PUPUH PANGKUR
1. Singgih sang pamurweng sarat
Sang pinaka
sangkan paraning dumadi
Om pengaksaman hulun
Moga natan keneng sapa upadrawa
Langgya mawilet angidung
Nguncarang kautaman tatwa
Sarining aksara aji
2. Awighnam
kauncarang
Mawit saking basa Dewa negari
Tanpa alangan teges ipun
Wantah puspatan Bhatara Gana, Dewa
Gana
Temajaning Sanghyang Guru
Sane mungguh maring lontar
Keputusan Rsi Ganani
3. Wenten kidik
simpang kojaran
Kadung sampun
kalumbrah saking nguni
Resi Gana iku Caru
Maring prembon Weda Puja kasinahang
Resi Gana boya caru
Ring Hyang Gana keaturang
Nora maring buta buti
4. Ngiring
plapanin ngayunang
Mangda nenten kadung salah dedalih
Ring tatwagama masuluh
Mangda nenten terus singsal mangucapang
Pretiaksa uli malu
Sastrane anggon pengancan
Sarwa plutuk pelajahin
PUPUH SINOM
5. Tatujone mangkin bawosang
Mamuatang tedung dingding
Ngelanggengang kauripan
Utptining sarwa prani
Kedohang ring baya pati
Bhuta kala ndatan ngerug
Asing karya sida labda
Tan ketaman maling gering
Osah inguh
Runtag kayune pang ical
6. Sane sering kemargiang
Katatakin caru malih
Panca sata, manca sanak
Dulur manca kelud iki
Nika ngawe salah tampi
Resi gana kasengguh caru
Manut sabdan Ida Pedanda
Made Sidemen sane nguni
Rsi gana iku
Wantah ngange itik petak
7. Yan rerehang
maring sastra
Manut lontar Usana Bali
Itik putihe punika
Jeronnyane keolah malih
Wit papusuh urab putih
Maring purwa genah ipun
Saking ati urab barak
Ring kidul unggwanya iki
Maring kulon
Ungsilane urab jenar
8. Urab ireng
ring utara
Lakarnyane soroh nyali
Iwak itike di tengah
Tetandingane manut urip
Maring purwa limang tanding
Daksina sanga keatur
Sapta sane ring pascima
Ring utara petang tanding
Tengah kutus
Dulur iwak itik petak
PUPUH GINADA
9. Sanggar tutuan
ketancebang
Genahnyane kaler kangin
Kober putih duluranya
Tiying gading katik ipun
Medaging rajah ganesa
Punyan peji
Biyu lalung aywa lipya
10.Ring lontar Semara Dahana
Sanghyang Gana ne kapuji
Apan sida mamunahang
Rajah tamah bangga jumbuh
Raksasa ngusak Kahyangan
Ngiring mangkin
Sareng-sareng piarsayang
PUPUH DURMA
11.Nila Rudraka Sakti teguh tan pahingan
Tan pati rahina wengi
Dening sehanan senjata
Dewa raksasa manusa
Buta pisaca dedemit
Sami alah
Tan sida ngasorang tanding
12.Apan bangga Raris
ngalurug Kahyangan
Dewane kagiri giri
Tan wenten sida ngasorang
Senjata nawa sanga
Tan hana sida mintulin
Sami punah
Sehanan senjata sakti
PUPUH SEMARANDANA
13.Sami atawan tawan tangis
Dewane tembe kapesan
Raris sami nangun yoga
Ngastawa Hyang Murbeng Jagat
Ida Hyang Parama Tunggal
Mogi Ida sida asung
Ngicen panepas wicara
14.Kancit tedun kembang riris
Saha sabda ngawang awang
Uduh dewa mekabehan
Aja osek walang manah
Sutanira Sang Hyang Siwa
Dewa liman maring ulu
Ya pinaka panebasan
PUPUH GINADA EMAN-EMAN
15.Engsek dewata samian
Apan mewehe tong gigis
Putran ida Sang Hyang Siwa
Tan hana kadi puniku
Sinah bayane tan pasah
Memanjakin
Ratu raksasane corah
16.Kamenengan ring paseban
Dewane saling tolih
Sira sida ngutsahayang
Hyang Narada gelis matur
Singgih ratu para dewa
Surapati
Maduwe gajah herwana
PUPUH GINANTI
17.Pranamya dewane matur
Singgih ratu Sanghyang Sakri
Makwehing pangindra jala
Tulung dewatane sami
Nayane mangkin gelarang
Dewi Uma kapetitis
18.Sanghyang Indra raris nyawur
Ratu Bethara Bethari
Titiang nyadya ngutsahayang
Hyang Uma sedek garbini
Gajahe anggen ngesyabang
Mogi sida mapikolih
19.Manuju sasih kecatur
Tamane miyik sumirit
Apan sekar nedeng kembang
Brahmana mangisep sari
Dewi Uma malila cita
Nyingakin tamane asri
GINADA BASUR
20.Herwana nadak nglintang
Ring arep Ida Sang Dewi
Sewi Uma mangatabtab
Kayune lintang tengkejut
Bobotane raris embas
Saha mijil
Putrane maulu liman
21.Geger sewatek dewata
Masuryake tidong gigis
Sami pikayune ledang
Janten pacang jayeng satru
Putrane kaupacara
Keparabin
Ida Sanghyang Awighna-ghna
22.Ganesa aranya lianan
Wibawane ngawe kasih
Nyatur buja matangan patpat
Netrane manunjung biru
Siungnyane manguranyab
Diastun alit
Sakti tan pahingan ingan
PUPUH DURMA
23.Nenten malih Nyantosang dinane benjang
Yuda kakawitin malih
Sanghyang Gana kapucukang
Diastun rare wawu embas
Tan wenten kayun ajerih
Nila Rudraka
Ngelempag anake alit
24.Duk punika Kwentenane tawah pisan
Sang rare nenten kanin
Bilang keni mengagengang
Mesehe terus menaldal
Kantos ida mangga truni
Sayan rames
Yudane saling glilingin
25.Nila Rudraka Detya sane sakti dahat
Hyang Gana ngantos kelilih
Wenten sabda kapiarsa
Siunge anggen senjata
Anggen nuwek detya sakti
Tur sahasa
Ganesha mamunggel taring
PUPUH GINADA BASUR
26.Sanghyang Gana mengarepang
Masenjata siung sakti
Mesehe sayan kapesan
Tangkahne raris kasuduk
Erahnyane mumbul muncrat
Laut mati
Ulian ambeke corah
PUPUH DANGDANG
27.Saking luhur labuh kembang riris
Ngesumayang
Dewata samian sagrehan mangastuti
Mojar Hyang Bethara Guru
Uduh cening putran aji
Aji ngicen panugrahan
Idewa penyaga satru
Maya pada lan Kahyangan
Dewa ngraksa
Dewa pacang kebaktinin
Dadi Dewa pasayuban
PUPUH GAMBUH
28.Sapunika ne kawuwus
Sane munggah maring sastra iku
Keanggen pertiwimba, kala urip
Pang da ngawag maprilaku
Tinutin pengajah agama