GEGURITAN NI CANDRAWATI

Geguritan Candrawati

Pupuh Ginada Candrawati

1.    Somaning Tolu kocapan,
Mangiket mangawé gending,
Manuju bulan wisangka,
Suklapaksané ping telu,
Irika ngawé carita,
Manah sedih,
Kidung anggén mamurnayang,

2.    Wénten né mangkin kocapan,
Prabu ring Kretanegari,
Madruwé putra saroro,
Sami pada ayu ayu,
Prabu wibuh maring jagat,
Suka lwih,
Magehang sastra utama.

3.    Kawuwus putrané lanang,
Warnané tuhu apekik,
Mêharan I Wiranata,
Budi alus kadi Wisnu,
Wicaksana sidi ngucap,
Darma jati,
Weruh ring sastra utama.

4.    Ariné istri mengayang,
Maharan Ni Candrawati,
Istri lwih ring pawongan,
Hyang Ratih ica tumurun,
Manurunin saking swargan,
Sangkan dadi,
Ayu lwih paripurna.

5.    Warnané lwih sura sara,
Ayuné tan péndah Ratih,
Raga lempung magélohan,
Akwéh pada para ratu,
Nglamar Ida nénten arsa,
Pacang swami,
Kayun nyukla barahmacarya.

6.    Sadina mangulik sastra,
Astiti ring Saraswati,
Miwah ring tutur utama,
Yoga bratané rinangsuk,
Paican sang muniwara,
Resi sidi,
Ngaran Bhagawan Utatya.

7.    Sadina ngawangun bratha,
Tumus nyunjung Siwa Ratri,
Nuju Purnama Kartika,
Punika rahina ayu,
Ni Candrawati akramas,
Tur masisig,
Mangrangsuk raja busana.

8.    Raris munggah ring pasucian,
Malinggih ring balé gading,
Mayoga ngarcana Déwa,
Astiti heninging kayun,
Tedun Ida Sang Hyang Smara,
Anuronin,
Kajamah Ni Candrawatia.

9.    Pirang dina lawasira,
Ni Candrawati ngrempini,
Dadi matemahan mobot,
Sampun macihna ring susu,
Ni Candrawati kosekan,
Tur manangis,
Kudiang jani manyaruang.

10. Yan uning Ida Sang Nata,
Miwah Ibu Pramiswari,
Kénkén baan manguningang,
Kaselek pacang umatur,
Déning awaké nu bajang,
Labuan cerik,
Déréng matemu dikarma.

11. Wang jero pada uninga,
Ngrawos pada pakisi,
Kénkén jani ban medaya,
Yan uning Ida Sang Prabu,
Nyai mbok pacang rusak,
Mangemasin,
Bakal dadi carun sétra.

12. Sang Prabu mangkin kocapan,
Angrenga wreta sujati,
Saindik putrané mobot,
Kagiat Sang Prabu angrungu,
Gelis Ida maputusan,
Sampun jati,
Putrané nemu bencana.

13. Osek rawosé ring Puri,
Yayah Ibunira wingit,
Apan patitahing Déwa,
Anemu sengkala agung,
I Wiranata angucap,
Inggih aji,
Ni Candrawati rawuhang.

14. Sang Prabu raris ngandika,
Kaka patih ngaturin,
Anuli raris memarga,
Ni Candrawati katemu,
Ki Patih raris anyumbah,
Duh mas manik,
I Aji mangutus tityang.

15. I Ratu katuran medal,
Nangkil ring Ida I Aji,
I Byang sampun irika,
Ni Candrawati saturut,
Anuli raris mamarga,
Sampun prapti,
Maring ajeng ibu yayah.

16. Malinggih Ida ring natar,
Sang Prabu ngandika aris,
Duh mas mirah atman ingwang,
Anak ingsun wawu rawuh,
Ni Candrawati anembah,
Inggih aji,
Anak Ratu wawu prapta.

17. Mariki ya anak ingwang,
Ingkéné sareng malinggih,
Ni Candrawati mamindah,
Sang praméswari tumedun,
Manuntun Ni Candrawati,
Ngasih-asih,
Éling ida tur mtangisan.

18. Sang Prabu raris ngandika,
Ngalemesin saking aris,
Pajarang déwa pajarang,
Néné jani da mengapus,
Dumadak patuh dikarma,
Né buin mani,
Tityang madana kasukan.

19. Sang Ayu raris anembah,
Ujaré angrenyuh ati,
Mandra-mandra manis alon,
Manis nyunyur kadi madu,
Duh ampura Ratu tityang,
Mapan kawi,
Nuduh mangawé bencana.

20. Uduh ratu sesuhunan,
Tityang umatur sujati,
Krana tityang nemu kawon,
Ida Sang Hyang Smara tumurun
Anuronin saking swargan,
Mapan lwih,
Saksana munggwing sayana

21. Sang Prabu suka miarsa,
Lawan ibu praméswari,
I Wiranata angucap,
Beli twara da mangugu,
Data Déwané rawosang,
Anuronin,
Masa kurang maring swargan.

22. Yaning nyai nawang Dewa,
Kma Déwané jani alih,
Apang bli nawang Déwa,
Ni Candrawati umatur,
Kaka Mantri Wiranata,
Kari beli,
Sumangsaya maring tityang.

23. Lawut manyaksiang raga,
Ring Sang Hyang Tridasa Saksi
Miwah Hyang Utasana,
Yan tityang mrasa ring wuwus,
Dumadak manemu ala,
Baya pati,
Anemu brunahatia.

24. Sang Prabu raris ngandika,
Candrawati ayua malih,
Nyai masasat ring Déwa,
Tuhu saja nyai sadu,
I Wiranata angucap,
Tityang kari,
Sumangsaya maring manah.

25. Puniki wénten cerita,
Ring Tantri tityang mamanggih,
Mawasta pun Céwangkara,
Tan pasaksi ya umatur,
Srengen Ida Sri Naréndra,
Ngunus keris,
Sinempal pegat gulunia.

26. Puniki né tulad tityang,
Ni Candrawati puniki,
Manah tityang pacang ngutang,
Ring alas Prambangé agung,
Apan ala ngamatiang,
Anak beling,
Kénten kojaré ring sastra.

27. Sané sedeng kakaonang,
Né ayu sedeng puponin,
Alané maawak utang,
Ayuné maraga Wisnu,
Wyadin tengahné sanunggal,
Mangda pelih,
Gelisang Ratu kawonang.

28. Sang Prabu tan kuasa ngucap,
Miwah Ibu praméswari,
Kadi tunjung tanpa toya,
Wedanané layu dudus,
Lesu rasa tanpa jiwa,
Lintang wingit,
Deres yéh aksiné medal.

29. Swé tan kuasa ngucap,
Sang ayu umatur aris,
Kaka Mantri Wiranata,
Sampun Beli seken kayun,
Yan tan beli kari swéca,
Tityang pamit,
Kakutang tengahing alas.

30. Pisan iriki puputang,
Suka tityang ngemasin mati,
Ica beli ditu nyingak,
Watangan tityangé Ratu,
Pinih wénten braya suka,
Mangurungin,
Mekelin tityang arimbag.

31. Punika pamitang tityang,
Kris sané sungklit beli,
Anggén mamuputang tityang,
Apang tityang gelis lampus,
Yan andih getihé medal,
Ala yukti,
Ciriné ngletehin jagat.

32. Yan miik getihé medal,
Mangalub ngébekin gumi,
Miwah surya mekalangan,
Wyakti tityang tuhu sadu,
Wyadin tanem tan pa toya,
Êning jati,
Ngungsi swargan sarin buana.

33. Wiranata semu wirang,
Pedih anggon manyawurin,
Beli twara liu rawos,
Jani majalan katemélung,
Radén Mantri raris budal,
Kagét prapti,
Ki Patih praya mamwatang,

34. Anuli raris anembah,
Pakulun sang Maha Déwi,
I Raka mangutus tityang,
Sampun Ratu nyalit kayun,
Pamidukané ring tityang,
Lwir sasarwi,
Langgia ring negara puspa.

35. Inggih tityang manguningang,
I Ratu katuran mangkin,
Mamarga ka alasé wayah,
Tityang mangiring I Ratu,
Ni Candrawati angucap,
Paman Patih,
Gelah twara lakar tulak.

36. Ni Candrawati anembah,
Ring sang Ibu Praméswari,
Wantah gantin tityang kawon,
Matilar ring yayah ibu,
Sampun mreta tityang pejah,
Tityang pamit,
Sapisan ring ibu yayah.

37. Ri wekas tityang nutugang,
Yan pinih tityang mawalik,
Tumitis manadi janma,
I rika tityang manawur,
Né mangkin kocapang tityang,
Mangletehin,
Mati makutang ring alas.

38. Sang praméswari ngandika,
Tan pégatan ya manangis,
Candrawati anak ingwang,
Lalis saja twah I Ratu,
Marerama kapin tityang,
Mangalahin,
Ajak tityang bareng pejah.

39. Pacang napi tyang karyang,
Apa ne tresnain dini,
Payu sedih mapangenan,
Ni Candrawati umatur,
Sampunang ratu sampunang,
Sedih kingkin,
Kari angen tekén tityang.

40. Duh Ratu pisan puputang,
Tityang nunas bekel mati,
Wastra cerik ané petak,
Pacang anggén tityang kudung,
Kala tityang kapanesan,
Né ring margi,
Irika ring panangsaran.

41. Sang Parbu nangis sigsigan,
Nyesel raga ngasih asih,
Duh mas mirah atma jiwa,
Yan I Ratu sampun puput,
Alih ko tityang gelisang,
Ajak mati,
Tityang mangiring I Déwa.

42. Wereg rawosé ring Puri,
Saisin Puriné sedih,
Manangis masasambatan,
Nyén jani dini sungsung,
Manik Puriné matinggal,
Minakadi,
Anggrék linjongnyané ilang.

43. Néngakena maring Puri,
Ni Candrawati mapamit,
Anuli raris mamarga,
Tan carita maring enu,
Kocapan Ida Sang Nata,
Ngasih asih,
Mwah ibu praméswara.

44. Kayun Ida ninggal Puri,
Miwah sadaginging Puri,
Pada sedih ya maguyang,
Pada mabudi manutug,
Ada sedih nigtig tangkah,
Kagét prapti,
I Wiranata kabangan.

45. Ngandika ulat prakata,
Prabu miwah Praméswari,
Élingang ratu élingang,
Atur tityang sané dumun,
Ni Candrawati kalintang,
Dosa pati,
Punapi juwa rawosang.

46. Ratu tityang nunas ica,
Tityang mapamit né mangkin,
Matinggal ring dalem Pura,
Umeneng Ida Sang Prabu,
Raris budal ka sarénan,
Ngibeb kori,
Sareng kalih ring pamreman.

47. Wang jero sepi makejang,
Tong dadi sira mamunyi,
Ada sedih nyelsel awak,
Saruwang tong dadi saru,
Ada nguntul ngurik tanah,
Anggon tangkis,
Ada sedih madekesan.

48. Sampun sandé surup surya,
Sepi séisining Puri,
Sedih magaleng yéh mata,
Tan kocap tengahing dalu,
Ni Candrawati kocapan,
Ané mangkin,
Sampun ngalintang ring marga.

49. Pamarginé malon-alon,
Anaké liyu mabalih,
Pada sédih mangatonang,
Warnané kalintang ayu,
Kadi bulané purnama,
Mangédanin,
Pantes maka sarin jagat.

50. Êluh mwani pada teka,
Mabalih lantas mangiring,
Anuli raris mamarga,
Ring alas wayah wus rawuh,
Ana waringin sanunggal,
Sira patih,
Raris matur saha sembah.

51. Irika raris mararyan,
Malinggih ring sor waringin,
Sampun sanja surup surya,
Kawulané raris matur,
Mirib Ida kapiwelasan,
Manyuluhin,
Kawulané ngawé pamreman.

52. Sampun lemah galang tanah,
Pamreman puput sami,
Ni Candrawati angucap,
Ujaré amelas kayun,
Ngasih asih kapiwelasan,
Paman Patih,
Kema tulak ka Negara.

53. Ki Patih umatur nembah,
Uduh Déwa ening pasih,
Mapamit tityang matulak,
Tityang mangiring i Ratu,
Kalih panjaké makejang,
Tityang pamit,
Malih tulak ka Negara.

54. Duh tityang manunas ica,
Pisan ngawula iriki,
Manatakin suka duka,
Wyadin tityang pacang puput,
Ni Candrawati angucap,
Mituturin,
Saking aris manulakang.

55. Né ada kajoring sastra,
Sang Rama Déwa né nguni,
Polih Ida né kakutang,
Ariné Sang Bratha tumut,
Masih kayun Ida tulak,
Kéto Patih,
Tutur Ramané ingetang.

56. I Patih suka myarsa,
Miwah kawulané sami,
Raris ya mamargi budal,
Pajalané jempya jempyu,
Mandeg ya bilang atindak,
Sarwi nangis,
Pada sedih ya matulak.

57. Ni Candrawati kocapan,
Kari ring alasé sedih,
Kalih wang jero sanunggal,
Bajang cerik lintang ayu,
Warnané lwir Nilotama,
Tanpa tanding,
Maaran Ni Pranacitra.

58. Sareng kalih di pamreman,
Masesambatan manangis,
Kéné saja dadi janma,
Sangsara tityang nu idup,
Yaning wénten Bathara ica,
Pisan ambil,
Urip tityangé gelisang.

Puput

Share: