IV. PUPUH DANGDANG
1. Tan kocapan I wong desa sami
Kacarita
I Mudita luwas
Padidian tuara ja wedi
Nuwut rejeng silak siluk
Alas wayah madurgami
Bungkungnyane kaingetang
Ne masoca jaga satru
Panulak sarwa wighna
Kerana lasia
Tengah alase memargi
Socan bungkunge utama
2.
Rase gepu lemah lemeng memargi Tengahing alas
Bedak
turin layah
Tuara da desa kepanggih
Kewala alas pangkung
Liwat gepu ia memargi
Masih ngelawanin mejalan
Satindak
janggel malungguh
Pitung dina ia di jalan
Mainepan
Mepuasa tong ngentug nasi
Tan kocapan ia di jalan
3. Kacerita Ni Kusumasari Pasemengan
Manuju purnama
Dumara
suwud mabresih
Masumpang tunjung tutur
Pamulune
lumlum gading
Kadi ratih nyalantara
Asing solahang teka pangus
Pesu natad pangilitan
Ngalap sekar
Ngamenekin naga sari
Sarwi ia magegendingan
4. Yan upama tulya widiadari
Maring swarga
Turun macangkrama
Ring alas mengisep sari
Manedeng sasih ke catur
Sarwa sekare ngedanin
Pangid ngengsutang selendang
Ngenah susune alus
Nyangkih nyalang menyuh danta
Macingcingan
Ngenah
pupunnyane galing
Waluya
pudak cinaga
5. Dadi teka I Mudita mangkin
Kecud kembang
Layu tuwi awon pisan
Damuhan kalintang gesit
Mejalan kalintang gepu
Rasa tong sida memargi
Kadi pituduhing Hyang
Dadi maningehang kidung
Mangambara
ngawang awang
I Mudita
Bingar idepe ring ati
Bedak layah wetu ilang
6. Sayan paek dingeh sayan becik
Ngenyudang manah
Kawaspadayang pisan
Makelap kanten wong istri
Ngalap sekar tur makidung
Mudita bengong ngantenin
Istri ayu ngayang ngayang
Menakeh dedari turun
Inget ring sang Raja Pala
Polih istri
Widyadari ayu luwih
Sinah keto ya tingkahnya
7. Aketo papinehnya ring ati
Tur manegak
Bengong manyengongak
Bahan tumben manepukin
Anak istri ayu nulus
Maidep pacang nakonin
Mewangsit ban cekohan
Kusumasari tengkejut
Laut ya matolihan
Dadi ada
Wong laki negak mebalih
Baguse
mangenyudang manah
8. Pamulune lumlum nyandat gading
Tulya emas
Alis tajep maengad
Pangucap nyunyur manis
Pasebenge alep pangus
Tuwi
pantes sungsung ayahin
Kusumasari nyengongak
Dadi wetu manah inguh
Paling angkihane runtag
Tuwun ngenggalang
Mudita bangun nakonin
Tuwi
ulangune liwat
9. Inggih ampura titiang nunasang akidik, Yening wikan
Ring dukuh
siladeria
Dija linggih dane deriki
Kusumasari mesaur
Inggih
deriki di duwuran kangin
Jerone uli dija
Tembe rawuh ka gunung
Napi juwa wenten buatang
I Mudita
Dadi lengeh ketakonin
Rasa kena madu membah
10. I Mudita ngangsehang mesuang munyi Bayu runtag
Wenten saratang titiang
Kerana titiang rawu meriki
Nyadia manumbas madu
Ne manis ngenyudang ati
Pacang anggen titiang ubad
Titiang sakit ulangun
Suweca ngicen aketelan
Titiang numbas
Antuk manah subakti
Saumur nyadia memanjak
11. Kusumasari lek jengah miragi
Pamunyinnya
Manguntuk mulian
Manahnya kalintang sitsit
Mengantenang
teruna bagus
Pangid mangenyudang ati
Satekedne jani jumah
Dekes dekes manguntuk
Tur
bengong bengong manegak
Nyelsel awak
Deha apa kene jalir
Nyakitang dong pagelahan
12. Ne ke iba keneh buka jani
Bas kaliwat
Bingung mapengerasa
Iba tuwah nyakitin ati
Iba makeneh mamusuh
Kai nyadya manungkasin
I laksana teresna
Ajak kai ngalih patut
Nyen pacang ajak iba
Iba keneh
Sinah iba panes ati
Bahan tong maan jalaran
13. Nah aketo munyinnya Ni Kesumasari Nyelsel manah
Dukuh Siladeri ya kocap
Wus mapuja lintang bersih
Dadi I Dukuh tengkejut
Manyingak pianake sedih
Raris alus ngandika
Nguda ngeling manguntuk
Apa ko saja keranannya
Nah orahang
Mangda sida bapa uning
Ne sekelang cening manah
14. Kusumasari matur saha bakti
Inggih bapa
Titiang nguningayang
Ne wawu titiang melali
Dadi ada anak rawuh
Teruna mangebusin ati
Natiya metaken ring titiang
Sebenge alep pangus
Nakenang Dukuh Siladeria
Yan rupannya
Mirib bapa wiakti
Nanging rasa kaduhkitan
15. Mara keto munyinnya Kusumasari Kapirengang
I Dukuh Siladeria
Makesiab inget ring ati
Teken pabesene malu
Nyilurang pianake cenik
Jani sinah ya teka
Suba mahan pitutur
Buka pabesene suba
Nah aketo
Pangeresepe ring ati
Macelig Mudita teka
16. Tuwi tangkejut I Dukuh manyingakin manelektekang
Tur kanten dumilah
Bungkunge masoca luwih
Dukuh Siladeri macebur
Raris ngelut mepasihin
Liwatke sadian bapa
Jiwatman bapane rawuh
Nyen ngorahin
cening ambah
Apan sawat
Margine rengka tan sipi
Alas
pangkung tukad linggah
17. Apa krana bapan cai tuara mai
Nelokin bapa
Awanan padidian
Mengelalu cai memargi
I Mudita nyembah matur
Sarwi ya ngepes mangeling
Inggih lintang lacur titiang
Kerana titiang newek rawuh
Meme bapan titiang pejah
Sinarengan
Duk dane makire mati
Wenten pabesen ring titiang
18. Mangda titiang nanem nadiang abesik Tunggal
bangbang
Irika ring setra
Tur titiang mangda memargi
Luwas meriki ka gunung
Nguningang dane tan kari
Mangda uwa sahuninga
Malih puniki bungkung
Kocap paican uwa
Kapin titiang
Daweg titiang kari alit
Uwa mamekelin titiang
