SALINAN LONTAR SERI JAYA KASUNU

LONTAR SERI JAYA KASUNU

Om Awighnamastu,

1.     Purwaning tatwa, natwayang kasinangkaon-kasinangkonan leluhur-leluhur Ida sang Jayakasunu, né rihin madeg agung tan langgeng.

2.     Yan akudang undag kawéntenan leluwur-leluwur Ida madeg agung, taler ngamunggahang sengkawan ataun 2 (duang tahun raja, amengguh séda, ucapang né mangkin Ida Sang Jaya Kasunu nampe gilirané madeg agung (ngantinin ajiné, déning katinggal nyuksema = séda)
Antuk panjaké tan wénten Ida kayun, sawiréh sayang pekayuné ring jiwa (urip), mawinan Ida lunga nakti (miasa) ring sétra pamuun, las ring raga, ngetutang kepatutan. 

3.     Irika Ida polih wara nugraha pangandika, pawisik Ida Hyang Betari Durga, Hyang ring kayangan dalem pangulun setra sekadi munggwing sor :

4.     Cening Jaya Kasunu piyanak Mémé idéwa : kerana lingsir-lingsir ceningé né rihin, nora ja lana-lana ngamengku gumi sawiréh Ida nora lingu tekén kepatutan agama, menyadnya-nyadnya.
Kadi mangkin Idéwa sampunang asapunika, mekadi ngemanggehang sekajaraning Aji : kepatutan agama, miwah menyadnya-nyadnya, déning punika nyantenang uripé langgeng, saha raris kapituduhin pelaksanaan-pelaksanaan punika luwiré :

5.     Gagelaran pemayuhaning buana agung miwah alit : ring telenging sasih Kesanga, patut mepare kerti Caru, tawur wastannya, sadulur panyepian awengi (Tilem kesanga ngaturang di perapatan agung)
Benjangné penanggal apisan (1), sasih sasih kedasa, sejana padané patut sinamian regan ngelaksanayang semadi mapukukuh ngeningang adnyane, mengastiti Ida Sang Hyang meraga Sawetur, mateges : Sang Yogia nyewecanang urip langgeng.

6.     Rawuh ring Purnamaning Kedasa, irika pelastiang Ida Sang Hyang Betara Betari sami lunga ke Segara (pura segara) Serawuhe ring segara, raras Ida para yang Betara-Betara katuran pareresikan. Sepuput ngaturang pareresikan, pangiring-pangiringé sami, patut mengastitiang raga, (mapanyukseme) nganjut dasa malaning déwék, ring Segara, (magelaran ngastiti Ida Sang Hyang Baruna, nunas paberesihan, ragané, puja Baruna astawa.

7.     Sapuputing pengaci-aci ring segara, raris pare Hyang Betara-Betari sajoli, kairing sami mantuk ke Pura-pura pasetanan Ida ring pura panyiwiyan suang-suang.

8.     Serawuhé ring pura raris Ida katuran peranian, luwire :
a. Ajuman seperangkat, raka-raka, wangi-wangi sadulur sesayut tulus ayu.
Sapengiringé sami pada ngalungsur ayaban upecara punika, disampuné katur pemantuké ring para yang Betara-Betari, saha ngeraris nunas tirta kakuluh paberesihan pangening-ening paican yang, paican Betara ring tengahing Segara, masukseme maka panedas dasa malaning raga déwék, (puja patirtan)
Puput amunika, raris simpen sami-sami palelinggan, Ida yang Betara-Betari.
Pelas iléning, upecaran, caru petawuran miwah pelastian Ida para yang Betara-Betari

9.     Siyos ring yadnya punika malih angken rawuh : Redite (dine redité, paing, dunggulan, irika paturun,
Sang Hyang Tiga Wisésa : mewarna Ida kala (Buta Tiga)peraya mangerubeda, memati, jana padané

10.  Ring tuju dina, Soma pon Dungulan sejana padené patut masemadi, peraya nyuksemayang adnyana mangde degdeg ening, make larapan kerahajengan side panggih.

11.  Ring dina, Anggara wagé, Dungulan, patut mapasuguh, pengaci-ring buta tiga mungguwing ajeng, melarapan upacara byakawon, tadah kala, ritatkala jegjeg Suryané. Sané piteges ipun (suksemané) : maka panukun jiwa miwah kauripan.

12.   Sadudur punika, wenten malih, sesayut Galungan, wastané, Luwiré :
Sege papanekan 5 bungkul, maulam sesagagecok, rmbah gele, sasak mentah, pencok kacang ijo, amel-amel, sami sinujen-nujen, cucurak winadahan lawak mabulu, biyu ijasan, raka woh-wohan, godoh tumpi lenga wangi burat wangi, sedah woh, apon, tatebus, beras sakulak, pirak 200, gerangasem sadulur gelar sanga alit.

13.   Acaru mungguwing natar jero saha atur : Pukulun, sira kaki Begawan Galungan Betara Kala, Betara Jabung, iki pasuguhan manusanta, lawan sira, Sang Kala Jabang, iki pasuguhan manusanta, lawan sira, Sang Kala samadaya, lan tarimanen, sasing kirang, asing puput, iki pirak 200, maka pamikunia manusa, anede rahayu, suastiastu suaha telas.
Ring sorene, dina, Anggara wage dunggulan, patut nancel pénjor, saregep saha upekarania, megantung-gantungan, ubag-abig, sampiyan, gantungan ring penjoré, unggaheng banten :
Penek putih kuning, pisang payasan, pisang kembang, pisang teges, saha damar-damar antuk cawan, wiyadin antuk kulit taluh, kilit buah, minyak kelapa, enyitin : Mungguwing damaré manggé, memargi ritatkala peteng sasih (pangelong)
Yaning galang sasi (penanggal) tan wénten medamar. Malih mungguwing tetampen pengertian sang megama bali Hindu sapedaging penjoré, peraya katur ring Hyang Betara ring Gunung Agung, anut lontar Usana Bali, Gunung Agung linggih Hyang Betara Putra Jaya, putran Betara Pasupati saking Gunung Sumeru ring Jawa.
Maka panyuksema ngaturang bakti, misadya ngaturang sarining taun (sarining bumi) déning ragané déwék, sampun makolihang upon-upon punika, sawah wiyadin saking tegal.
Paétangan indik manut punika wantah 6 sasih inucap taon pawukon Sinta jantos uku Watugunung.
Nanging yaning tetampen sang megama Bai, wuta kasuksemayang : pedagingan penjoré maka sami, wantah sumandiya katur ring sang Pitra-pitrania.
Déning tetampennia pitara-pitara leluhur ipun pada malinggih ring Gunung Agung.
Malih manut sesengguh ipun kawétenan pitra-pitraniya punika awit saking rahina : weraspati, wagé uku Sungsang, jantos : Redité Umanis uku Langkir, pitra-pitraniya, pada wénten mungguwing pagubugania, peraya amukti sasuguh piteresenan damuh-damuh niya.

14.   Semalih mungguwing kasukseman kawéntenan damaré ring pénjor punika, maka sasuluh tatenger pitra-pitraniya angéling damuhé.

15.   Mungguwing tetampen sang megama Hindu Bali, kasengguh : wantah maka sunar (pengater) ayatan baktini ring yang Betara sané malinggih di Gunung 

16.   –

17.   Rawuh ring raina : Budha, keliyon Uku Paang, irika malih ngawéntenang upakara, penelas lulun Galungan, wastaniya, upecarane mungguh ring sanggar pénjor, luwiré : tumpeng abesik (1) mucak manik, canang lenga wangi burat wangi, maka suksema : penerus baktiné sekadi ring ajeng pénjor punika.
Sampun puput nganteb upedara punika raris ngabut penjor, tur mengeseng lamak, amuniya raris duduk, raris raris pendem ring natah jero (umah), maka panyuksema pamugenin pikukuning jiwa (urip) 

18.   Patut sekadi punika ilén pupecarana : sesapan (nyadnya angkehing sasih kesanga) sadulur pelastian, Ida para yang Betara Betari ngangkening sasih kedasa, miwah pabyakaonan, upecare yadnya ring uku Galungan (dungulan) jantos paileh mageseng lamak, panedas lulun Galungan.

19.   Sampun polih pawisik kadi punika, awinan ida Sang Jaya kasunu kayun keadegang Agung, maka ajeg-ajeging jagat, ngemanggehang pedagingin Aji Aksara.

20.   Daging ipun, sairing ring pawisik Ida Hyang Betara Durga. Ngawit saking panyenengan Ida Sri Aji-Jaya Kasunu umadeg Agung, Kawéntenan jagaté, rahayu, gemuh landuh, nora ana widi lunas lanus, pemanggih jana adene.
Ngawit isaka 1230 ( ………………..)

Disalin oleh :
I Made Gambar

Share: