KĀLA TATTWA
Manisuranarah pagnan, twaritah yawa bhumiñca,
Kascité purusah baksyé, ndisiporajana kascit.
Tucapa Sanghyang Kāla,
mabayangan lāmpahira katka tkéng bhumi yawa sira, māya-māya rupanira, tan wareg
ta sira mamangan sarwa mambekan, sakwéh sésining alas mwang wanwa dusun-dusun.
Pira kunang kwéhning wwang, pada tan wruh tkaning matinya, hanan pjah ring
rahina hanan ring wngi, sapuluh pjah pisan, satus hled sapisanan, binuru dé
Sanghyang Kala, lén tang mati tiba ring jurang, hanan kalebwing walahar, pada
kasyasih manangis masambat masu, prasamānawat Sang Hyang Widhi.
Sigran tumurun Sang Hyang Tunggal, mabhawa manusa stri wreddā lilu, angalangalangana Sanghyang Kāla mangan wwang, gumanti Sang Hyang Widhi marupa sato, masuku tunggal, umawera lampah Sanghyang Kāla, tan dwa kroda Sanghyang Kāla an inalangalang lakunira, ping pat ping lima katkan ping satus sinikep inlĕ mayanira Sang Hyang Tunggal, sadresangumle kukus, idepira Sang Hyang Kāla, mamanganikang sato masuku tunggal, muwah sinambutnira tékang wong istri wredha, ping sapta inlānira, umér juga sira ri arep Sanghyang Kāla, kémengan manah Sanghyang Kāla, manangis makidupuh manembah I jengning wong stri wreddā aminta sanmāta kaluputan lampahira, irika tuminghal tékang wwang akwéh, an mandeg alayu manonton gatinikang Sanghyang Kāla, kadi wwang masiwo-siwo pakatonannya, padāsahur manuk tikang wong kabéh, manangguh icca Sang Hyang Widhi, pada anembah makidukusaminta jiwita, jag dateng Bathara Guru mwang Bathari Umā, mangakwani wijanira Sanghyang Kāla, angampunana kaluputaning tanayanira, ri jeng Sang Hyang Tunggal, ndan kapwa inuwuhnira para wwang kabéh lakibi, masulung-sulung sumuyug dateng manembah ri suku Bathara Tiga. Ndan lingira Bathara Hyang Widhi rikang wwang kabéh ;
“Lah ya kita manusa kabéh, haywa kita tanénget ri kami, kami mulaning
sariranta kabeh, kami Sang Hyang Guru Rekā, angréka sésining rat kabéh, kami
sinanggah Bathari Hyang Widhi, Dewa Hyang Kawitanta kabéh, Kami panunggalanira
Sang Hyang Çiwa Uma Kāla, Kami masarira Sang Hyang Brahma Wisnu Iswara, méngeta
kitang kabéh, mangké wnang kita samuha, gumawé sanggar kawitanta rowang
tigāsana, apan mabhéda-bhéda pawitanning wwang, pada wijiling pañca Çiwa, Çad
paramārtha katkéng kami, kami Utpti Sthiti linanta, haywa kita korupamoh, I
tataning panca paramārta, maka nguni wnang kita manembah salwiring mapinda
sarwa sato, Kami wara nugraha, apan Kami wnang marupa sato, éngetakna haywa
lupa, maka hétu bhaktinta ring kawitan.
Étostuté karañjitah, punah nacastuté karmmah.
Mwah yan kita tan sthiti bakthi ring kawitan, Sang Hyang Kāla pinaka
tadahané kita, nda tanurung pwa kitāmanggih bhayāgung, haywa kita wismreti.
Téyah tasmétukālésyat.
Mwah ta ko kita Hyang Kāla, Aku manganugrahané kita, wnang kita wasa
wasitwa ring Bhuwana, ngutpeti sthiti linaning jagat, irika ta kita ring dlaha
ri tkaning dwapara yuga, ménget pwa kita tataning pañca yadñya, akwéh prabhédaning
jagat, kita wasitwa, wnang mawéha hala hayuning jagat, mangké kita kinonku
anglakwakna subhāsubhaning dadi phalanikang pañca yadñya kabéh, Déwa
Kālāngganta nityasa. Kunang ri tkaning kaliyuganing bhumi, Kāla juga sariranta
yan mangkana, wnang kita magawé sangharikang rat, sumurup ri manahing wwang,
kita pinaka lingganing catur yuga.
Tawat wasanti dharmini.
Kunang mangké, hana wnang pinaka strinta, wijanira Sanghyang Mretyuñjaya,
hana ring Yama loka, makébu Bathari Sādana, Déwi Kalikubwana ngaranira, ya téka
péten ta paka bharyan ta, ta rowangan tānrestti sthiti linaning jagat, dén wruh
pwa kita amagehaken swadharmaning jagat, haywa langgana kita, tasmat tan waluy
Déwa mwah kita”.
Mangkana ling Bathara Hyang
Widhi, manembah ta Sanghyang Kāla, mur Bathari Hyang Widhi tan pahamengan.
Agatah Brahma wisnuñca, Içwara Mahadéwa brihi,
Namasté guru kalanyam, mucyaté bhwana smretah.
Dateng pwa Bathara Brahma
Wisnu Içwara Mahadéwa, manembah I Bathara Paramésti Guru, pareng ri panembahira
Sanghyang Kāla majaraken ri tlas sira mahayu bhuwana, mamwit mantuk ring
Swargganira sowang-sowang kari tānakira Bathara Wisnu, Sang Wrettipati
Kandyāhyun, mwang strinira Çri Jayanti, putri Hyang Indra, sira sumiliha ratu
ring Mdang Kamulan, muwah hana sutanira Sanghyang Iswara, makébu Bathari
Mahéswari, Sanghyang Bragalungan sajñanira, sira sumilih gurwaning wong ring
Mdang Kamulan. Bhra, nga, lewih. Ga, nga, tunggal. Lungan, nga, ngentikang
lampah. Lungan, nga, weletik.
Carantiswārgga Iswariem.
I lungha Sang Hyang Içwara
mantuk ring Swargga loka. An Bathara Içwara nimitaning tatwāgama, hana ring
yawa dwipa, donikang atmaja Sang Bhregalungan sajña, maka sarana Sang Wrettipati
Kandyahyun amawang bhuwana, sang Bhregalungan gumanti sinembahing désa
pakraman, anggurwani munggahéng yasāgung apanjang, pada sinang akrama kabéh.
Kapa éwiem netrawari.
Kunang pwa Bathara Kāla,
manangis pwa sirākusa ri pada dwaya bapébunira, aminta pangubdinira,
neheranadah manusa, lagyanembah, lingnya ; Kalo drestiem patindehi, ping 3.
Wrekandakah hredyah caksuh, wasnannaradirah pituh,
Asudikayawaknyani, kah silundah ya liem bhawét.
Ling Bathara, “Duh tanayan
mami Hyang Kāla, hana pasungi bapanta ri Ko, yan hana wwang tan bhakti ring
kawitanya, mwang tan bhakti ring Déwa, ya téka wnang tadahen ta. Mwah yan hana
wwang tan manut ring linging aji, wanéh wwang tanpāgama anganggo salah ukur,
amuji kawangan dawak, yéka wwang wnang tadahanta. Wanéh yan hana wwang salah
ujar salah karma, alpaka ring rama réna, ri sang prabu, ring guru kuneng,
makadi ri sang pandita, yéka wnang tadahan ta. Kunang yan hana panca yajña tan
manut ri lingingaji, wnang wwang ika tadahanta, wanéh yan hana graha salah ukur
tkéng natar palmahanya tanpa sukat, ndan lawanganya tanpa sukat, anganggo taru
rebah tan pantara, mwang taru ayem rangkung carah, salwiring sinanggah cacad,
ka ling ning aji yéka wnang tadahénta tang wwang makretti mangkana.
Mangké wnang waranugraha
rikang wwang kabéh, tingkahing wwang anukat pakarangan wéhana galar-galaring
wates palmahanya, asing wwang langgyana ri warah ta, wnang kitānadah wwang
mangkana, ling Bathara Guru mangkana.
Padmā kunti druhiem nehiem. Bāhu brihiem phaliem bhawah.
Wawang mojar Bathari Uma ;
“Lah ya kamung Hyang Kāla, mné bapanta mawéh tadahan ta, ri sdenging
kretta, trétta yuga. Ndan ibunta ring dwapara lawan kāliyuganing rāt pawehang
tadahan ring Ko, maka phala tan kawaranan tadahan ta katkéng jemah”.
Mangkana ling Bathari Uma. Sukāgirang
budhinira Sanghyang Kāla, amanggih phala bhoga tambayan.
