur, gending gumuruh ajari pang rawuh, né manudtdut gending gumuruh, kén ijo mangké nutdut manah, nutdut manah, dotdotin madiané ramping, ikang centéng ya ikang mondil, katungkul majejogédan.

7.  Kukus gunung, cenané pangundang déwa, manguda déréng nurunin, tidong turun manyogéd, manyogéd eleg-elegin, mangepil-epilang oncér, oncér idané aduh déwa ya sutra dadu, ya oncér idané ya sutra dadu.

8.     Merak kekincir kuning, payas ijo mawangsul lilit, mangigel tengahing natar, igelnyané ya lenta lenté, matanjek magulu wangsul

GENDING  SINDIHAN

1.   Dundunan nira bangun sedekan nira mangipi pan, ngipi luwas ka gunung agung, jalan emasé mapunya pan, mabangsing-bangsing selaka, madon garingsing wayang pan.

2.  Mén grobiag mén grobiag, tidong bangun ngundang pandé pan, pandé  mas pandé selaka  pandé gong ika malih pan.

3.  Mbok-mbok batur mbok nyak ndek dini pan, lamun nyak ndek dini tiang prapitanga bungkung  pan,  bungkung  mas  bungkung seser masesocan mirah ratna pan.

4.   Tuktuk pemalu punyan jaka suba kembang, bangun déwa malu mangilehin balé kembar.

5.    Nyampat macuniga mabanten sumping kuladi,

ané nyampat dadi déwa né mebanten dadi gusti,

para déwa turun mamuja, para gusti turun mabaris,

nyén teka uli kaja macengkeg pucuk akatih,

apa ké runtutannya jebug géngong naga sari.

6.    Temba-tembé jani kucingé maumbi sabrang,

ibiaung buluh iyis-iyis tambang-tambang.

Tumbén-tumbén jani buncingé mangupah rejang,

gungdé ayu mangilehin balé kembar.

7.    Tambat-tambat kayu antel, buka kudapan kedongdong,

ngarondong sayan mabudi, mabudi sereg-seregang,

nyén teka uli kaja jejambulan nyané songkrong,

macengkeg pucuk akatih, tong dadi bana nyangkol,

kaukanga katulung-tulung,

tulungina kén i bendot entunganga magelebug,

tiang tingtingan di jelingjing,

mendok mendok dijalimpang layak-layak buka lutungé  puruh.

8.    Nyai wanda nyai wanda, mabungkung emas ké arepé, titiyang mamindah kayun  sang Prabu, yadian titiang mabungkung sumpé, lamun pican I Kaka Panji. Nyai wanda nyai wanda, magelang emas ké arepé, titiang mamindah kayun sang  Prabu  yadian titiang magelang sunan lamun pican I Kaka Panji. Nyai wanda nyai wanda, makalong emas ké arepé, titiang mamindah kayun Sang Prabu  yadian titiang mampok-ampok kau bulu lamun pican I Kaka Panji.

9.   Kaki kaki celogan nguda baong kakiné lantang, sangkan lantang baong kaki maninjoin galuhing daha pan. Kaki kaki celogan nguda batis kakiné lantang, sangkan batis kakiné lantang manimpahin galuhing daha pan. Kaki  kaki  celogan  nguda kampid kakiné lumbang, sangkan lumbang kampid kaki mangukupang galuhing daha pan.

10. Bangkén-bangkén barong delod nyané tuara tawang pan, Klan berek klan aking klan tumbuhin kekara pan. Tondén tondén mayah I Madé managih upah pan, upah  apa tagih nyai upah medem dibi sanja pan, baang baas baang pipis menagih  cerangsang mas pan.

CECANGKRIMAN

PUPUH PUCUNG

1.   Kerat kerut, bintang  ulung manelebuh, babérokan dadua, umbul umbulé akatih, ulu telu sasukuné dadi adasa.

2.   Capluk capluk rangdané ya sampun tedun, naga banda makebéran, manututin srayang sruyung,  kiwa tengen ya maninjak.

3.   Dekdek remuk guminé pada kalulu, bah pajulimpang, irika ring taman sari, mangkin sampun pamuk rangdané mararian.

4.    Sagét rawuh anak gondong rata tedun, gohnyané apasang, mablagbag tur ya  matali,  carat-curut, né gondong rata ngelayab.

5.    Sagét rawuh alit-alit pacarungung, wawu pada gombrang, kagetep rambuté sami antak untuk pangénteré  manabdapang.

6.    Pada puguh mayasa ring taman santun, jantos tigang ulan, yasané  sampun maciri, tur makeplug, larapan dadi amertha.

7.  Berag landung, madué putra sepa satus, sami mewastra gadang, sami pada ngunus keris, nyangsan duwur, rambuté nguning-nguningang.

8.  Ngawé gemuh, risampuné  pada mapunduh, né patut élingang, upapalin ika sami, mangda nglantur, iratu mapica merta.

9.    Yadnya iku, patpat né kapuji katur, daun sekar miwah, toya ening ika malih, sregep sampun aturané ring Bathara.

10.  Pamekas ipun maka dasar pamikukuh, larapan mayadnya, trikayané maka titi, patut ipun riyin kaparisuda.

11. Laksana ayu rawos masih mangda ayu, kayuné pang melah, ika sami mangda suci, mangda nerus, budhi wak laksana melah.

12.  Sandat jepun jempiring saroni menuh, cempaka sarikonta, tanjung pérak naga sari, sandat gadung, lawan pudak cinariga.

--------------------

1.  Déwa tulis nagasari, tumbuhé di taman sari, maancak saji, maserung mablungbang, masungga puling, sinah tan sida ngaras pipi, i ayu mungguh ring tengah.

2.  Yaning mula saja sarat, tegarang malu lampahin, masa tan misi, yaning mula sarat, nguda masirig, ya i nagasari ya kasisi, nangingké melahang nganggo.

--------------------

1.     Déwa  kadi sekar sandat, né tumbuh di taman sari,  maserung turing mabingas, maiter baan sungga duwi, mamanah  titiang nyumpangang, yan penékin, sinah titiang sinangkala.

2.  Nguda dadi sinangkala, yan sampun sangkaning yukti, meled pacang nyumpangang,  sekaré ya bisa ulung, kéwala lantur sumpangang, yaning layu, da iju jeg mangutang.

3.    Nguda iju sagét kutang, suba tawang sekar miyik, sekar sandat tuwah kusuma, selayu layuné miyik, doh para lakar kakutang, sai ayumin, jagi anggon bungan manah

4.    Kéwala sampunang lémpas, panca satiané kukuhin, satia hredaya wacana, satia laksana malih, satia semaya lan mitra, tegep sami, yan lémpas mapala  ala.

PUPUH  GINADA

T.  Mula saja buka kéto, né patut sandang lakonin, anggén sesuluh  di raga, mangdén pejalané ayu, tegarang jani bacakang, apang pasti, tiyang nyadya madingehang.

D.   Né madan satya hredaya, pageh pikayuné yukti, né madan satya wacana, tindih ring pangucapé tuhu, né madan satya semaya , tepet ring janji, satya mitra tindih ring timpal.

PUPUH  PUCUNG

 D.  Madak ratu, wénten ngicénin pitutur, né madan sad guna, bacakan gunané luwih,    mangda tulus, titiang mangguh kerahayuan.

T.   Déwa ayu titiang nyadia mapitutur, né madan sad guna, asiki né madan sandhi, teges ipun, pradnyan minehin né buwat.

T.   Wigraha iku, madué timpal satya tuhu, né mawastu jana, satya wacana polih malih, sana iku, wikan maningkahang raga.

T.   Dwésa iku, pradnyan macacidran tuhu, né mawasta sraya, ngarereh timpal né sujati, satya tuhu, mangda mangguh karahayuan.

 D.   Beli bagus, tiyang lega miragi wawu, madak beli satia, sida ngelaksanayang sami,                sinah ipun, pacang mangguh karahayuan.

D.   Yéning sampun, laksanané sami ayu, rawos masih melah, pekayuné taler becik, nika sampun, tri kaya parisuda.

SINDIHAN

T.   Bawang-bawang kesuna batur, kulit taluh encak-encakin pan,

Suba tawang teruna lacur, uli eluh ngajak ngajakin  pan.

D.   Ngaba gerang darané sangkur, nasi tumpeng misi pétsin pan,

Suba tawang dahané lacur, sbilang peteng kalemesin  pan.

T.   Ubi dara metanah-tanah, kadén tomat kadén belimbing pan,

Dadi daha da ampah-ampah, tondén tamat suba beling pan.

D.   Umbin kesuna nu matah-matah, batun sabo merai-rai pan,

Dadi teruna da ampah-ampah, kumpul kebo sai-sai pan.

T.   Punyan wani kereng ngembadang, payonané mula mayanin  pan,

Jalan jani bareng dabdabang, rahayuné jwa kardinin pan.

D    Gedang matah suba ia manis pesan, sabo bali mula ané paling manis  pan,

Titiang wantah gumanti misadia pisan, jaga ngardi né mewasta becik  pan.

dang dang dang dang dung deng dung dang ....................................

Ngiring mangkin né dabdabang, sareng sareng sinamian, tri kayané jwa kukuhin,  kayika wacika ika, manacika malih asiki, laksana rawosé melah, pakayuné mangda becik, cik becikang sareng sami, ngiring né mangkin riyinin, mangdané sami rahayu kapangguh.

PUPUH  GINADA

1.    Né mangkin titiang prasangga, jagi ngaturang petangi, né madan sapta timira, né mateges peteng pitu, madak nénten kaliputan, nika yukti, larapan mangguh sengkala.

2.    Punyah antuk kesugihan, antuk pradnyan ika malih, punyah déning kantun bajang, miwah antuk wangsa luwih, punyah baan rupané melah, turin sakti, miwah punyah ring kagungan

3.    Punika patut tlektekang, mangda tan wénten mamurti, sawiréh wantah punika, larapan tan mangguh ayu, ngiring  ké mangkin saratang, sareng sami, mapakardi karahayuan

LILIT LINTING

1.   Lilit linting, lilitin madiané ramping, sampun ramping ya sampun ceking, memaretin rejang légong.

2.  Lintang langsing, madia lemuh magoléran, tayungané ya membat-embat, matuntun lawé tukelan.

3.   Wantah asri, widyadari lédang manyingak, raris lédang Ida malingsé, malingsé ring sané ngarejang.

4.    Rejang lilit, malilit tur mauderan, mewali-wali muderan, melilit mangilehin  pénjor.

5.    Pénjor wali, penjoré wantah mecarang, mecarang nemnem né katah, maartos ika sad guna.

PUPUH  PUCUNG

1.    Sasuduk ipun,  ngawé pénjor agung luhur, turin ya mecarang, punika satmaka ugi, gunung agung, né patut wantah suciang.

2.    Wiréh ditu, kocap widhiné malungguh, muang Déwa Bethara, miwah Déwa Hyang sami, sangkan ditu, dadi ulun parhyangan.

3.    Uli ditu, iraga ngulengang kayun, ngaturang cepala, miwah sarin tahun yukti, né kagantung, di penjoré sowang-sowang.

4.    Sangkan ipun, rejangé milehan ditu, mideh pradaksina, cirinya pada subakti, teges ipun, manut arjuna wiwaha.

5.    Duk punika, widiadariné papitu, kautus ka Indrakila, ngoda sang Parta né luwih, sadurung lumaku,  nganjali pradaksina.

6.    Mula liu, marga ané bakal tuut, manut catur marga, patpat margané sujati, wantah iku, anggon srana ngungsi sunia.

7.    Teges ipun, catur margané puniki, bakti marga kapertama, susrusa kayuné yukti, 
     pageh puguh, ngrahina matrisandya.

8.  Teges ipun, jenyana marga puniku, mateges susila, laksanané sane becik, mangda sadhu, solahé tan naen obah.

9.  Teges ipun, karma margané puniku, setata meyadnya, langgeng kayuné tan gingsir, pageh puguh, sadina ngaturang canang.

10.   Teges ipun, raja margané puniku, wantah né paling utama, yan sida ban ngelaksanain, sami ingkup, tri margané klaksanayang.

REJANG LEGONG

1.     Swastiastu, ratu titiang

Madak sweca, ngampurayang pangayahé

Mengaturang rejang légong lintang nista

2.     Sané mangkin, titiang nunas

Lédang ngaksi, sané ngayah swéca ratu

Manurunin mapaica sari amerta

3.     Mangda Sami, kaulané

Mamanggihin, karahajengan gemuh landuh

Kerta raharja, jagaté ring madya pada

MUNGGAH

Suba emar ya suba tuyuh, sumbuné meprapit emas,

Ngaja kanginan déwa ngaja kanginan mangojog kori agung,

Kori agung ukir-ukiran, ukiran gedong melati.

Menék-menék reké sanghyang kajempaka,

Tuwun-tuwun reké sanghyang ka beingin,

Nira kema reké sanghyang nora kasapa,

Titiang mulih reké sanghyang pangelingin.

Atep puput, atep puput, atepin ayu dedari,

Ratu mantuk ka suwarga, titiang budal ke paturon.

Makrég langsé, langséné anyar, mapindaan niwang sengsari,

Aruh mapindaan niwang sengsari.

Item-item tapuk manggis, temuné bubur bungané,

Selem sedek kenyung manis, putih gading tara gunana,

Aruh putih gading tara gunana.

Bintang siang reké sanghyang tumbuh kangin,

Kasunané reké sanghyang tarik mabunga.

Apang tangar nyai deha kayeh kangin,

Tarunané reké sanghyang masang guna.

Guna apa reké sanghyang kepasangin,

Guna pulet reké sanghyang pang kalilit.

Mulih insun mulih, mapa insun di suwarga,

Apa rarapan insun mulih, bantal tebu mapahias.

Mulih insun mulih, mapa insun di suwarga,

Apa rarapan insun mulih, wastra alus selendang petak.

Mulih insun mulih, mapa insun di suwarga,

Apa rarapan insun mulih, simsim sengkang pinggel emas.

---------------

KIDUNG WARGA SARI

RIKALA MUNGGAH CANANG

1.     Upacarané wus puput, banten canang muang ceniga, sampat tikeh dupa arum, punika sampun cumawis, dupa penastan sekar merik, banten canang punika, né pamekas daging ipun, wantah ubi kladi.

2.     De mangku raris malungguh, angregep angranasika, ngastawa maatur-atur, ngastiti Bhatara sami, réh ngaturang puja wali, banten pamunggah canangan, mangdén Ida asung, mapica amerta sari.

3.     Pangastawané wus puput, pangénteré raris nyampat, ngebatang tikeh ring ayun, canigané munggah mangkin, banten canang manulurin, sami munggah ring palingga, magelar asep ring ungkur, sampun sregep maka sami

KIDUNG WARGA SARI

RIKALA NELES

1.    Bhatarané wus malungguh, pamangkuné menabdabang, patelesané jaga katur, sregep upakara sami, toya siram sekar merik, kumkuman toya cenana, muncuk kusa sergep sampun, duwegané makasturi

2.    Minyak wanginé puniku, wewadah batil kenaka, kapas petak dulur ipun mawadah bokor mas manik, maukir sami mangrawit, yukti angob sang ngantenang, pantes wantah iku, katur ring Bhatara sami

3.    Pamangkuné siaga sampun, jaga nedunang pralingga, pratimané ngendih murub, apan linggan Sang Hyang Widhi, sané dahating suci, tedun maring mercapada, lédang Ida turun, mapaica amertha sari

KIDUNG  WARGASARI

RIKALA NGATURANG PABEYAKAONAN

1.    Byakaonané mangkin katur, Pemangkuné ngastawayang, Penampa lan penyadé mangku, Pangiring pada mesaksi, Pangancangé sutri malih, Sami pada nganggé dupa, pengacepé sampun, sabda rahayu nulurin,

2.    Pamrayascitané katur, Margiang peras lisé, Paklemigyané puniku, Kasurya margiang rihin, Pangastungkarané sami, Surya candra lintang teranggana, Panglukatan puniku, Mangeseng malané sami

3.    Paklemigyané katur, Manunas waranugrahané, Ring Ida Hyang Sinuhun, Nglukat kacemeran sami, Sarwa kala buta buti, Sami  sampun katuran laba, Mangdané sida rahayu, Ngastawa Ida Hyang Widhi

NGEMARGIANG TIRTA BYAKAONAN

1.    Byakaonané sampun katur, Miwah peras lisé, Panglukatan anggén nurut, Pabresihan sanjiwani, Kasurya margiang rihin, Ring Kahyangan Pangubengan, Raris mider iku, Puputé ring jaba sami.

2.    Adegang Hyang Siwa dumun, Makiré ngosokang lisé, Ngentas lis taler sampun, Ngampehang letehé sami, Ida marisuda sidhi, Mangeseng nganyudang mala, Saking dabdab dumun, Margiang saka siki.

3.    Kakedeke sampun katur, Margiang tepung tawaré, Kakosok kakrik jamas iku, Susur lisah lenga wangi, Tatebus punika malih, Saka runtutané pada, Madudon-dudon sampun, Puput raris kayabin

MENDAKIN ( NGULAPIN )

1.    Ong Ksama swamam pakulun, Manusa nunas lugrané, Tityang purun pungu atur, Ngiring prakanggéné sami, Mendak linggih Ida sami, Masedana upakara, Sami sampun pada katur, Nuntun antuk warga sari.

2.     Mangkuné metaténg lungguh, Menyaksiang patotyané, Sami pada ngawakukus, Maduluran pangebakti, Pamendak sampun cumawis, Canang suci lan daksina, Sami sampun katur, Ring para Bethara sami.

3.     Pangulapané katur, Mangaturin Betharané, Mangda Ida gelis turun, Suéca Ida mangrawuhin, Gégér iringané sami, Turuné saking ambara, Dedariné makwéh turun, Nodya maréng jagat bali.

4.     Daksina lan canang arum, Pamendak Ida Bhatarané, Mangda Ida gelis turun, Turun saking swarga luwih, Para sutri sami tangkil, Mengayapang Betharané, Ida gelis rawuh tedun, Sami pada kalinggihin.

5.     Mesaksi munggah kaluhur, Manunas waranugrané, Menawi kirangan atur, Agung sinampura ugi, Canangé asebit sari, Ica Bhatarané manonton, Nodya saking luhur, Ngardi rahajengé sami.

-----------------------------

PAMARGIN IDA BHATARA KA BEJI

1.     Bandrang lonték tumbak tedung, Payung pagut canang gedé, Sareng nini déwa galuh, Matuntun baan benang putih, Sami malinggih ring jempanané luwih, Mangku gedé nabuh genta, Madudonan sampun, Warga sari ramé ngrawit.

2.    Pamarginé abra murub, Sareng sami Betharané, Mangkin munggah ring balé lujung, Prawu jukung mangébekin, Irika Ida malinggih, Maring pinggiring segara, Iringan makwéh rawuh, Sami pada menangkil.

3.    Aswé ring segara agung, Malon-alon lampahé, Paluncat pada sadulur, Tan kocap suwé ring margi, Prapta gelis ring pasisi, Malayar ngulati swan, Ngalemat medayung, Turun Ida ring pasisi.

SAMPUN NAPAK RING BEJI

1.    Rawuh Ida Hyang ring luhur, Kawula nunas icané, Ngaturin Bhatara turun, Napak maring taman béji, Kawula ngaturang suci, Penyapuh leteh kahyangan, Mangda suéca turun, Kaula menangkil.

----------------------

RIKALA MERAS TOYA

1.    Beleganjuré ya di pungkur, Bedil kulkul tikusané, Kabinawa karyan iku, Katon abra sami asri, Sampun rawuh maring béji, Demangku nguncarang sea, Sané dumun katur, Meras toya sampun luwih.

2.    Ong sang tabéya pakulun, Angentos paripujané, Bethara wisnu tumurun, Ida nyeneng prabu mantra, Landuh udan kreta bumi, Ong sri wé namaswaha, Palaboga pala gantung, Sasab merana lina sami.

3.    Pangénter pengancang mangku, Ngenampekang pada agé, Pangresikan sampun katur, Wajik tangan cokor malih, Makurah keramas luwih, Sampun puput pasiraman, Mengayab sarining kukus, Paduka Bethara sami.

PEMARGINE RAWUH SAKING BEJI

1.    Pemargin Bethara mantuk, Titib seiringané, Bebaktané sregep sampun, Sehanané kamarginin, Makedap-kedapan asri, Kadi gerah kepanesan, Tinibénan jawuh, Sami pada pakurining.

2.    Prekanggén Bethara turun, Natasang daging baliné, Pemarginé mubu-mubu, Tanucapang maring margi, Gelis prapta maring bali, Damuhé sané mamendak, Sayaga manyungsung, Sampun napak maring puri.

3.    Mangku sutri pada incuh, Mamendakin Betharané, Saha upakara sampun, Asep canang ganjaran malih, Tabuhan maayam alit, Sami pada kerahajengan, Pamendak ganjaran agung, Masambléh ulamé luwih.

RIKALA NGATURANG RAYUNAN

1.    Mangkin masehe demangku, Linggih katur ring déwané, Ngastawa déwa kimangku, Kacerita Bhatara malinggih, Rayunané katur mangkin, Miwah tamiu sekan gong, Raris katuran tabuh, Datengané katur malih.

2.    Mangku malih ngawit matur, Upakara pangulapané, Sapadagingan iku, Sampun kasaksénang mangkin, Rayunan malih kawitin, Soda sarining dapetan, Mamanisan pada katur, Puput raris katabuhin.

3.    Wajik cané mangkin katur, Kasurya rihin aturé, Dulurin baan glagar dayung, Ider kidung anggén nampi, Khayangan pamarep sami, Ngider sami jroning Pura, Puput ider kidung, Kirangan ngaturang linggih.

BATHARA KATURAN LINGGIH

1.    Bethara katuran malungguh, Sowang-sowang kahyangané, Irika pada malungguh, Sampun pada mayang sami, Upakarané cumawis, Ring jero miwah ring jaba, Kacumawis sampun, Sakawéntené sami.

RIKALA NGEMARGIANG PADUDUSAN

1.    Magelar sor taler sampun, Miwah gelar sangané, Pasolsolan pada katur, Jaga walak  jaga rasi, Margiang lis kamaligi, Miwah tirta pancakané, Maguling magayan sampun, Tamen dembal katur malih.

2.    Padudusan mangkin katur, Sapajeg upakarané, Pada kailehang sampun, Masibuh pepek mresihin, Munggah tirta padudusané, Sakahyangan kamargiang, Tur ngayabang pamungu, Taler dasa malané sami.

3.    Pawajikan malih katur, Miwah sarwa kembang payasé, Mrik mrikan sami katur, Sekar arum lenga wangi, Katur ring Bethara bethari, Karawista miwah kalpika, Sami luwih asri anut, Sangkep iringan sami.

NGATURANG TEBASAN

1.    Sayut parikrama katur, Sayut bethara rawuhé, Sayut Bethara malungguh, Sesayut déwané asih, Sayut pengalang pangening, Sayut lara melaradan, Sesayut tebasan agung, Jerimpen pengambéan malih.

2.    Sasayut pajegan iku, Miwah peras sorohané, Rantasan gebogan katur, Paduwun ring banten suci, Ring sayut pageh linggih, Sasayut manik sakecap, Sawentené sami katur, Tuna luwih gung sinampuri.

3.    Munggah suci taler sampun, Penabeh baktin keramané, Pangendon pangleyan iku, Utamané sesayut murti, Panca lingga nika malih, Tebasan Ida Bethara, Sidakarya pada katur, Banten catur ring sesarik.

 

RIKALA NGANGGE SESAYUT KUSUMADEWA

1.    Sayut piderané katur, Karepang puja kértiné, Ratu agung darma wiku, Ring sesayut cakrageni, Sayut tirta merta sari, Muang sayut sida karya, Tur ajumané manurut, Ring rayunan pasupati.

2.    Sayut neritiné mungguh, Katur ring Hyang Ludrané, Sayut candi kusuma iku, Ring sesayut tilik jati, Sayut prayascita kawi, Sasayut hatining buana, Sayut jugah tapa iku, Giri kencana muka luwih.

3.    Kusumadéwa araniku, Ring sayut yamaning loka, Jangkep bacakan sesayut iku, Rikala patirtan luwih, Mayadnya mawinten malih, Rikala melaspas kahyangan, Patut anggén iku, Yadnya alit pakirangin.

MANUWUR TIRTA

1.    Mapinunas suci nulus, Bethara suéca micayang, Tirta ening mawadah sangku, Ngastawa déwané sami, Ider buana muang tri sakti, Mahéswara mahadéwa, Malih Brahma Wisnu, Siwa ring madya malinggih.

2.    Mahésora Ludra Sambu, Sangkara sampun keastawa, Nawa sanga sami pupul, Sareng Sang Hyang Pasupati, Micaang tirtya merta jati, Rahayu sang ngwangun karya, Tirtané ring sangku, Sang mekarya nunas sami.

3.    Sarat pinunas demangku, Gelis turun Betharané, Ring Kahyangané malungguh, Tirta swéta suranadi, Wédan Sang Hyang Pasupati, Sareng Bethari ring Kahyangan, Ngardi né rahayu, Sang ngwangun karyané sami.

PANYEMBAHAN

1.    Ang ung mang baktyem pukulun, Sadosa tri kayané, Manusanira jati jugul, Langgya mangaturang gurit, Ring pada dwaya sang luwih, Sadananing wang aneda, Sira sang sinuhun, Moga sida mangun trepti.

2.    Ong Hyang Surya Pukulun, Sané nyunarin bwanané, Sadosan tityangé katur, Swéca Ida Bathara nyuryanin, Matutang ala ayuné mangkin, Maka pangawiting sembah, Kasampurnéng ulun, Wara nugraha wibakti.

3.    Ong Hyang Puseh Pukulun, Maka sarin sedanané, Ida meraga suci mulus, Ida meraga bayuning bumi, Setata Ida nyuécanin, Sapaulahnia di pada, Maka sembahing ulun, Nunas gung ampura ugi.

NGATURIN IDA BATHARA TURUN NGAKSI

1.    Sampun masehe demangku, Ngastawayang suryané, Ngaturang gelar sanga sampun, Raris buktia banten sami, Masane pranamya sami, Ngaturin Bethara medal, Raris mider ping telu, Ring pangubengan rihin.

2.    Sampun masehe demangku, Ngastawa ring pangubengané, Wus mider ngapuriang sampun, Ngiderin Kahyangan sami, Ngaturin Bethara malinggih, Ngaturang asep miwah canang, Sang mekarya sampun kumpul, Kiréyang muspané mangkin.

3.    Mangkuné madabdab sampun, Jaga mendak Betarané, Canang daksina sampun, Asep menyan muang astanggi, Sami pada mangarepin, Ngawé linggih padmasana, Ngrana sika sampun, Mamustiya sareng sami.

PANGAYAP

1.    Ong awigna pukulun, Mangarcana Betharané, Mangayap ngaturang kukus, Maduluran pangebakti, Miwah sehananing suci, Mangda ica Ida nonton, Nodya saking luhur, Mamuputang sami.

2.    Pangeredanané kaluhur, Maka pangundang Déwané, Asep menyan majegawu, Ambunnyané merik sumirit, Cenané pada medaging, Pamedek Ida Bethara, Anggén né di luhur, Ngaran tiga sakti.

3.    Sadasiwa majegawu, Pramasiwa cendanané, Menyané Bethara  Guru, Kukusé nepud ke langit, Punika anggén pemargi, Pacang turun ri Kahyangan, Mangda gelis rawuh, Manusa pedek manyiwi.

PAJUGARAN (PATABUH)

1.    Pangawitin ider kidung, Sakannia sané keagem, Kadulurin seka kidung, Sakané pat agem sami, Gagelaran gending pamuji, Cirin tabuhé nyatur buana, Puput raris tumedun, Malinggih sami katabuhin.

2.    Kasurya dumun matabuh, Nunas wara nugraha, Ring Hyang resénggana dumun, Mangda Ida ngalugrahin, Patabuhé mangkin kawitin, Toya dumun kaparekang, Sajeng arak berem nurut, Patih yang surya manampi.

3.    Canang cané ambil dumun, Ngaturang taler igelé, Nyiriang dedarinan sampun, Pada ngigel mangedingkling, Puput raris kaasepin, Patabuhé mangkin kirang, Kadulurin saha kidung, Tapan anggén manabuhin.

MAPANYAAG

1.    Ilén karyané sampun puput, Ngastawayang linggihé, Upakarané puniku, Rayunan miwah linggih, Segehan genep cumawis, Panguluné canang daksina, Tahapan peras sampun, Sorohan tabuhan sami.

2.    Pamangku Kebayan ngawit matur, Bendésané ngandikayang, Patirtané sané katur, Sampun wénten maka cirri, Saking swéca Ida Hyang Widhi, Bawan damuh Idané pada, Macihna hening mulus, Ngawinang landuh ring bumi.

3.    Demangku malih matur, Ring niskala karasayang, Bethara ngaksi karyané sampun, Ring sekala krama nyaksi, Manunas amerta sami, Miwah sarin pala bungkah, Tahun miwah pala gantung, Walungan sato kayu sami.

PANGELEBARAN

1.    Parekang datengan mangku, Mangkin ngelebar karyané, Punika bekelang  mantuk, Kala buta bongol tundik, Saking kangin budal kangin, Saking utara mantuk utara, wénten pascima mantuk, Budal kelod puput sami.

2.    Mogi-mogi sang kasuhun, Lédang miarsa kidungé, Suwéca ring I muda jugul, Mawéh wasuh pada suci  Sadosa mayahé milir, Ong ksama sampurna namah, Maka panelasing kidung, Mangda tan katulah carik.

WARGASARI

PAMELASPAS ( ngayab biyakaonan )

1.    Pabiakaonané katur, Kaastawa yang suryané, Toya pangesengan, Lara roga papa klési, Pamurtining yang agni, Pinaka pangesengan camah, Ong raja ditya centakéku, Ang ah pralaya dén candra agni.

2.    Pamrascitané katur, Kaastawa yang candra lintangé, Dasa malané kalebur, Matemahan hening jati, Kasiratin sanjiwani, Wyakta temah surya candra, Trikaya parisudaku, Sang hyang taya sida murdha murti.

3.    Paklemigyané kaatur, Ngastawa yang trangganané, Nganyudang leteh Hyang Wisnu, Pukulun hyang janur kuning, Kaswargan Ida nuronin, Turun déwata makabéhan, Hyang Brahma Hyang Wisnu, Mukti ya namah swah iki.

RIKALA MECARU

1.    Daksina gedé pamucuk, Uluning upakarané, Munggah suci taler sampun, Pamoga kalané malih, Resiganané utami, Caru antuk panca sata, Bébék bulu sikep sampun, Dasar caruné utami.

2.    Kasurya dumun umatur, Nunas waranugraha, Tridéwata sakti mulus, Jadma pada astiti bakti, Panunasé kalugrahin, Panglukatan sarwa camah, Kalané pralina iku, Ong siwa amerta nadi.

RIKALA NYAPSAP

1.    Ong Sang Hyang yasa pukulun, Katuran toya panyapsap, Katampalan laraning mur, Mangda kedas hening jati, Lunga bersih teka bersih, Saluwir ginawé yasa, Sami pada tanpa letuh, Kahyangan tigané lewih.

RIKALA NGAWUG SUNDUK

1.    Tadah woh mangkin katur, Sejangkep upakarané, Jalaran pangawug sunduk, Hyang naga raja kaastuti, Lan ardhanareswari, Kadi sakti mahagurwa, Ngawangun sarwa winangun, Ang ah mantrané sujati.

MULANG PANCER WEWANGUNAN

1.    Padagingan panceré puput, Saha puput astawané, Majaya jayané puput, Kahyangané kaiderin, Wargasari kadulurin, Maka pakukuh kahyangan, Meras dasar sampun puput, Mangda sida pada suci

NYALANANG PANGURIP-URIP

1.    Ong yamarya yaman tigéku, Jumeneng Sang Hyang uripé, Hyang Bayu jumeneng iku, Ring sariran winangun iki, Pada makedap-kedapan mangkin, Panguripé wus kamargiang, Pangendaning Sang Hyang tuduh, Sang Hyang urip mangebekin.

2.    Guminé sampun mabayu, Bedawang dadi dasaré, Bedawang nala puniku, Nagané ditu malilit, Maring ibu pertiwi, Brahma Wisnu muang  Iswara, Mahadéwa iku, Siwa ring madya malinggih.

3.    Pamlaspasé mangkin katur,Sejangkep upakarané, Daksina maka pamucuk, Kukus arum muang astanggi, Atur ring Hyang Triodasa sakti, Maka sakti sang Tri Purusa, Rikang kinarya rinéku, Ang ah urip déwané sami.

SAMPUN MALINGGIH KATURAN SESAYUT KUSUMADEWA

1.    Ong Hyang Iswara pukulun, Ngadeg saking dangka purwa, Mwang ngaturang sesayut, Puja kérti niki aksi, Dasar iwak sata putih, Kukus arum pawacikan, Turunang tirta pukulun, Meraga merta sanjiwani.

2.    Ong Hyang Brahma pukulun, Ngadeg saking dangka daksina, Muang ngaturang sesayut, Cakrageni niki aksi, Puncaknya geni mangendih, Kukus arum pawajikan, Turunang tirta pukulun, Panulak pangeseng camah sami.

3.    Malungguh ring gedong sampun, Mungguing punika gedongé, Gedong menyan gedong madu, Upacara sarwa ngerawit, Dumilah ring pura suci, Sinayiban pajeng robrob, Tuwek payung pagut, Lalonték pangawin.

4.    Sesangga muang umbul-umbul,  Akéh wong mercapadane, Pada ngadpada sumuyug, Werda anom agung alit, Sami pada nyadya tangkil, Sami pada nunas swéca, Sami pada nyungsung, Sami pada bakti.

5.    Ong awighna pukulun, Ngarcana betharané, Mengayap ngaturang kukus, Maduluran pangubakti, Miwah sehananing suci, Mangda Ida ica nonton, Turun saking luhur, Manusa manangkil.

--------------------------

Share: