GAGURITAN
I MLADPRANA
I Gusti Made Rai
Awighnamastu nama sidyam
I.
PUPUH DANGDANG
1. Manah sarat sujati
saking ngapikin ngawé gita, anggén nyalimurang, pamrat ing sakit hatiné, éling
tekén tumbuh lacur, uling cénik nganti kelih, twara nawang keneh jirna, rasa
Widiné mamusuh, krana tong ngelah geginan, goba kasar, tiwas ludin tan pahaji,
manah paitungan tuna.
2.
Krana sami braya wargi
dadi hati tan tolihan, pisaga tan lega, krana titiang payu sedih, sedih inguh
manah sungsut, manyelselang sang dumadi, lintang tan pakérti pisan, krana jani
titiang nemu, nemu kingking tan sah wirang, tan paneda, sanguin antuk pangawi,
pinehké dadi lipurang.
3. Nglipurang citan sang
ngawi iki lintang mokak. cangkap lintang langkap, pupuh gending liwat paling,
kabatek pongahé ngetuh, twara takut kakedékin, inggih sudi sang mamaca, ida
yadian dané ipun, makadi Hyang Kawiswara, Saraswatya, swéca ngampurayang ugi,
titiang tambet mabet bisa.
4.
Nyaritayang katuturané
riyin satwa nungkang, masih kadurusang, ngawitin pangawi iki, dina Bregu Siwa
Retu, ukun ipun Sila-Giri, kresna paksannya ping sapta, sasih kartika kawuwus,
ulu wéda rahnia sunia, isakannya, pawilangan cara Bali, sinia naga warga nora
(1840).
5. Cara Blanda tanggal nyané
wiaktin nétra sua(21), Septémber wulannya, taunipun critang mangkin, cara
ulandi punika, wong wreksa wulan asti(1918), pradéséng sang ngawi gita, ring
Manga nagaréku, wétaning wratmara ika, wésman ira, wah ing cita naman éki,
ingaran sira ing perang.
6. Ampurayang titiang sang
mangurit sami tuna, réh tan ja gaginan, manadi juru kawiné, kéwala antuk
ulangun, ring satwan anaké nguni, kerama laju ng we gita, anggén panyalimur
inguh, inggih manahé lipurang, ban kakawian, satuané anggén nglémékin, manahé
ibuk uyang.
II.
PUPUH
DURMA
1. Saking durma mimitaning carita, caritayang né mangkin, ring pradéséng
Kasta, mangaran I Rudita, matur ring guruné mangkin, "Duh inggih bapa, titiang mapidaweg ugi.
2. Mangda swéca bapa
luas ka Wanapuspa, ngarsang Ni Jangga Ketaki, ring bapa Gedé Taman, mangda sida
ugi titiang matmu ring Jangga Ketaki, nah suba srahang, mangda yang ditu
manjakin.
3. Yan tan sida antuk
bapa matemuang, titiang ring Jangga Ketaki, sukayan, makadi titiang, matinggal
satiba para, maring luwah wana giri, nglebok samudra, sukayan titiang ring
mati."
4. Raramannya gelis manyanggra mangucap, "Da cai nglalu pati, sida bahan Bapa, masa ko tuara kasidan, yan
Bapa kema namakin, sinah ya kaserah, tuara ia bani nulakin.
5.
Nah, né jani cai nongos jua di jumah, Bapa luas kema
ngidih." Ngararis mamargi, tan
kocapan ia di jalan. Sampun rauh sané mangkin, ring Wanapuspa, jumah Gedé Taman
wiakti.
6. Tan kocapan puput pakarunanira, I Rudita kaorahin, "Sida antuk Bapa, buin mani cai kema,
tongosin ia adin cai, Bapa ngitungang, duasa pawarangan becik."
7. I Rudita kenyem tur alon angucap, "Titiang pitelas mangiring. Wénten pinunas titiang, papending
gelang kana, sasimping Ian skar mas sami, buat titiang mrika." "Nah to sara suba cai."
8.
Tan kocapan wengi
benjangnya caritang, semengan raris mamargi, tan kocapan di jalan, ya I Wayan
Rudita, ring Wanapuspa parapti, I Gede Taman, manyapa madulur kenying.
9. "Cening Rudita
semengan ko cai teka." I
Rudita manyaurin, "Inggih rauh
titiang, mangkin titiang mitulusang, bawos gurun titiang dibi, swéca jwa Bapa,
marekang titiang né mangkin.
10. Tur nuturin tingkah patut dados jadma, eda ngubda nglémékin," I Gede Taman angucap, "Da
cai liu satua, Bapa suba dadi abesik, ring bapan wayan, nah dini suba né
jani.
11.
Nah bisayang déwék cainé
manyama, tekéning ya adin cai, idihin ia ayah, rawosin di pedeman, mangdané ia
dadi asih, raket masomah, tutut mangidepang munyi."
12.
Kacutetang akéto pitutur
ia, raris dané ngandikain, "Wih
Jangga Ketaki. mai nyai jua paekang, baang basé belin nyai." Raris ia
prapta, mangenjuhang pabuan aris.
III.
PUPUH
SINOM
1.
I Rudita ia mananggap,
raris ipun mangenjuhin, gelang kana sekar émas, papending Ian ali-ali, "Niki Adi aturan beli, ciriné bakti
saturut." Ni Ketut Oka mitulak, Gedé Taman muwus aris, "Tampi eluh, pabaang belin idéwa.
2.
Nyai suba plegang Bapa, jani ia ajak dini, bisang awaké manyama,
keneng-keneng ia ayahin, sapabaangnyané tampi." I Ketut Oka amuwus, "Inggih
beli titiang nunas." I Rudita mangenjuhin, sada kenyung, sambilang
ngecekin bangkiang.
3. Jangga Ketaki
ngesiabang, "Sampun sih akéto
beli" I Rudita manyaruang, nyemak pabuan nginang sirih. Réhing lintang
kabilbil, temakoné pakpak malu, pamoré kasisigang, lengeh lebuk tuara gigis,
ban ulangun, ngantenang Ni Ketut Oka.
4.
Ban pangguh kenehé
liwat, dadi bingung lengeh paling, manguyuk masebeng kiyap. Bayuné ngareteg
sami. Gedé Taman muwus aris, "Masaré
ko cai dumun, nyai kema ngulig odak,
boréhin ia belin nyai," raris tedun, Ketut Oka ngulig odak.
5.
I Rudita mangurayang, ka
pedeman lawut nyumpling, Jangga Ketaki parapta, makta odak gading merik,
"Gelisang matangi beli, maodak beli dumun" Wayan Rudita magébras,
raris dané kaodakin, ditu lawut, ngenjuang tangan ngabag tangkah.
6. Sampun usané maodak,
caritanan jani wengi, ada nalikan ping tiga, ngranjing Ni Jangga Ketaki, I
Rudita manutututin, Ni Ketut Oka amuwus, ''Kema
ke beli pesuan" I Rudita manyaurin, "Ngawos malu, beli manyerahang awak.
7. Apang nyai
mangodagang, akénkén pituduh nyai, beli tuara pacang tulak, pinunas beli abesik,
titiang sakit buduh paling, buduh tekén ratu ayu, ento né pingit mudahang,
manah titiang sai kanin, jampi ratu, antuk ganten muah tegesan.
8. Susu rupit gading
nyalang, anggén nambanin sesai, pupug baan wangkong rengkiang, lukat ban
pangaksi luncip, lolohin jua baan lati, né ngatirah manis muluk, usug ban batis
mamudak, tutuh ban pakayun asih, arap ipun, murup ganten ring pamreman.
9. Pipi montok anggén
sembar, trag ban salulut sai, raket pakayuné tresna, anggén jua pangraksa urip,
ngemanying anggén nglabanin, magaleng tangan magelut, anggén panyengker
tatulak, rasané nemuang karasmin, makambuh, ban ubaya ring pamreman.
10. Apanga dadi yuwana,
mamanggihin legan ati, atin titiang ring i mirah, yén i ratu nora asih, nyén
konkon naké sudi, kadiangganing cicing berung, i ratu mula nruwénang, lamun
iratu tan asih, masa urung, titiang mamanggih duhkita.
11. Kitan titiang ring
i déwa, nguda ratu tan panolih, Yadian tan cumpu idéwa, nora seneng tan
nresnanin, elek takut masih tusing, ring titiang pongah mamerud, Yadian
sapunika ida, tan wangdé titiang ngulanting, tuara kimud, tusing jengah kasepékang.
12. Réh manahé langkung
sarat, mangalinus kadi angin, wulanguné kasemaran, lumimbak makadi pasih, teresna
saha mapanggih, suluk kadi, yéh macebur, sungleng manahé dumilah, muntab kadi
gunung api, lebian enyud, kadi tanah yan upama.
13. Empugané dalem
linggah, Ratu jani melaburin, ngujanin antuk duhkita, Isep titiang nika sami,
ban manah tan rered bakti, krana tong marasa ibuk, ibuké suba bubukan, érang
manah urung sami, gedeg ipun sampun sami madegdegan.
14. Elek suba
maleklekan, osah suba dadi asih, asih-kasih asih teka, malulut ngalilit hati,
pedihé sampun pakidih, takuté suba ia bekut, ngidalem nyilem satata, kasemarané
nglaranin, bas kadurus, ati bingung bakat bungang.
15. Bungan matan
titiang ida, nguda maméngos i gusti, tuah ké saja tuara nyandang, titiang
manjakin imanik, saksat cebol nungkap langit, yan ring kedis kadi puuh, nagih
manyanding i merak, yan ring wastra blacu dekil, nagih manduk, i prancis
lintang nguranyab.
Mesambung ........................
